Ба муносибати Рӯзи Конститусияи Тоҷикистон сокинони кишвар чор рӯз пайиҳам – 6, 7, 8 ва 9-уми ноябр истироҳат мекунанд. Дар ин бора ба “Азия-Плюс” аз Федератсияи мустақили иттифоқҳои касабаи ҷумҳурӣ хабар доданд.
Ба иттилои манбаъ, бо мақсади истифодаи оқилонаи рӯзҳои корӣ, рӯзи шанбе 1-уми ноябр рӯзи корӣ ва рӯзи ҷумъа, 7-уми ноябр – рӯзи истироҳат эълон шудаааст.
“Ба рӯзи дигар кӯчонидани рӯзҳои истироҳатӣ дар асоси қарори ҳукумати Тоҷикистон "Дар бораи ба дигар рӯзҳои корӣ гузарондани рӯзҳои истироҳат дар соли 2025" аз 28-уми феврали соли 2025 № 121 сурат мегирад”- шарҳ доданд дар Федератсия.
Манбаъ гуфт, ки онҳое, ки панҷ рӯзи корӣ доранд, метавонанд аз 6-уми ноябр то 9-уми ноябр истироҳат кунанд ва 10-уми ноябр ба кор бароянд. Вале онҳое, ки ҳафтаи шашрӯзаи корӣ доранд, 2 рӯз истироҳат мекунанд ва рӯзи 8-уми ноябр барои онҳо корӣ аст.
Ёдрас мекунем, ки мувофиқи меъёри қонуни ҶТ “Дар бораи рӯзҳои ид” рӯзи Конститутсияи Тоҷикистон, ки ҳамасола 6-уми ноябр таҷлил мешавад, ҳамчун рӯзи истироҳат муқаррар гардидааст. Имсол 31 солагии Конситутсияи кишвар таҷлил мегардад.
Ба ифтихори Рӯзи Конститутсияи Тоҷикистон дар тамоми шаҳру навоҳии ҷумҳурӣ баргузории чорабиниҳои идонаи фарҳангӣ фароғатӣ ва илмиву таълимӣ дар назар аст.
Конститутсияи Ҷумҳурии Тоҷикистон 6 ноябри соли 1994 дар натиҷаи раъйпурсии умумихалқӣ қабул гардид. Баъдтар, вобаста ба тағйир ёфтани вазъи сиёсиву ҷамъиятии мамлакат дар натиҷаи райпурсии умумихалқӣ – 26 сентябри соли 1999, 22 июни соли 2003 ва 22 майи соли 2016 ба Конститутсияи Ҷумҳурии Тоҷикистон тағийроту иловаҳо ворид карда шудаанд.
