Раҳим Саидзода, вазири маориф ва илми Тоҷикистон дар робита ба қатли Қобилҷон Алиев, навраси 10 солаи тоҷик дар мактабе дар вилояти Маскав ба Сергей Кравтсов, ҳамтои руси худ мактуб ирсол карда, онро “ҳамлаи хусумати миллидошта” унвон ва маҳкум кардааст. Ӯ аз вазири маорифи Русия хостааст, ки ин ҳодисаро дар ҳамкорӣ бо мақомоти марбутаи кишвараш “ҳамҷониба ва беғаразона” таҳқиқ кунад.
Вазири тоҷик дар номаи худ гуфтааст ки “ҳуқуқ ва қадру манзалати хонандагони тоҷик бояд дар ҳар гуна муҳити таълимӣ ба таври қатъӣ ҳифз карда шаванд”.
“Чунин ҳодисаҳо метавонанд аз ҷониби гурӯҳҳои ифротгаро ва миллатгарои радикалӣ бо мақсади тарғиб ва таҳрики содир намудани ҷиноятҳои нав истифода гарданд, ки ин бо арзишҳои бунёдии инсондӯстӣ, эҳтироми мутақобил ва принсипҳои таҳаммулпазирӣ комилан мухолиф аст”, – гуфтааст Раҳим Саидзода.
Қобилҷон Алиев рӯзи 16-уми декабр дар мактабе дар вилояти Маскав аз сӯйи навраси 15-сола ва шаҳрванди Русия бо корд ва бар пояи бадбинии миллӣ ба қатл расид. Гумонбар ба куштори ӯ боздошт ва барои ду моҳ ба ҳабси пешакӣ гирифта шудааст.
Ҷасади навраси тоҷикро дирӯз ба Тоҷикистон оварда, дар зодгоҳаш, ноҳияи Шаҳринав ба хок супурданд.
Бояд гуфт, дар пайи ин куштор чандин мақоми тоҷикитон ба ҳамтоёни руси худ занг зада, қазияро баррасӣ карданд. Аз ҷумла, Вазорати корҳои хориҷии Тоҷикистон сафири Русия дар кишварро даъват карда, нота супорид ва талаб кард, ки “тафтишоти фаврӣ, объективӣ ва беғаразонаи ин ҳодисаи фоҷиаборро анҷом диҳад ва ҳамаи шахсони дахлдорро тибқи қонун ба ҷавобгарӣ кашад”.
Рамазон Раҳимзода, вазири корҳои дохиллии Тоҷикистон дар як суҳбати телефонӣ аз ҳамтои русаш Владимир Колоколтсев хост, сабабу омилҳои ҳодисаи мазкур ҳамаҷониба санҷиш ва чораҷӯӣ карда шавад.
Юсуф Раҳмон, котиби Шӯрои амнияти Тоҷикистон ҳам дар суҳбати телефонӣ бо Сергей Шойгу, ҳамтои русаш куштори Қобилҷони Алиевро баррасӣ кардааст.
Ҳамчунин, Ваколатдори ҳуқуқи инсон дар Тоҷикистон ва роҳбари Кумитаи занон ва оилаи кишвар ҳам бо нашри изҳорот ин ҳодисаро маҳкум карданд.
Аз мақомоти расмии Русия танҳо ВКХ-и ин кишвар ба ин куштори бераҳмона вокуниш кард ва ба Тоҷикистону пайвандони кушташуда ҳамдардӣ изҳор намуд. Ҳамчунин изҳор дошт, ки ҷониби Русия барои таҳқиқи беғаразона ва холисона талош мекунад.
