Қаҳрамони асосии филми “Моҳӣ дар шаст” Абдулло Абдураҳимзодаи 10-сола (Далер) дар Синамоҷашнвораи байналмилалии Даккаи Бангола соҳиби ҷоизаи байналмилалии “Таҳсини вижа” гардидааст.
Дар ин бора аз “Довфилм” ба “Азия-Плюс” хабар дода, гуфтанд, ки ҷашнвора рӯзҳои 10-18-уми январ дар пойтахти Бангола баргузор шуд.
“Дар ҷашнвора 245 филм аз саросари олам ширкат дошт. Миёни онҳо Абдулло Абдураҳимзода, ки дар филми “Моҳӣ дар шаст” дар нақши Далерро бозӣ кард, таваҷҷӯҳи ҳакамони байналмилалиро ҷалб кард ва Ҷоизаи байналмилалии “Таҳсини вижа” насиби филми мо шуд”, – гуфтанд аз “Довфилм”.
Ба гуфтаи манбаъ, ин панҷумин ҷоизаи филми “Моҳӣ дар шаст” буда, то кунун филми мазкур дар синамоҷашнвораи миллии “Тоҷи Сомон” соҳиби Шоҳҷоиза, дар синамоҷашнвораи байналмилалии Исфаҳон соҳиби Ҷоизаи хосаи ҳакамон ва дар синамоҷашнвораи байналмилалии “Тоҷи Сомон” соҳиби ҷоизаҳои “Беҳтарин оҳангсоз” ва Шоҳҷоиза шуда буд.
Филми муштараки Тоҷикистону Эрон – “Моҳӣ дар шаст” бо коргардонии Муҳиддини Музаффар соли 2024 дар Тоҷикистон сабт гардида, садобардорӣ, танзим ва оҳангсозии он дар Эрон анҷом дода шудааст.
Дар филм ҳунарпешаҳои шинохтаи Тоҷикистон, Русия ва Эрон барои нақшофарӣ ҷалб карда шудаанд. Дар нақшҳои марказӣ Хуршед Мустафоев, Сайёра Сафарӣ, Абдулло Абдураҳимзода, Шаҳло Раҳимӣ, Исфандиёр Ғуломов, Моҳпайкар Ёрова, Асалбек Назриев ва Асланшо Раҳматуллоев ҳунарнамоӣ кардаанд.
Филм қиссаи писарбачаи 10-сола бо номи Далерро нақл мекунад, ки дар мактаб-интернат ба воя расидааст. Ӯ ҳамроҳи Самад, ки ба қиморбозӣ майл дорад, дар вақти таътил ба ҷустуҷӯи модари худ мебарояд. Ин сафар аз шимол то ҷануби Тоҷикистон тӯл кашида, қаҳрамононро бо рӯйдодҳои ғайриинтизор рӯ ба рӯ мекунад. Дар ниҳоят, Далер бояд қароре қабул кунад, ки масири зиндагии ӯро дигаргун месозад.
Ин филм аз чӣ нақл мекунад ва чаро онро бояд тамошо кард, муфассал дар матлаби зерини мо хонед: “Ҳафт далеле, ки филми "Моҳӣ дар шаст"-ро бояд дид”.
