Бозорҳои гандуму орд, шакар, равғани растанӣ ва тухму гӯшти паранда дар Тоҷикистон соли 2025 рақобатпазир боқӣ монда, аломатҳои зери инҳисор қарор гирифтанро зоҳир накарданд.
Чанде пеш зимни нишасти матбуотӣ дар Душанбе роҳбари Хадамоти зиддиинҳисории Тоҷикистон Ҳайдаралӣ Раҷабзода изҳор намуд, ки дар ин бозорҳо фаъолияти теъдоди назарраси ширкатҳо идома дорад, ки ба боқӣ мондани рақобати солим ва нигаҳдории нархҳо мусоидат мекунад.
Киҳо ба Тоҷикистон гандуму орд меоранд?
Ба иттилои роҳбари Хадамоти зиддиинҳисорӣ, соли гузашта 78 ширкат ба воридоти гандум ба кишвар машғул буданд.
Соли 2025 ба Тоҷикистон ба маблағи умумии 300,9 млн доллар 1 млн 278,4 ҳазор тонна гандум ворид карда шуда, дар ҳамин ҳол, нархи миёна то 235 доллар барои 1 тонна поин рафт.
Дар робита ба бозори орд бошад, соли 2025 ба интиқоли он 41 ширкат машғул шуданд, ки 4 субъект бештар нисбат ба соли пешин аст.
Таҳвилгарони асосӣ ширкатҳои «Дурахши Осиё», «Саҳад» ва «Тоҷ Тур» мебошанд.
Роҳбари Хадамот зикр кард, ки дар ҷумҳурӣ 693,8 ҳазор тонна орд истеҳсол шудааст, ки ба коҳиши вобастагӣ аз воридот ва нигаҳдории рақобат мусоидат менамояд.
Теъдоди таҳвилгарони шакар ва равған афзуд
Соли 2025 воридоти шакар (қанд) аз ҷониби 69 ширкат сурат гирифт, ки дар муқоиса бо соли пешин 19 ширкат зиёдтар аст.
Ба ҷумҳурӣ ба маблағи 117,5 млн доллар 191 ҳазор тонна шакар ворид карда шуд. Нархи миёнаи 1 тоннаи он 615 долларро ташкил дод, ки 34 доллар арзонтар нисбат ба як соли пешина мебошад.
Воридоти равғани растанӣ низ рақобатпазир боқӣ монд. Соли 2025 105 ширкат ба бозори равған роҳ ёфтанд.
Ба кишвар ба маблағи умумии 110,2 млн доллар 103,7 ҳазор тонна равған ворид карда шуд, ки 7,1% зиёдтар нисбат ба як соли пешин аст.
Қисмати бештари интиқоли равған ба Қазоқистон (85,1%) ва боқимонда – ба Русия (11,7%) ва дигар кишварҳо рост меояд.
Воридоти тухм ва гӯшти паранда хеле зиёд шуд
Соли 2025 дар Тоҷикистон 1,419 млрд дона тухм истеҳсол шуд, ки 12,1% зиёдтар дар муқоиса бо як соли пешин мебошад. Воридоти тухм ба андозаи 50,4% афзуда, 38,2 млн донаро ташкил дод ва дар ҳамин ҳол, 22 ширкат ба воридот машғул буданд. Воридоти гӯшти паранда 59,6% зиёд шуда, 12 268 тонна ба маблағи 46 млн долларро ташкил дод.
