Моҳи апрели соли 2026 дар кишвар болоравии нархи шакар (қанд) ба мушоҳида расид. Агар аввали моҳи март 1 кг шакар 9-11 сомонӣ нарх дошт, пас ҳоло он ба 12-14 сомонӣ расидааст. Нархи фурӯши яклухти он низ гарон шудааст: арзиши халтаи 50-килограммаи он аз 380-400 сомонӣ то ба беш аз 500 сомонӣ боло рафтааст.
Тоҷикистон шакарро қариб пурра аз хориҷа ворид мекунад. Соли 2025 ба ҷумҳурӣ ба маблағи зиёда аз 191 млн доллар беш аз 117,4 млн килограмм ин навъи маҳсулот ворид карда шудааст.
Ин маҳсулот асосан аз Русия, Беларус ва Ҳиндустон оварда мешавад: аз Русия қариб 52 ҳазор тонна, Беларус 28,2 ҳазор тонна ва Ҳиндустон 16,9 ҳазор тонна. Аз Покистон (9,5 ҳазор тонна) ва Қазоқистон (5,7 ҳазор тонна) низ миқдори назарраси маҳсулоти мазкур ворид шудааст.
Ҳамчунин аз Озарбойҷон, Эрон ва Ӯзбекистон низ ҳаҷми камтари шакар ворид мешавад. Миқдорҳои начандон зиёд аз Литва, Латвия, Туркия, Чин, Лаҳистон ва Қирғизистон низ оварда мешаванд.
Мавҷуд набудани истеҳсолоти худӣ, бозори шакарро дар ҷумҳурӣ ба омилҳои беруна вобаста мекунанд. Ҳама гуна тағйирот, аз ҷумла маҳдудияти содирот дар дигар кишварҳо, ивазшавии қурби асъор ё зиёдшавии хароҷот ба нақлиёт ба нархҳо таъсир мерасонад.
Тағйироти ба ин монанд аллакай қаблан, аз ҷумла дар пасманзари маҳдудияти содироти шакар аз Русия ва Қазоқистон ба мушоҳида расида буданд.
Вазъият дар бозори ҷаҳон низ таъсири иловагӣ мерасонад. Бино ба маълумоти Созмони кишоварзӣ ва озуқаворӣ (ФАО), моҳи марти соли 2026 нархи маҳслуоти хӯрокворӣ ба андозаи 2,4% афзуда, дар ҳамин ҳол шакар аз ҳама бештар – ба андозаи 7,2% гарон шудааст. Ин ба болоравии нарх ба нафт ва вазъияти ноустувори сиёсати ҷаҳонӣ, ки ба таҳвил ва истеҳсол таъсир мерасонад, вобаста аст.
Ба гуфтаи фурӯшандагон, агар вазъият тағйир наёбад, моҳҳои наздик низ нархи шакар гарон боқӣ мемонад.
Бояд гуфт, ки болоравии нархи шакар дар Тоҷикистон аллакай чандин сол ба назар мерасад. Агар давоми солҳои 2017-2019 арзиши 1 килограмми он ҳудуди 6-6,5 сомониро ташкил медод, пас дар соли 2020 нархи он якбора то 9 сомонӣ зиёд шуд.
Дар солҳои минбаъда нархҳои тадриҷан боло рафтанд: солҳои 2021-2022 – ба ҳисоби миёна то 9,5 сомонӣ, солҳои 2023-2025 – ҳудуди 10 сомонӣ барои 1 килограмм ва соли 2026 –ум 12 сомонӣ.
