Оҷонсии ҳавошиносии Тоҷикистон сокинони кишварро аз 4 рӯзи хокбориш (гарду ғубор) ва олудашавии ҳаво ҳушдор додааст.
Ин ниҳод рӯзи 13-уми апрел гуфт, ки рӯзҳои 15-16-уми апрел дар шаҳру ноҳияҳои ҷанубӣ ва марказии вилояти Хатлон, ноҳияҳои тобеи ҷумҳурӣ, шаҳри Душанбе ва рӯзҳои 17-18-уми апрел дар шаҳру ноҳияҳои шимолӣ ва марказии вилояти Суғд хокбориш рух медиҳад.
Дар пай ин хокбориш, ки ба гуфтаи Оҷонсӣ, аз минтақаҳои ҷанубу ғарбӣ ва шимолу ғарбӣ ба кишвар ворид мешавад, баланд шудани ҳолати олудагии ҳаво пешбинӣ мегардад. Ин ниҳод гуфтааст, ки рӯзи 15-уми апрел дар водиҳои ҷумҳурӣ пастшавии ҳарорати рӯзонаи ҳаво то 8-10º дар назар аст.
Мақомот ба сокинон тавсия додаанд, ки дар рӯзҳои мазкур аз сайругашти зиёди рӯзона дар хиёбону кӯчаҳо ва хусусан дар назди роҳҳои мошингард худдорӣ куннад.
Бояд гуфт, ҳавои ҷангу ғуборолуд ва хокборишҳо дар кишвар ба як ҳолати маъмулӣ табдил ёфта, сол аз сол бештар ба мушоҳида мерасанд. Коршиносон сабаби инро тағйирёбии иқлим ва ҳамчунин, бетаваҷҷуҳии мақомот ба унсурҳои пешгирикунандаи ҳавои ифлос, аз ҷумла буридани дарахтону сохтмони зиёди баландошёнаҳо медонанд.
Дар ҳамин ҳол мақомоти кишвар, радабандиҳои созмонҳио байналмилалӣ дар робита ба ифлос будани ҳаво дар Тоҷикистонро қабул надоранд. Аз ҷумла, чанде пеш, пажуҳишгоҳи “IQAir”, ки ба омӯзиши ҳамарӯзаи сифати ҳаво дар ҷаҳон машғул аст, дар як гузориши худ навишт, ки дар соли 2025 Тоҷикистонро аз лиҳози ифлосии ҳавои атмосферӣ бо нишондиҳандаи 57,3 мкг/м³ дар ҷаҳон дар ҷойи сеюм қарор дошт.
Вале Оҷонсии ҳавошиносии Тоҷикистон дар посух ба ин раданба гуфт, ки “раддабандии “IQAir”-ро наметавон нодида гирифт, аммо онро ҳамчун арзёбии пурраи сифати ҳаво дар тамоми қаламрави Тоҷикистон низ қабул кардан дуруст нест”. Ин ниҳод бо нашри як иттилоия гуфт, зарур аст, ки чунин баҳогузориҳо ба шарҳи мутавозин, аз лиҳози илмӣ асоснок ва касбӣ арзёбӣ шавад.
Дар маводи “Азия-Плюс” бо номи “Тоҷикистонро чангу ғубор фаро мегирад. Он чӣ хатар дорад ва барои пешгирӣ чӣ бояд кард?” метавонед дар таъсири чангу ғубор ба солимии инсон маълумот дарёфт кунед.
