Душанбе. 30-юми март. ОИ «Азия-Плюс» – Мувофиқи маълумоти Вазорати молияи ҷумҳурӣ аз 140 млн. сомонии соли гузашта ҷудогардида ба хоҷагиҳои пахтакор то имрӯз бонкҳо беш аз 40 млн. сомониашро пардохтаанд. Маблағ дар ҳаҷмҳои гуногун аз ҷониби «Агроинвестбонк», «Амонатбонк», «Тоҷиксодиротбонк ва «Тоҷпромбонк» ворид гардида, то ҳанӯз «Ориёнбонк» аз ин ҳисоб маблағе пардохт накардааст. Дар ин бора ба ОИ «Азия-Плюс» сардори департамент оид ба буҷаи Вазорати молияи ҶТ Нарзулло Ҳабибуллоев хабар дод.

Н.Ҳабибуллоев мегӯяд, феълан ҳукумат пешниҳоди бонкҳои тиҷоратиро бобати дароз кардани мӯҳлати қарзҳо, ки то 1-уми апрел муқаррар шудааст, мавриди барррасӣ қарор додааст.

Ёдрас мекунем, ки аввали моҳи март намояндагони «Агроинвестбонк», «Ориёнбонк» ва «Тоҷпромбонк» аз Вазорати молия дархост карданд, ки мӯҳлати пардохти қарзҳои аз ҷониби ҳукумат ҷудогардида дароз карда шавад.

Дар ҳамин ҳол, аз худи бонкҳо мегӯянд, ки маблағи пардохтшуда ба Вазорати молия айни замон 46 млн. сомониро ташкил медиҳад.

Ҳамин тариқ, дар шӯъбаи маълумоту таҳлилии «Амонатбонк» гуфтанд, ба вазорат 20 млн. сомонӣ пардохтаанд, яъне 50 дарсади қарзро ҳисоббаробарӣ намудаанд.

Дар «Тоҷиксодиротбонк» изҳор доштанд, ки ҳанӯз ахири соли гузашта қарзи вазорати молия дар ҳаҷми 10 млн. сомонӣ барои хоҷагихои пахьакорро бо фоизҳояш пурра пардохт кардаанд.

Раиси раёсати «Тоҷпромбонк» Ҷамшед Зиёев зикр намуд, ки бонк аз 5 млн. сомонӣ воситаҳои барои қарз ҷудокардаи ҳукумат 2,1 млн. сомониашро баргардонидааст.

Ба «Ориёнбонк» бо ин мақсад соли гузашта вазорати молия 35 млн. сомонӣ маблағ ҷудо карда буд, вале муяссар нагардид, ки дар ин бора маълумоте дастрас гардад.

Душанбе. 30-юми март. ОИ «Азия-Плюс» –

  

Бисту ҳафтуми март 150 нафар намояндагони Ҳукумати Тоҷикистон, ҷомеаи донорон, соҳибкорони маҳаллию байналмиллалӣ ва созмонҳои ҷомеаи шаҳрвандӣ барои таҷлили 15-умин солгарди фаъолияти Оҷонсии ИМА оид ба рушди байналмиллалӣ (ЮСАИД) дар Тоҷикистон дар Душанбе ҷамъ омаданд.

 

Дар сухани ифтитоҳии худ сафири ИМА хонум Ҷейкобсон қайд кард, ки «ЮСАИД оҷонсии асосие мебошад, ки тавассути он Иёлоти Муттаҳидаи Амрико тӯли 15 соли охир ба Тоҷикистон кӯмак мерасонад».

   

Дар рафти маросими таҷлил рушду нумӯи Тоҷикистон тайи 15 соли охир, ки ба он ЮСАИД низ саҳми арзандаи худро гузоштааст, мавриди қайд қарор гирифт. Меҳмонон аз намоишгоҳи лоиҳаҳои ЮСАИД дар Тоҷикистон дидан карданд. Намояндагони созмонҳои баҳрабардор оиди ҳамкориҳои худ бо ЮСАИД баҳри ноил шудан ба ҳадафҳои стратегии Тоҷикистон нақл карданд. Дар ин бора аз сафорати ИМА дар Тоҷикистон хабар доданд.

   

Душанбе. 30-юми март. ОИ «Азия-Плюс» – Ғиёсиддин Мироҷев президенти нави Ҷамъияти Ҳилоли Аҳмари Тоҷикистон интихоб гардид.

Чӣ тавре ки корманди бахши иттилооти ҶҲАТ Сайидо Назаров ба ОИ «Азия-Плюс» хабар дод, дар Анҷумани ғайринавбатии ҷамъият, ки рӯзи 28-уми март баргузор шуд, тавассути райъдиҳии кушод намояндаи ташкилоти ибтидоии шӯъбаи ҶХАТ дар Бадахшон, директори пажӯҳишгоҳи гастроэнтерологии ҶТ, академик Ғиёсиддин Мироҷев бо аксари кулли оро президенти ҷамъият интихоб карда шуд.

Ба гуфтаи С.Назаров, худи ҳамин рӯз ҷаласаи нахустини Пленуми нави ҷамъият баргузор шуда, бо пешниҳоди президенти тозаинтихоб намояндаи ҶҲАТ дар пойтахт Зайнурамо Одинаева ноиби президент интихоб шуд. Номзадии Зафар Муҳаббатов бори дигар ба мансаби дабири кулли ҷамъият тасдиқ карда шуд.

Душанбе. 28-уми март. ОИ «Азия-Плюс» – Чаҳор шаҳрванди Тоҷикистон ҳангоми кӯшиши интиқоли маводи мухаддир аз Афғонистон ба ҷумҳурӣ дастгир шуданд.

Чӣ тавре ки аз Сарраёсати нерӯҳои марзбонии Кумитаи давлатии амнияти миллӣ ба ОИ «Азия-Плюс» хабар доданд, чанде қабл дар қитъаи гурӯҳи сарҳадии «Ишкошим» марзбонон чаҳор нафар шаҳрванди аз 20 то 29-солаи Тоҷикистонро бо ду халтаи маводи мухаддири гурӯҳи каннабис , ки 43 кило вазн дошт, боздошт намудаанд. Аз рӯи ин далел парвандаи ҷиноӣ боз гардида, тафтишот идома дорад.

Бояд гуфт, дар зарфи ду моҳи соли ҷорӣ кормандони мақомоти ҳифзи ҳуқуқи ҷумҳурӣ беш аз 800 кило маводи мухаддирро мусодира карданд.