Душанбе. 5-уми март. ОИ «Азия-Плюс» – Хазинаи байнулмилалии асъор даъват мекунад, ҷиҳати пешгирии оқибатҳои ногувори марҳилаи саввуми бӯҳрони ҷаҳонии молӣ, ки акнун ба кишварҳои қашшоқ, аз ҷумла Тоҷикистон таъсир мерасонад, чораҳои таъхирнопазир андешида шавад. Дар ин бора дар иттилоияи чанде қабл интишоргаштаи ХБА хабар дода мешавад.

           

Дар робита ба интишори гузориши нави ХБА «Оқибатҳои бӯҳрони молӣ ба кишварҳои даромадашон паст» намояндаи мақомоти раҳбарии Хазина Доминик Стросс Канн изҳор доштааст, ки акнун марҳилаи саввуми бӯҳрони молӣ ба кишварҳои қашшоқ асар хоҳад гузошт ва аз давлатҳои мададрасон даъват ба амал овардааст, ки баҳри пешгирии оқибатҳои ногувори бӯҳрон ва аз даст надодани дастовардҳои ба мушкилӣ ноилгардидаи ин кишварҳои осебпазир кӯмаки таъҷилӣ расонида шавад.

           

Ба гуфтаи ӯ, таҳқиқоти доирнамудаи ХБА имкон фароҳам сохтааст беш аз 20 кишвари қашшоқи махсусан осебпазир муайян карда шавад ва ба кишварҳои мавриди зарари бештар қароргирифта соли равон бояд ҳадди аққал 25 млрд. доллари ИМА маблағгузорӣ карда шавад. Номбурда таъкид сохтааст, ки кишварҳои мададрасонро зарур аст, ҳаҷми маблағҳои кӯмакро афзоиш диҳанд, зеро коҳиши ҳаҷми кӯмакҳо ба вазъи суботи сиёсиву иҷтимоии кишварҳои даромадашон паст таъсири манфӣ гузошта метавонад.

           

Душанбе. 5-уми март. ОИ «Азия-Плюс» – ҶСК «Тоҷиктрансгаз» як қисми маблағи қарзи «Узтрансгаз»-ро пардохт намуд.

           

Тавре директори генералии ҶСК «Тоҷиктрансгаз» Саидмаҳмад Шарофиддинов ба ОИ «Азия-Плюс» хабар дод, корхона як қисмате аз маблағи қарзро, ки 4,5 млн. доллари ИМА-ро ташкил медиҳад, ба «Узтрансгаз» пардохт кардааст.

           

С.Шарофиддинов мегӯяд, айни замон қарзи корхона дар назди ширкати Ӯзбекистон барои истифодаи газ ба 14 млн. доллари амрикоӣ баробар аст. «Корхонаҳои бузурги кишвар қарзҳои моро пардохт намуданд ва ба мо муяссар шуд, ки қисми қарзи ширкати кишвари ҳамсояро низ ҳисоббаробарӣ созем», – гуфт вай.

           

Дар мавриди интиқоли газ ба ҷумҳурӣ директори генералии корхона зикр намуд, ки феълан дар як шабонарӯз ба кишвар 850-900 ҳазор метри мукааб газ ворид гардида, он ба аҳолӣ ва корхонаҳои «Талко» ва «Тоҷиксемент» интиқол дода мешавад. Бино ба иттилои манбаъ, бар асари норасоии сӯзишворӣ ҶСК «Тоҷиказот» аз фаъолият бозмондааст.

           

Душанбе. 5-уми март. ОИ «Азия-Плюс» – Мақомоти раҳбарии ҶСК «Агроинвестбонк» имрӯз унвонии ҳукумати кишвар мактуб ирсол намуда, дархост хоҳад намуд, ки мӯҳлати пардохти қарзҳои ҳукуматӣ, ки соли гузашта тавассути ин бонк ба хоҷагиҳои деҳқонии пахтакор ҷудо гардида буд, дароз карда шавад.

           

Тавре директори департаменти таҳлилии бонк Ҷалил Таваккалов ба ОИ «Азия-Плюс» хабар дод, иқдоми мазкур ба он хотир сурат мегирад, ки аксари хоҷагиҳои деҳқонии вилоятҳои Суғду Хатлон бар асари коҳиши арзиши нахи пахта дар бозори ҷаҳонӣ дар фурӯши маҳсулоти худ ба душворӣ мувоҷеҳанд ва қодир нестанд, ки то 1-уми апрел қарзро пурра пардохт намоянд.

           

Ба гуфтаи ӯ, дар робита ба ин масъала барои ҷамъоварии маблағи боқимондаи қарз, ба тавозуни бонк гузаронидани гувоҳномаи истифодаи замин ва амволи ба гарав гузоштаи хоҷагиҳо ва ташкили фурӯши он ба бонк вақти муайяне зарур аст. «Аз ин рӯ, бонк аз ҳукумат дархост хоҳад намуд, ки мӯҳлати пардохти қарзҳо то ахири сол дароз карда шавад», – гуфт ӯ.

           

Ҷ.Таваккалов мегӯяд, аз 50 млн. сомонӣ қарзи Вазорати молия, ки соли гузашта тавассути бонк ба хоҷагиҳо ҷудо гардида буд, то имрӯз 14 млн. сомониаш баргардонида шуд. «Дар маҷмӯъ бошад, айни замон хоҷагиҳои деҳқонии кишвар дар назди бонк ба маблағи 96 млн. сомонӣ қарздоранд, ки 60 млн. сомониаш воситаҳои бонк мебошанд», – афзуд вай.

           

Душанбе. 4-уми март. ОИ «Азия-Плюс» – Нахустшумораи аввалин ҳафтаномаи тоҷикии варзишии «Гол», сеюмин нашрияи Маркази тадқиқотии журналистии Тоҷикистон аз чоп баромад.

Тавре аз

 

Маркази тадқиқотии журналистии Тоҷикистон ба ОИ «Азия-Плюс» хабар доданд, аҳли эҷоди ҳафтанома дар шумораи аввали худ ба мавзӯъҳои доғи варзишӣ равшанӣ андохта, мушкилиҳои ҷиддии соҳаи варзишро ба риштаи таҳлил кашидаанд.

Дар навиштаи Хуршед Атовулло «Зидан ва Марадона дар Душанбе. Кӣ омадани онҳоро намехоҳад?» сабабҳои рушд наёфтани футбол дар Тоҷикистон бо далелҳои возеҳ шарҳ ёфтааст.

 

Муаллиф бо ин навиштаи худ чунин ақида дорад, ки тақдири футболи тоҷик ба мисли сарнавишти «Роғун» танҳо ва танҳо ба худи мо вобаста аст.

Зери сарлавҳаи «Тоҷикистон пас аз Бразилия» маводе ба табъ расидааст, ки аз дастоварди мушкилиҳои футболи кӯдакон маълумот медиҳад. Ҳамчунин, шарҳи муфассал перомуни иштироки дастаи мунтахаби наврасон ва ҷавонони Тоҷикистонро дар чемпионати Осиё-2010, охирин навигариҳои олами варзиши дохиливу хориҷиро дар ин шумора метавонед мутолиа кунед.

 


 

Душанбе. 4-уми март. ОИ «Азия-Плюс» – Чаҳор олими ҷавони Тоҷикистон барои пажӯҳишу дастовардҳо дар соҳаи илм соҳиби диплом ва мукофотпулии Акдемияи улуми ҷумҳурӣ «Олими ҷавон» ба маблағи 1 ҳазор сомонӣ мегарданд.

Тавре корманди канселярияи академия Пирмаҳмад Нуров ба ОИ «Азия-Плюс» хабар дод, маросими супурдани диплом ва мукофотпулиҳо рӯзи 6-уми март дар ҷаласаи умумии Академияи улуми ҶТ баргузор мешавад. Дипломҳоро президенти академия Мамадшо Илолов тақдим хоҳад намуд.

Ба гуфтаи П.Нуров, дар ҷаласа ҳамчунин аз корҳои илмӣ-тадқиқотии доиргашта др соли гузашта натиҷагирӣ шуда, вазифаҳои барои соли 2009 муайян карда мешаванд.

Душанбе. 4-уми март. ОИ «Азия-Плюс» – Имрӯз ҳайати ширкати давлатии ҳавопаймоии Тоҷикистон ҷиҳати барррасии масъалаи барқарор сохтани хатсайри ҳавоӣ миёни Тоҷикистону Ӯзбекистон озими шаҳри Тошканд гардид.

Тавре сухангӯи ширкати ҳавопаймоии «Тоҷик Эйр» Назира Давлатова ба ОИ «Азия-Плюс» хабар дод, ширкати ҳавопаймоии кишвари ҳамсоя аз ҳайати Тоҷикистон даъват ба амал овардааст, ки дар гуфтушунид оид ба масъалаи ташкил намудани хатсайри ҳавоӣ миёни кишварҳо ширкат варзад.

Н.Давлатова мегӯяд, натиҷаҳои гуфтушунид дар Тошканд чанде баъдтар маълум хоҳанд шуд.

Ёдрас мекунем, ки хатсайри ҳавоӣ миёни Тоҷикистону Ӯзбекистон ҳанӯз соли 1992 қатъ гардида буд.