Душанбе. 19-уми август. ОИ «Азия-Плюс» – Дар пешорӯи баргузории нишасти сарони кишварҳои узви Созмони Ҳамкории Шанхай (СҲШ) дар Тоҷикистон ҷаласаи раёсати Шӯрои корӣ ва Шӯрои ҳамкории байнибонкии ин созмон доир мегардад.

Аз Палатаи савдо ва саноати Тоҷикистон ба хабарнигори ОИ «Азия-Плюс» иттилоъ доданд, ки ҷаласаи корӣ 26-уми август дар Душанбе баргузор шуда, дар он масоили амнияти энергетикӣ ва ғизоӣ, рушди бахши сайёҳӣ ва мушкилоти соҳаи кишоварзӣ мавриди баррасӣ қарор хоҳанд гирифт. Дар ҷаласа Тоҷикистонро ҳайати кишвар таҳти роҳбарии раиси қисми миллии Шӯрои кории СҲШ, раиси Палатаи савдо ва саноати Тоҷикистон Шариф Саид роҳбарӣ мекунад.

Дар ҳамин ҳол, аз Бонки давлатии амонатгузории Тоҷикистон «Амонатбонк» хабар доданд, ки аз 24 то 27 август дар шаҳри Хуҷанд Маҷлиси 4-уми Иттиҳодияи байнибонкии СҲШ баргузор мегардад. Дар маҷлис намояндагони бонкҳои кишварҳои узви созмон масъалаҳои ҳамкории бонкҳоро баррасӣ хоҳанд кард.

Душанбе. 19-уми август. ОИ «Азия-Плюс» – Дар самти Шӯроободи сарҳади Тоҷикистону Афғонистон марзбонони тоҷик қочоқи маводи мухаддир аз Афғонистонро пешгирӣ карданд.

Сардори дафтари матбуоти Саридораи нерӯҳои марзбонии Кумитаи давлатии амнияти миллии ҷумҳурӣ подполковник Хушнуд Раҳматуллоев ба ОИ «Азия-Плюс» хабар дод, ки ҳангоми задухӯрд як шаҳрванди Афғонистон ба ҳалокат расидааст. Мувофиқи маълумоти мавҷуда, гурӯҳи қочоқчиёни афғонро Наим валади Назар роҳбарӣ мекардааст.

Бино ба иттилои манбаъ, дар ҷои ҳодиса 3 халта маводи бангдона ва 12 бастаи афюн дарёфт ва мусодира карда шудааст. Дар байни марзбонон касе осеб надидааст.

Душанбе. 18-уми август. ОИ «Азия-Плюс» – Раиси Ҳизби Сотсиал-Демократии Тоҷикистон (ҲСДТ) Раҳматилло Зойиров изҳор дошт, ки дар Вилояти Мухтори Кӯҳистони Бадахшон (ВМКБ) ба баргузории конфронси ҳисоботиву интихоботии ҲСДТ монеъа эҷод карданд. Мавсуф изҳор дошт, ки барои аввалин бор ҳизб тасмим гирифт, дар ҳамбастагӣ бо мақомоти маҳаллии ҳокимияти давлатӣ чорабинӣ доир созад ва роҳбари бахши вилоятии ҳизб Алим Шерзамонов ҳанӯз ахири моҳи июл ба ҳокимияти маҳаллӣ муроҷиат карда буд, ки бо ин мақсад толори баргузории конфронсҳои мақомоти шаҳрдориро ба ихтиёри онҳо диҳанд.

«Дар оғоз муовини раиси вилоят Муҳаббатшо Рӯзадоров розӣ шуд, ки ба ин кор мусоидат хоҳад кард, аммо баъдтар ҳамеша «пагоҳ ҳал мекунем» гӯён аз мо худро дур мегирифт ва рӯзи охир бошад, тамоман аз баргузории конфронс даст кашид», – гуфт Р.Зойиров. Ҳамроҳи Р.Зойиров ҳамчунин се нафар аъзои Шӯрои сиёсии ҲСДТ низ ба шаҳри Хоруғ омада буданд.

Ба қавли ӯ, қарор шудааст, ки конфронс дар дигар ҷо гузаронида шавад, вале «мақомоти ҳокимияти маҳаллӣ ва бахусус кормандони кумитаи давлатии амнияти миллии ҷумҳурӣ дар ВМКБ фаъолона фазои номақбулро барои баргузории конфронс ба вуҷуд меоварданд».

«Бо вуҷуди ин конфронс муваффақона доир гашт, танҳо дар толори дигар ва ду соат дертар аз вақти муқарраргардида», – баён дошт раиси ҳизб.

Алим Шерзамонов бори дигар раиси бахши вилоятии ҲСДТ интихоб гардид. Дар конфронс ҳадаф ва вазифаҳои ҳизб дар солҳои наздик дар вилоят ва дурнамои стратегияи ширкати ҲСДТ дар интихоботи ояндаи порлумонии соли 2010 низ баррас


ӣ


шуд.

Душанбе. 18-уми август. ОИ «Азия-Плюс» – Қазоқистон аз 1-уми сентябр манъи содироти зироати ғалладонаро бекор мекунад. Қобили зикр аст, ки ба Тоҷикистон аз ин кишвар беш аз 90 фоиз зироати ғалладона ворид мегардад. Дар ин бора бо истинод ба сарвазири Қазоқистон Карим Масимов хабаргузории «Казахстан. Сегодня» иттилоъ медиҳад. Дар машварати бахшида ба масоили танзими бозори зироати ғалладона ва таъмини амнияти ғизоӣ К.Масимов изҳор доштааст, ки «агар мо талаботи дохилии кишвари худро бо ғалла таъмин карда тавонем, минбаъд манъи содироти онро ҷорӣ нахоҳем сохт».

Сарвазири кишвари ҳамсоя ҳамчунин таъкид сохт, ки арзиши зироати ғалладона бояд таҳти назорат бошад ва ба баландшавии нархҳо набояд роҳ дод.

Қобили ёдоварист, ки в


азири рушди иқтисод ва савдои Ҷумҳурии Тоҷикистон Ғуломҷон Бобозода дар нишасти матбуотӣ изҳор дошт, ки дар Тоҷикистон зироати ғалладона ба миқдори кофӣ захира шудааст ва ҷумҳурӣ минбаъд бо мушкилоти таъмини орд мувоҷеҳ нахоҳад гашт.

 

«Ҳарчанд дар шимоли кишвар ба иллати камобиву хушкии имсола ҳосили дилхоҳ ба даст наомада бошад ҳам, дар манотиқи дигари кишвар ҳосили зироати ғалладона хуб аст», – гуфт ӯ ва афзуд ки истеҳсоли зироати ғалладона дар қиёс бо ҳамин давраи соли гузашта афзудааст.

Вазир гуфт, ҳукумати кишвар ҷиҳати ҷилавгирӣ аз норасоии орд дар бозори дохилӣ ва афзоиши захоири давлатии зироати ғалладона маблағгузориро аз воситаҳои буҷавӣ зиёд кард.

Ба гуфтаи вазир, вазорат ба парлумони кишвар лоиҳаи қонунеро ирсол кардааст, ки дар он аз 20 то 10 дарсад коҳиш додани андоз аз арзиши изофа барои воридоти зироати ғалладона ба кишвар пешниҳод шудааст.

«Кам кардани андоз аз арзиши изофа яке аз омилҳоест, ки ба коҳиши нарх дар бозори дохилӣ мусоидат менамояд», – гуфт Ғ.Бобозода ва афзуд, ки айни замон нархи чунин маҳсулот мӯътадил нигоҳ дошта мешавад.

Душанбе. 18-уми август. ОИ «Азия-Плюс» – Чанде қабл раиси ширкати саҳомии холдинги кушодаи (ШСХК) «Барқи тоҷик» Шарифхон Самиев даҳ нафар донишҷӯёни тоҷики факултаи энергетикаи Донишкадаи политехники шаҳри Харков ва Донишгоҳи миллии Украинаро ба ҳузур пазируфт.

Сухангӯи ширкат Нозир Ёдгорӣ ба ОИ «Азия-Плюс» иттилоъ дод, ки раиси ширкат ба донишҷӯён хониши аълову комёбиҳо орзу намуда, таъкид сохтааст, ки «ояндаи соҳаи энергетикаи Тоҷикистон ба шумо вобаста аст».

Зикр гардид, ки ин гурӯҳи дуввум аст, ки ширкат барои таҳсил ба макотиби олии Украина равона месозад. Айни замон дар ин кишвар 11 нафар донишҷӯён аз Тоҷикистон дар курси дуввум мехонанд. Ба иттилои манбаъ, тамоми хароҷоти таҳсил ва арзиши роҳкиро барои як бор дар як сол аз ҷониби ширкат пардохта мешавад.

«Дар Донишкадаи политехникии Харков таҳсил намудани донишҷӯёни тоҷик бесабаб нест, зеро маҳз дар корхонаҳои ин шаҳр бо фармоиши ширкат чархаҳои кории нерӯгоҳи «Норак» тайёр карда мешаванд», – гуфт Н.Ёдгорӣ ва афзуд, ки ширкат таҳсили 490 нафар донишҷӯёнро дар дохил ва хориҷи кишвар бо маблағ таъмин мекунад.