Душанбе. 7-уми июл. ОИ «Азия-Плюс» – Дар беморхонаҳои марказии вилояти Суғду Хатлон китобхонаҳои адабиёти тиббӣ ташкил дода мешаванд.

             

Ҳамоҳангсози робита бо ҷомеаи Маркази татбиқи лоиҳаҳои соҳаи тандурустии ҶТ Наргис Қосимова иттилоъ дод, ки бо дастгирии Лоиҳаи тандурустии бунёдӣ ва ҷамъиятӣ тавассути бурси Бонки ҷаҳонӣ ба маблағи 33 ҳазор доллари амрикоӣ беш аз 1,1 ҳазор нусха китобҳои адабиёти тиббӣ дастрас гардид.

           

Бино ба иттилои манбаъ, дар беморхонаҳои марказии ноҳияҳои Ашт ва Спитамени вилояти Суғд, шаҳрҳои Нораку Сарбанд ва ноҳияҳои Қабодиёну Шӯроободи вилояти Хатлон китобхонаҳои дорои адабиёти замонавии тиббӣ ифтитоҳ мегарданд.

           

«Беморхонаҳо 140-160 нусхагӣ китоб мегиранд. Кормандони тиб имкон пайдо мекунанд, ки бо навгониҳои охирин дар соҳа огаҳӣ пайдо намуда, сатҳи дониши касбии худ ва ба ин васила беҳтар сохтани малакаҳои кӯмаки тиббиро ба аҳолӣ баланд бардоранд», – изҳор дошт Н.Қосимова ва афзуд, ки китобҳои мазкур хазинаи китобхонаҳои тибби оилавии ҷумҳуриро ғанӣ месозанд.

Душанбе. 7-уми июл. ОИ «Азия-Плюс» – Дар пойтахти Тоҷикистон шумораи нахустини ҳафтаномаи «Боргоҳи сухан» ба табъ расид.

Сармуҳаррири ҳафтанома Мирзомаҳмуд Мирбобозода изҳор дошт, ки ҳафтаномаи нав нашрияи иҷтимоиву фарҳангӣ буда, барои мардуми форсизабони ҷаҳон пешбинӣ шудааст.

Маркази фарҳангии «Боргоҳи сухан» муассиси рӯзнома аст. Ба ҳайати мушовирони он шоирон Мӯъмин Қаноат, Фарзона, академик Муҳаммадҷон Шакурӣ, профессорон Абдунабӣ Сатторзода ва Худоӣ Шариф, сафири Эрон дар Тоҷикистон Алиасғар Амир Шеърдӯст, мушовири фарҳангии сафорати Афғонистон дар Тоҷикистон Ғуломҳасан Ҳазратӣ ва роҳбари Маркази фарҳангии «Боргоҳи сухан» Бӯрӣ Карим аъзо мебошанд.

Маводи ҳафтанома бо ҳуруфи

 

кириллӣ ва арабӣ чоп мешаванд.

Дар шумораи нахустини он, ки бо теъдоди 3 ҳазор нашр шудааст, роҷеъ ба ҷашни 1150-умин солгарди асосгузори адабиёти классикии форсу тоҷик Абӯабдулло Рӯдакӣ, Намоишгоҳи байнулмилалии китоб дар шаҳри Теҳрон ва ташрифи барандаи ҷоизаи «Ясная поляна» барои романи беҳтарини Русия, нависанда Тимур Зулфиқоров мақолаву гузоришҳо ба табъ расидаанд.

Душанбе. 7-уми июл. ОИ «Азия-Плюс» – Охири ҳафтаи гузашта дар шаҳри Душанбе мулоқоти раиси шаҳри Душанбе Маҳмадсаид Убайдуллоев бо мудири кулли Ҷамъияти саҳомии шакли пӯшидаи «Зарубежнефтегаз»-и ширкати русиягии «Газпром» Валерий Гулев доир гардид.

Сухангӯи раиси шаҳр Шавкат Саидов ба ОИ «Азия-Плюс» изҳор дошт, ки М.Убайдуллоев аз фаъолияти ширкат дар ҷустуҷӯи конҳои гази Тоҷикистон қаноатмандӣ кард. Ӯ боварии худро изҳор намуд, ки ширкат метавонад дар зарфи 9 соли амалисозии лоиҳа талаботи Тоҷикистонро бо газ таъмин созад.

               

Бино ба иттилои манбаъ, В.Гулев мири пойтахтро бо ҷараёни корҳо дар чаҳор кон шинос намуда, масъалаи сохтмони намояндагии «Газпром» дар шаҳри Душанбе ва иштироки ширкат дар татбиқи лоиҳаҳои соҳаи иҷтимоӣ дар пойтахтро зарур донист.

               

«Раиси шаҳри Душанбе бо дарназардошти тавоноии молияии ширкати русиягӣ пешниҳод сохт, ки «Газпром» дар бунёди нерӯгоҳҳои обию барқии ҶТ ва сохтмони манзилгоҳ сармоягузорӣ намуда, таъмини Тоҷикистон бо гази моеъ ва тарзи истифодаи бехавфи он дар нақлиёти ҷамъиятиро ҷорӣ кунад», – идома дод Ш.Саидов.

               

М.Убайдуллоев изҳор дошт, ки мақомоти шаҳрдорӣ омода аст, масъалаи ҷудо кардани қитъаи замин барои сохтмони намояндагии ширкати «Газпром»-ро муҳокима намояд ва ҷиҳати иштироки ширкат дар лоиҳаҳои соҳаи иҷтимоӣ бунёди мактаби таълим бо забони русиро пешниҳод сохт.

Хуҷанд. 7-уми июл. ОИ «Аия-Плюс» – Бо мақсади густариши ҳамкориҳои тиҷоратии Тоҷикистону Русия қарор шудааст, дар вилояти Суғд Қабулгоҳи ҷамъиятии Намояндагии савдои Русия дар ҶТ ифтитоҳ гардад. Намояндаи ваколатдори он Азимбой Азизов таъин шудааст.

Аз консулгарии кулли Русия дар Хуҷанд хабар доданд, ки намояндаи ваколатдор муносиботи ҳамкории мутақобилаи доираҳои тиҷоратии Тоҷикистону Русияро ҳамаҷониба дастгирӣ намуда, ба соҳибкорони рус дар интихоби шарикон дар Тоҷикистон кӯмак хоҳад кард.

«Ҳамчунин ӯ ба афзоиши мубодилаи мол миёни кишварҳо, рушди минбаъдаи ҳамкориҳои минтақавии Русияву Тоҷикистон ва амалисозии лоиҳааҳои байниминтақавии сармоягузории давлатҳо низ мусоидат хоҳад кард», – идома доданд дар консулгарӣ. – Барпо сохтан ва ба роҳ мондани фаъолияти корхонаҳои муштарак, таъмини бозорҳои Тоҷикистон бо моли Русия, интиқоли маҳсулоти кишоварзии Тоҷикистон ба минтақаҳои Русия ва пешниҳоди хизматрасониҳои машваративу иттилоотӣ ба соҳибкорони ҳарду кишвар низ аз вазифаҳои афзалиятноки намояндаи масъул шуморида мешаванд».

Сарчашма инчунин зикр кард, ки дар робита ба омодагии баргузории Форуми саввуми байнипарлумонии «Тоҷикистон-Русия: имконоти ҳамкории байниминтақавӣ» ба намояндаи ваколатдор супориш дода мешавад, ки дар кори ҳамоҳангсозии он аз ҷониби Русия ба гурӯҳи тадорукот ёрӣ расонад.

Душанбе. 7-уми июл. ОИ «Азия-Плюс»-«Помир-Медиа» – Дар шаш моҳи соли ҷорӣ дар Вилояти Мухтори Кӯҳистони Бадахшон шумораи беморони дил афзудааст.

Ба гуфтаи сарпизишки маркази касалиҳои дил Авазбек Қудратбеков, тайи шаш моҳи соли равон дар маркази касалиҳои дил 950 нафар

 

беморон табобат гирифтаанд, ки ин назар ба ҳамин давраи соли гузашта бештар аз 100 нафар зиёдтар аст.

Тибқи иттилои манбаъ, афзоиши бемориҳои дил дар минтақа ба таъсири омилҳои иҷтимоиву иқтисодӣ ва иқлимӣ вобаста будааст.

«Шумораи бештари бемороне, ки ба

 

Маркази касалиҳои дил муроҷиат мекунанд, фишори хунащон хеле баланд аст», – афзуд А.Қудратбеков.

Душанбе. 7-уми июл. ОИ «Азия-Плюс»-«Помир медиа» – Дар Хоруғ се хонаводаро аз манзилҳояшон берун мекунанд.

Бино ба гуфтаи муовини аввали мири шаҳри Хоруғ Абдулло Худобердиев бунёди маркази ҷавонон дар маркази вилоят бардоштани ин манзилҳоро тақозо дорад. Вай ҳамчунин баён дошт, ки арзиши манзил барои соҳибонашон ҷуброн мешавад ва онҳо метавонанд бо маблағи ҷудошуда барояшон хона созанд.

Аммо худи сокинон мегӯянд, ки онҳо бовар надоранд, барояшон арзиши баробар бо арзиши манозиле, ки аз он ҷо берун афканда мешаванд, дода мешавад.

«Мақомот ваъда медиҳад, ки барои мо дар навбати аввал хона ҷудо мекунад, аммо дар шаҳр сохтмони манзилҳои истиқоматӣ дар нақша нест ва ба ин ваъда бовар намудан душвор аст»,- изҳор дошт яке аз истиқоматкунандагони ин хонаҳо Бахтибек Асалбеков