Тоҷикистон дар раддабандии ҷаҳонии SCImago дар мавриди тадқиқоти илмӣ 10 зина поёнтар аз Афғонистон аст, ки ин вазъ ниҳоди ваколатдори давлатиро нигарон кардааст. Комиссияи олии аттестатсионӣ (КОА) аз муҳаққиқони тоҷик талаб дорад, ки мақолаҳои илмии худро бештар дар маҷаллаҳои тақризшавандаи ҷаҳонӣ чоп кунанд, то мавқеи кишвар дар ин самт тақвият ёбад.

Сайфиддин Давлатзода, раиси Комиссияи олии аттестатсионӣ (КОА) рӯзи 28-уми январ зимни нишасти хабарӣ гуфт, Тоҷикистон дар раддабандии SCImago миёни 33 кишвари Осиё мақоми 27-ум ва миёни ҳама кишварҳои ҷаҳон мақоми 164-умро соҳиб шудааст. Вале дар сомонаи расмии scimagojr.com мо мушоҳида кардем, ки Тоҷикистон миёни ҳамаи кишварҳои ҷаҳон дар зинаи 147-ум қарор дорад.

Давлатзода бо нигаронӣ гуфт, ки Тоҷикистон миёни кишварҳои Осиё пас аз Афғонистон қарор дорад. Дар раддабандии SCImago, ки мо аз сомонаи расмиаш дидем, Тоҷикистон миёни кишварҳои Осиё як зина ва миёни ҳама кишварҳои ҷаҳон 10 зина баъд аз Афғонистон аст.

Миёни кишварҳои Осиё: Афғонистон дар мақоми 26 ва Тоҷикистон дар мақоми 27-ум қарор дорад;

Миёни кишварҳои ҷаҳон: Афғонистон дар мақоми 137 ва Тоҷикистон дар ҷойи 147 қарор дорад.

“Мо миёни кишварҳои Осиё пас аз Афғонистон қарор дорем. Ман чанд бор дар доираи олимони кишвар ба ин мавзӯъ тамаркуз кардам. Ҳамчун олим шарм медорам: бо вуҷуди ин қадар таваҷҷӯҳи давлату ҳукумат барои соҳаи илм, аз як давлате, ки ним аср боз дар он ҷанг аст, ҷойгоҳи мо пасттар аст. Албатта, кам кас мегӯяд, ки айбдор аст. Ман худамро айбдор ҳис мекунам. Барои он ки мо натавонистем, аққалан, аз давлатҳое, ки дар ҷанг қарор доранд, пештар истем”, – гуфт раиси Комиссияи олии аттестатсионӣ. ​

Сайфиддин Давлатзода гуфт, ки “сабаби аслӣ дар он аст, мо мақолаҳои илмиро дар маҷаллаҳои байналмилалии бонуфуз нашр намекунем ва ҷиҳати воридсозии маҷаллаҳои илмӣ ба пойгоҳҳои иқтибосоварии илмии ҷаҳонӣ мо камтар таваҷҷӯҳ дорем”.

Ба қавли Давлатзода, ҳоло Комиссияи олии аттестатсионӣ конфренсияи сатҳи осиёӣ ва ё ҷаҳониро ба нақша гирифтааст ва дар ин росто семинарҳои омӯзишӣ ҳам баргузор кардан мехоҳад, то муҳаққиқони тоҷик барои нашри мақолаҳои илмии худ дар маҷаллаҳои тақризшавандаи бонуфузи ҷаҳонӣ бештар таваҷҷӯҳ кунанд ва маҷаллаҳои илмии кишвар дар пойгоҳҳои иқтибосоварии илмии ҷаҳонӣ ворид шаванд.

Ба қавли ӯ, ин ташаббусҳо боиси боло рафтани мақоми Тоҷикистон дар раддабандии SCImago замина хоҳад гузошт.

ИЗОБРАЖЕНИЕ

Ҷойгоҳи Тоҷикистон дар минтақа

Тоҷикистон дар ин рейтинг аз кишварҳои хеле хурду ҷазираӣ боло меистад, аммо дар муқоиса бо кишварҳои Осиёи Марказӣ қариб дар ҷойи охир меистад:

Қазоқистон – ҷойи 69, (64913 ҳуҷҷат),

Ӯзбекистон – ҷойи 83, (38873 ҳуҷҷат)

Қирғизистон – ҷойи 130, (7118 ҳуҷҷат)

Тоҷикистон – ҷойи 147 (3710 ҳуҷҷат),

Туркманистон – ҷойи 191 (636 ҳуҷҷат)

Дар сегонаи беҳтарини рейтинг Иёлоти Муттаҳидаи Амрико дар ҷойи 1, Чин дар ҷойи 2 ва Британияи Кабир дар ҷойи 3-юм қарор доранд.​

Русия дар ин рейтинг дар мақоми 12‑ум ва Эрон дар мақоми 19‑ум аст.

Дар сегонаи бадтаринии раддабандӣ бошад, Фаронсаи Ҷанубӣ дар ҷойи 241, Питкэрн дар ҷойи 242 ва Ҷазираҳои Ҳёрд ва Макдоналд дар ҷойи 243-юм ҳастанд.

Ёдовар мешавем, ки раддабандии ҷаҳонии SCImago тамоми нишондиҳандаҳоро барои давраи 1996 то 2024 фаро мегирад ва ҳар 2 сол бо навсозии додаҳои Scopus ҷамъбаст мешавад. Акнун бояд соли 2026 ин раддабандӣ натиҷаҳои навашро дар мавриди таҳқиқоти илмӣ эълон кунад.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

Имрӯз дар вазорату идораҳои зерин нишасти матуботӣ баргузор мешавад:

– дар Кумитаи ҳифзи муҳити зист, соати 08:00;

– дар Вазорати кишоварзӣ ва Академияи илмҳои кишоварзӣ, соати 09:00;

– дар Кумитаи меъморӣ ва сохтмон, соати 09:00;

– дар Агентии беҳдошти замин ва обёрӣ, соати 10:00;

– Вазорати энергетика ва захираҳои об, соати 11:00 дар “Барқи Тоҷик”.

ЯК РӮЗИ ТАЪРИХ

Соли 1932 – Кумитаи радиошунавонии Тоҷикистон таъсис ёфт.

Соли 1932 – ноҳияи Ҳисор (ҳоло шаҳри Ҳисор) таъсис дода шуд.

Соли 1956 – аввалин толори синамои мустанад дар ҷумҳурӣ бо номи “Хроника” кушода шуд.

Соли 2007 – ҳангоми амалиёти махсус дар ноҳияи Исфара паноҳгоҳи зеризаминии минагузошташуда ошкор шуд.

Соли 2011 – Президенти Тоҷикистон пешниҳод кард, ки муҷозот барои ғасби ғайриқонунии замин ва тақсими ғайриқонунии қитъаҳои замин пурзӯр карда шавад.

Соли 2012 – Дар ҳавопаймои “Тоҷик Эйр”, ки аз Маскав ба Душанбе парвоз мекард, писарбача ба дунё омад 

Соли 2020 – Додситони кулли Тоҷикистон дар мулоқот бо хабарнигорон ба ҷонибдори лағви мораторий ба ҳукми қатл дар Тоҷикистон изҳори назар кард.

Соли 2021 – Эмомалӣ Раҳмон қонун “Дар бораи даъвати умумӣ ба хизмати ҳарбӣ”-ро дар таҳрири нав имзо кард, ки тибқи он дар сафи Қувваҳои мусаллаҳи Тоҷикистон хизмати ҳарбии пулакӣ ҷорӣ карда шуд.

ШАХСИЯТҲО

Соли 1911 – Алӣ Аҳмадов, арбоби давлатии шӯравӣ ва тоҷик, Комиссари халқии корҳои хориҷии Тоҷикистони Шӯравӣ.

Соли 1974 – Мавлуди Дилрабо Мансурӣ, муовини сарвазири Тоҷикистон.

ИЗОБРАЖЕНИЕ Дилрабо Мансурӣ

Дилрабо Мансурӣ, ки ҳоло муовини сарвазири Тоҷикистон аст, ду сол пеш, 29-уми январи соли 2024 дар рӯзи зодрӯзаш ба ин мансаб таъин гардид. Ӯ соли 1996 Филиали Донишгоҳи техникии Тоҷикистон дар Хуҷандро бо ихтисоси муҳандис-технолог хатм кардааст.

Пас аз хатми донишгоҳ дар ин даргоҳ аввал ба ҳайси лаборанти калони кафедраи “Ресандагӣ ва иқтисодиёти соҳа”, баъдан ассистенти кафедраи “Технологияи матоъ, кешбофӣ ва маҳсулоти дӯзандагӣ” кор кардааст. Аз соли 2001 то 2008 аввал ҳамчун иҷрокунандаи вазифаи мудири кафедраи  “Технологияи матоъ, кешбофӣ ва маҳсулоти дӯзандагӣ” ва баъдан мудири кафедраи “Технологияи саноати бофандагӣ ва маҳсулоти дӯзандагӣ” фаъолият намудааст.

Пас аз дифои рисолаи илмӣ, солҳои 2008-2010 дар кафедраи “Технологияи саноати бофандагӣ ва маҳсулоти дӯзандагӣ” ба ҳайси дотсент ва солҳои 2010-2014 ҳамчун муовини директор оид ба илм ва инноватсияи Донишкадаи политехникии Донишгоҳи техникии Тоҷикистон ба номи академик М.Осимӣ кор кардааст.

Солҳои 2014-2015 директори Донишкадаи политехникии Донишгоҳи техникии Тоҷикистон ба номи академик М.Осимӣ буд.

Соли 2015 дар интихоботи парлумонии Тоҷикистон иштирок карда, вакили Маҷлиси намояндагон интихоб мегардад. Соли 2020 такроран вакили парлумон ва муовини раиси Маҷлиси намояндагон  интихоб шуд. То лаҳзаи таъин ба вазифаи муовини сарвазири Тоҷикистон, дар ин мансаб фаъолият мекард.

Соли 1955 – Мавлуди Зебинисо Рустамова, устоди дараҷаи байналхалқии варзиш, дорандаи ҷоизаи биринҷии Бозиҳои XXI олимпӣ.

ИЗОБРАЖЕНИЕ Зебуниссо Рустамова

Зебинисо Рустамова, дар замони Шӯравӣ қаҳрамонии ҷаҳон ва ҷоизадори Бозиҳои олимпии Монреали Конодо шуд. Дар сабқати аввал сазовори медали тилло ва дар дувумӣ биринҷӣ шуду номи Тоҷикистонро он замон берунтар аз маҳдудаи Шӯравӣ бурд. То ҳол рекорди гузоштаи ӯ аз ҷониби бонувони дигари камонкаши тоҷик дар сатҳи олам такрор нашудааст.

Зебинисо Рустамова дар вазифаҳои ҷонишин ва раиси Кумитаи давлатии тарбияи ҷисмонӣ ва варзиши ҶШС Тоҷикистон ва ноиб-президенти Кумитаи олимпии Тоҷикистон кор кардааст.

Соли 1962 – Зодрӯзи Аваз Юлдошев, журналисти шинохта ва собиқ хабарнигори Азия-Плюс.

ИЗОБРАЖЕНИЕ Аваз Юлдошев

Роҳи касбии Аваз Юлдашев аз солҳои пурташаннуҷи 90-ум оғоз ёфта, дар он айём ӯ сармуҳаррири рӯзномаи “Тоҷикистон” буд. Сипас фаъолияти ӯ дар сохторҳои давлатӣ – Кумитаи гумрук ва Агентии назорати маводи нашъаовар идома ёфт.

Соли 2008 Аваз Юлдашев ба “Азия-Плюс” пайваст. Ӯ роҳбари хадамоти хабарии расонаи мо буд. 

Ӯ 9-уми феврали соли 2024 дар 62-солагӣ даргузашт.

САНАҲОИ МУҲИМИ ҶАҲОНӢ

Соли 1886 Карл Бенс барои аввалин мошини худ патент гирифт. Ин як вагончаи сечархаи дукаса буд, ки вазнаш 250 кг буд ва чархҳои баланд дошт.

Мошин бо суръати 16 км/соат ҳаракат мекард, ки аз рӯи стандартҳои имрӯзаи хело кам аст. Аммо он вақт он тарҳи хеле пешрафта дониста мешуд. Ба он номи “Motorwagen” дода шуд.

ИЗОБРАЖЕНИЕ

29 январи соли 1886, пас аз он ки ихтироъ аз озмоишҳои сершумор ва баъзе тағйиротҳо гузашт, Motorwagen патенти императории Олмон №37435 гирифт. Ба хотири ин рӯйдоди таърихӣ 29 январ ҳамчун рӯзи ихтирои он таҷлил мешавад.

Имрӯз, Рӯзи сафарбаркунии аҳолӣ бар зидди хавфи ҷанги ядроӣ аст.  Он дар тамоми ҷаҳон таҷлил мешавад ва мақсади асосии он даъват ба хотима бахшидан ба мусобиқаи яроқи ядроӣ, кам кардан ва минбаъд тадриҷан барҳам додани аслиҳахонаҳои ядроии мамлакатҳои ҷаҳон ва бартараф намудани худи хавфи ҷанги ядроӣ аст.

ИЗОБРАЖЕНИЕ

ВАЗЪИ ҲАВО*

Дар вилояти Суғд – Ҳавои тағйирёбанда, рӯзона бебориш дар назар буда, дар баъзе ноҳияҳои кӯҳӣ барф меборад. Ҳарорат: дар водиҳо рӯзона -2+3º, дар ноҳияҳои кӯҳӣ рӯзона 1-6º сард, дар водиҳо шабона 1-6º сард, дар ноҳияҳои кӯҳӣ шабона 3-8º сард.

Дар вилояти Хатлон – Ҳавои тағйирёбанда, рӯзона бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона 1+6º гарм, дар ноҳияҳои доманакӯҳӣ рӯзона 2+7º гарм, дар водиҳо шабона -3+2º, дар ноҳияҳои доманакӯҳӣ шабона 1-6º сард.

Дар шаҳру ноҳияҳои тобеи ҷумҳурӣ – Ҳавои тағийрёбанда, рӯзона бебориш пешгӯӣ шуда, дар баъзе ноҳияҳои кӯҳӣ барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона 1-6º сард, дар баъзе ноҳияҳо то 1+3º гарм, дар водиҳо шабона 0-5º сард, дар ноҳияҳои кӯҳӣ шабона 2-7º сард, дар баъзе ноҳияҳо то 13-15º сард.

Дар Вилояти Мухтори Кӯҳистони Бадахшон – Ҳавои тағйирёбанда, рӯзона асосан бебориш (0,0-0,5мм) дар назар аст. Ҳарорат: дар ғарби вилоят рӯзона -3+2º, дар баъзе ноҳияҳо то 4+6º гарм, дар шарқи вилоят рӯзона 9-14º сард, дар ғарби вилоят шабона 7-12º сард, дар баъзе ноҳияҳо то 1-3º сард, дар шарқи вилоят шабона 18-23º сард. 

Дар шаҳри Душанбе – Ҳавои  абрнок, рӯзона бебориш пешгӯи шуда, тормеғ мефарояд. Ҳарорат: рӯзона 2+4º гарм, шабона 3-5º сард.

Дар шаҳри Хуҷанд – Ҳавои тағйирёбанда пешгӯӣ шуда, рӯзона бебориш дар назар аст. Ҳарорат: рӯзона 0-2º хунук, шабона 2-4º сард.

Дар шаҳри Бохтар – Ҳавои тағйирёбанда пешгӯӣ шуда, баъзан борон ва барф борида, тормеғ мефарояд. Ҳарорат: рӯзона 4+6º гарм, шабона 0-2º сард. 

Дар шаҳри Хоруғ – Ҳавои тағйирёбанда, рӯзона бебориш пешгӯӣ мешавад. Ҳарорат: рӯзона 0+2º гарм, шабона 7-9º сард.

*Ҳарорати шабонаи ҳаво шаби 29 ба 30-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.

Сифат ва нархи интернет, фарогирии аҳолӣ бо интернети насли нави 5G, даромади ширкатҳои мобилӣ ва ворид кардани интернет аз Чин, аз муҳимтарин нукоте буд, ки зимни нишасти матбуотии Хадамоти алоқа, ки имрӯз, 28-уми январ гузашт, баррасӣ шуд.

Дар Хадамоти алоқа гуфтанд, яке аз омилҳои паст будани сифати интернети мобилӣ ин афзоиши талабот ба интернет аст. Ба иттилои ин ниҳод, дар 5 соли охир талабот ба интернет 10 баробар (аз 3 Гбайт ба 30 Гбайт) афзуда, “дар истгоҳҳои базавӣ сарборӣ ба бор овардааст”.

Ҳоло теъдоди умуми истифодабарандагони интернети мобилӣ ва собит (ноқилӣ) дар Тоҷикистон 5,2 миллион нафар (4,5 млн. дар соли 2024) аст. Аз ин теъдод 5,1 миллион муштарии интернети мобилӣ ва боқимонда истифодабарандагони интернети ноқилӣ будаанд.

Исфандиёри Саъдулло, раиси Хадамоти алоқаи Тоҷикистон гуфт, соли гузашта арзиши таърифаҳои ироадиҳандагон (провайдерон)-и интернети ноқилӣ “ба ҳисоби миёна то 55% поён карда шуда, таърифаҳои бо суръати камтар аз 30 Мбит/с бекор шуданд”.

ИЗОБРАЖЕНИЕ Исфандиёри Саъдулло дар байн

Ба гуфтаи ӯ, мушкили суръати пасти интернет ҳоло танҳо дар алоқаи мобилӣ аст, дар интернети собит “умуман мушкиле нест ва сатҳу сифаташ ба талаботи имрӯза ҷавобгӯ аст”. 

Вале аз ин ниҳод нагуфтанд, ки ҳоло сифати интернети мобилӣ дар кишвар чӣ гуна аст ва нархи он ҳам барои 1 Мбит/с чанд сомонӣ арзиш дорад.

"Соли 2030 Тоҷикистон пурра ба интернети 5G мегузарад"

Зимни нишаст, раиси Хадамот изҳор дошт, ки соли 2027 тамоми ҷумҳурӣ ба интернети 4G фаро гирифта мешавад ва соли 2030 бошад, Тоҷикистон пурра ба интернети 5G мегузарад. 

Ба иттилои манбаъ, нақшаи насби пойгоҳҳои насли 5G дар Тоҷикистон барои солҳои 2026–2030 тасдиқ шуда, мутобиқи ин нақша, дар 65 шаҳру ноҳияи кишвар бо иштироки ширкатҳои ироадиҳанда (операторон)-и алоқаи мобилӣ пойгоҳҳои стандарти 5G насб мешавад.

Ӯ гуфт, иҷрои нақшаи мазкур чунин хоҳад буд: 

– то охири соли 2026 – фарогирии на камтар аз 15%-и аҳолӣ;

– то охири соли 2027 – фарогирии на камтар аз 35%;

– то охири соли 2028 – фарогирии на камтар аз 50%

– то охири соли 2029 – фарогирии на камтар аз 75%;

– то охири соли 2030 – таъмини фарогирии 100%-и аҳолии ҷумҳурӣ.

Ҳоло, ба иттилои Хадамоти алоқа, дар ҷумҳурӣ 84 пойгоҳи насли 5G, аз ҷумла дар шаҳри Душанбе 77 адад, Роғун 1 адад, Хоруғ 1 адад, Бохтар 2 адад ва Хуҷанд 3 адад “насб ва мавриди истифодабарӣ қарор дода шудаанд”. 

“Нишондодҳое, ки мо имрӯз мегирем, нисбат ба нишондодҳои 3G ва 4G беҳтаранд. Аммо на ҳамаи телефонҳои мобилие, ки имрӯз дар дасти шаҳрвандон ҳаст, стандарти 5G-ро қабул карда метавонанд. Он шаҳрвандоне, ки имрӯз дорои телефонҳои стандарти 5G мебошанд, пурра аз он истифода бурда истодаанд” – гуфт Исфандиёри Саъдулло. 

Ба иттилои манбаъ, ҳоло тибқи супориши роҳбари кишвар гурӯҳи кории Хадамот лоиҳаи “Стратегияи рушди соҳаи алоқа барои давраи то соли 2040” – ро таҳия кардааст. Ҳоло ин лоиҳа дар марҳилаи коркарди ниҳоӣ қарор дорад ва ба наздикӣ ба ҳукумати кишвар пешниҳод мешавад.

ИЗОБРАЖЕНИЕ Исфандиёри Саъдулло

Ба иттилои роҳбари ниҳод, дар лоиҳа 16 нишондоди мақсадноки асосӣ аз ҷумла, то 100% расонидани сатҳи интернети фаррохмавҷ, баланд бардоштани суръати интернети собит ва суръати миёнаи интернети мобилӣ, баланд бардоштани ҳиссаи фарогирии роҳҳои автомобилгард бо алоқаи мобилии 4G ва 5G ва бештар кардани сатҳи қаноатмандии аҳолӣ аз хидматрасониҳои соҳаи алоқа, ба назар гирифта шудааст.

Мушкил дар барқ аст?

Дар нишасти матбуотии Хадамоти алоқа, шикояти сокинон дар робита ба таъмини интернет дар сурати қатъ шудани барқ ва ҳамчунин, таъмини пойгоҳҳои ширкатҳо бо нерӯи барқ низ баҳс шуд.

Аз ҷумла, Исфандиёри Саъдулло гуфт, то имрӯз 62% истгоҳҳои базавӣ бо зергенераторҳо ва 8% бо панелҳои офтобӣ таъминанд. Мувофиқи нақша, дар соли 2026 бояд 80% зеристгоҳҳо бо генератор ва 30%-и он бо панелҳои офтобӣ муҷаҳҳаз шаванд.

“Муддати дароз маҳдудияти барқ давом меёбад ва каме мушкил аст. Вале агар гӯем, ки мушкилоти асосӣ дар қувваи барқ аст, хато мекунем. Нарасидани инфрасохтор ва таҷҳизоти зарурӣ, аз ҷумла истгоҳҳои базавии стандарти нав мушкилоти соҳа мебошанд ва мо дар ин самт корбарӣ мекунем”, – изҳор дошт Исфандиёри Саъдулло.

Дар ҳамин ҳол, Озодхон Давлатшоев, директори генералии ширкати “Tcell” гуфт, ки яке аз сабабҳо ин мушкил набудани реҷаи муайяни қатъи барқ аст, ки ширкат аз бозмонии кори истгоҳҳои базавӣ сари вақт огоҳ намешавад. 

ИЗОБРАЖЕНИЕ Озодхон Давлатшоев

"Мо бисёр мехостем, бо Шабакаҳои барқ як нақшаи саҳеҳ дошта бошем, то донем, ки кай ва ба куҷо сӯзишворӣ барему генераторҳоро фаъол кунем. Мушкил дар сӯзишворӣ ва таъмини он нест, мушкил дар кори системаҳоест, ки моро аз қатъи барқ хабардор мекунанд… Кӯшиш мекунем, бо Шабкаҳои барқ нақшае таҳия ва аз рӯйи он кор кунем”, – шарҳ дод Озодхон Давлатшоев.

Исфандиёр Саъдуллоев, ба ҳайси мушкилоти дигари соҳа, куҳнаву фарсуда будани инфрасохтор ё худ таҷҳизоти мухобиротӣ, хатҳои интиқоли маълумот, шароити ҷуғрофии кишвар, сарбории аз меъёр зиёд дар истгоҳҳои базавӣ, кифоя набудани самоягузорӣ, норасоии кадрҳои ихтисосманд ва маҳдудияти барқро номбар кард.  

Интернет аз Чин кай ба Тоҷикистон меояд?

Раиси Хадамоти алоқа дар бораи воридкунии интернет аз Чин гуфт, ки ҳоло “бо сабаби сардиҳо дар ноҳияи Мурғоб” корҳо муваққатан бозистодаанд.

Ба гуфтаи, ӯ кашидани хатти интернет аз Чин дар ҳудуди ВМКБ то шаҳри Хоруғ расидааст.

“Ният дорем, аз моҳи март корҳоро идома диҳем ва то охири соли 2026 насби 310 км хатти оптикии боқимондаро ба анҷом расонда, бо ширкатҳои хидматрасон пайвасти мустақим дошта бошем” – илова кард ӯ.

Ёдовар мешавем, ки Хадамот дар бораи тасмими ворид кардани интернет аз Чин ҳанӯз моҳи сентябри соли 2025 хабар дода буд. Он вақт гуфта мешуд, ки ноқилҳои 48-қабата (жила)-и оптикиро аз Душанбе то Хоруғ кашида, дар марҳилаи баъдӣ, то сарҳади Чин идома хоҳанд дод.

“Бо ин сатҳу сифат чӣ хел ҷарима накунем?”

Ҳамчунин, Исфандиёри Саъдулло изҳор дошт, ки давоми соли гузашта барои қонунвайронкунӣ дар самти алоқа нисбати 119 нафар шахсони воқеӣ ва ҳуқуқӣ 129 парвандаи ҳуқуқвайронкунии маъмурӣ оғоз гардида, беш аз 400 ҳазор сомонӣ ҷарима таъйин шудааст. Дар миёни онҳо ҳамаи ширкатҳои мобилӣ низ ҳастанд ва бештари ин маблағ ба онҳо рабт дорад.

“Бо ин сатҳу сифати инетернет, инҳоро ҷарима накунем намешавад”, – илова кард ӯ. 

Беш аз 5,5 млрд сомонӣ даромади ширкатҳои мобилӣ дар соли гузашта

Аз Хадамоти алоқаи кишвар ҳамчунин, гуфтанд, ширкатҳои мухобиротӣ ва корхонаҳои зерсохтори Хадамоти алоқа соли гузашта 5 миллиарду 52 миллиону 795 ҳазору 187 сомонӣ даромад доштаанд. Ин рақам назар ба соли 2024-ум 16,6% зиёд будааст.

Ба гуфтаи манбаъ, соли 2024 даромади ширкатҳои мобилӣ ва корхонаҳои зерсохтори Хадамоти алоқа 4 миллиарду 333 миллиону 274 ҳазору 496 сомонӣ будааст.

Ёдовар мешавем, ки сокинони кишвар аз паст будани суръати интернет ва нархи гарони он шикоят мекунанд. Тоҷикистон дар радабандиҳои ҷаҳонии суръат ва арзиши интернет ҳам зинаҳои пойинро касб кардааст.

Дар Telegram, Facebook ва Instagram бо мо бимонед.

Соли 2025 танҳо тариқи Фурудгоҳи байналмилалии Душанбе ҷасади 1 ҳазору 585 шаҳрванди Тоҷикистон аз кишварҳои хориҷа, махсусан Русия  ба кишвар оварда шудааст. Ин теъдод назар ба соли 2024-ум 430 тобут ё 37% бештар аст.

Дар ин бора дар ҳисоботи солонаи Фурудгоҳи байналмилалии Душанбе зикр шудааст. Маълум нест, ки ин ҷасадҳоро аз кадом кишварҳо овардаанд. Вале ҳамасола садҳо шаҳрванди Тоҷикистон, ки дар Русия кору зиндагӣ мекунанд, дар пайи ҳаводиси табиӣ ба ҳалокат мерасанд ва ё аз сӯи маллитгароёни рус кушта ва ҷасади онҳо ба ватан оварда мешавад.

Масъулини Оҷонсии ҳавонавардии Тоҷикистон омори интиқоли ҷасадҳо дар кулли кишварро нагуфтанд.

Дар ҳамин ҳол, Радиои Озодӣ навиштааст, ки дар ин муддат тариқи Фурудгоҳи байналмилали Кӯлоб 38 тобутро ба ватан овардаанд, ки дар муқоиса ба як сол пеш 24 адад камтар аст.

Маълум нест, ки дар соли гузашта теъдоди тобутҳое, ки тариқи фурудгоҳои шаҳрҳои Хуҷанд ва Бохтар ва аз роҳи заминӣ ба Тоҷикистон оварда шудаанд, чӣ қадар аст.

Бояд гуфт, ҳар сол тобути даҳҳо шаҳрванди Тоҷикистонро аз дигар кишварҳо ба ватан меоранд, ки аксарияти онҳо ҷасади муҳоҷирони тоҷики дар Русиябуда ҳастанд. Бештари вақт сабаби марги онҳо тасодуф дар сохтмон, беморӣ, куштор ва садама гуфта мешавад.

Аз ҷумла, ду ҳафта пеш ҷасади се узви оилаи тоҷикро, ки дар Русия аз бӯйи газ ба ҳалокат расида буданд, ба Тоҷикистон оварда дар зодгоҳашон деҳаи Шедруди ҷамоати деҳоти Заргари ноҳияи Кӯшониён ба хок супориданд.

Пештар аз ин пайкари хунолуди Қобилҷон Алиеви 10-соларо, ки рӯзи 16-уми декабр дар мактабе дар вилояти Маскав аз сӯйи шаҳрванди 15-солаи Русия бо корд ва бар пояи нафрати миллӣ кушта шуд, ба Тоҷикистон оварда, дар зодгоҳаш, ноҳияи Шаҳринав ба хок супурданд.

Дар Telegram, Facebook ва Instagram бо мо бимонед.