Лоиҳаи “Аудиокитоб” бо Субҳон Ҷалилов ба хондани асари "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз кард. Дар нашри навбатӣ, қисми сездаҳуми ин асари таърихиро манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин, ҳикояҳои Антон Чехов, романи “Киштии Нӯҳ” ва маҷмӯи ҳикояҳои Юнус Юсуфиро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани асари таърихии "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ метавонед гӯш кунед.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

Имрӯз дар вазорату идораҳои зерин нишасти матбуотӣ баргузор мешавад:

– Кумитаи рушди маҳал, соати 08:00;

– Оҷонсии ҳифзи мероси таърихию фарҳангӣ, соати 09:00;

– Саридораи геология, соати 10:00;

– Хадамоти назорати давлатии бехатарии корҳо дар саноат ва соҳаи кӯҳкорӣ, соати 11:00;

– Маркази миллии тестӣ, соати 14:00;

– Донишгоҳи давлатии тиҷорат, соати 08:00, Донишгоҳи аграрӣ соати 09:00 ва дар  Донишгоҳи славянӣ соати 10:00.

ЯК РӮЗИ ТАЪРИХ

Соли 1935 – Дар бораи нашри луғати мукаммали русӣ-тоҷикӣ қарор қабул шуд. Шӯрои илмии алифбои нави тоҷикии Тоҷикистон таъсис ёфт.

Соли 1993 – Муносибатҳои дипломатӣ миёни Тоҷикистон ва Туркманистон барқарор шуданд.

Соли 2016 – Озода Раҳмон, яке аз духтарони Эмомалӣ Раҳмон, раиси ҷумҳури Тоҷикистон роҳбари Дастгоҳи иҷроияи Президенти Тоҷикистон таъин гардид.

Соли 2019 – Демаркатсияи пурраи сарҳади давлатии Тоҷикистону Ӯзбекистон ба анҷом расид.

Соли 2021 – Бонки миллии Тоҷикистон ба ҶСП “Скай Катеринг”, ки дар фурудгоҳҳои Тоҷикистон хӯроки ҳавопайморо таъмин менамояд, иҷозатномаи хизматрасонии махсус бо асъори хориҷӣ дод.

Соли 2022 – Раисони шаҳрҳои Ҳисор, Ваҳдат, Роғун ва роҳбари ширкати “Барқи тоҷик” нав шуданд.

Соли 2022 – Дар марзи Тоҷикистону Қирғизистон муноқишаи нав рух дод, ки дар натиҷа ду тоҷик кушта ва 10 тани дигар захмӣ шуданд.

Соли 2022 – Петр Сегрт, мутахассиси хорватӣ сармураббии нави тими миллии футболи Тоҷикистон шуд.

ИЗОБРАЖЕНИЕ Петр Шергт

Таҳти роҳбарии ӯ дастаи Тоҷикистон  24 бозӣ анҷом дода, дар 11 бозӣ пирӯз шуда, 7 бор мусовӣ кардааст. Дар давраи роҳбари ӯ мунтахаби Тоҷикистон бори аввал, ба Ҷоми Осиё-2023 роҳ ёфт ва ба марҳилаи чорякниҳоӣ рафт. Бинобар анҷоми муҳлати шартнома дар аввали соли 2024 ӯ аз вазифаи сармураббии тими миллии футболи Тоҷикистон рафт.

ШАХСИЯТҲО

Соли 1940 – Зодрӯзи Сорбон, Нависандаи халқии Тоҷикистон.

ИЗОБРАЖЕНИЕ Сорбон

Нависандаи нозукбаёни тоҷик Сорбон (Пури Ҳамроҳ) имрӯз 85-сола шуд. Ӯ факултаи филологияи Донишгоҳи миллии Тоҷикистонро хатм кардааст. Муддати мадиде дар кори рӯзноманигорӣ ҳам машғул шудааст. Аз ҷумла,  муҳаррири барномаҳои адабии радиои Тоҷикистон, нашриёти “Ирфон”, мухбири рӯзномаи “Маданияти Тоҷикистон” буда, чанд сол дар нашриёти “Маориф” ва Иттифоқи нависандагони ҷумҳурӣ фаъолият доштааст.

Сорбон яке аз нависандагони маъруф ва соҳибноми тоҷик аст. Асари “Ҷӯгӣ”-и ӯ яке аз беҳтарин асарҳои муосир дар адабиёти тоҷик дониста мешавад. Ҳамчунин ӯ муаллифи қиссаву романҳои маъруфи “Занги аввал”, “Санги сипар”, “Марди танҳо”, “Достони писари Худо” ва чандин маҷмӯаи гуногунмуҳтаво аст.

Нахустин гулчини ҳикоёташ “Гап дар дил” буда, сипас асарҳои дигари ӯ, “Сабо”, “Қумрӣ”, “Пиндор”, “Марди танҳо”, “Чархи эҳтиётӣ”, “Санам”, “Спитамон”, “Шинел”, “Барзгар” ва чандин маҷмӯаи гуногунмуҳтаво мунташир шуданд. То имрӯз 12 ҷилди Куллиёти осораш ба дасти чоп расидааст.

Ҳикояҳои Лев Толстой, Фёдор Достоевский, «Пӯлод чӣ тавр обутоб меёбад”-и Николай Островский, романи “Ман офтобро мебинам”-и Нодар Думбадзе, қиссаи “Киштии сафед”-и Чингиз Айтматовро ба тоҷикӣ тарҷума кардааст.

"Азия-Плюс" дар ҷашни 80-солагии нависанда дар бораи зиндагиаш, буҳрони маънавӣ дар ҷомеа, фарқи адабиёти замони шӯравӣ аз Тоҷикистони навин ва масоили дигар мусоҳиба анҷом дода буд, ки дар матлаби Сорбон: Кори ман сиёсатбозӣ нест… метавонед мутолиа кунед.

Соли 1948 – Зодрӯзи Савринисо Сабзалиева, ҳунарпешаи театр ва синамои тоҷик.

ИЗОБРАЖЕНИЕ Савриниссо Сабзалиева

Савринисо Сабзалиева яке аз ҳунарпешагони муваффақ ҳам дар синамо ва ҳам дар театр буда, ҳамчунин дар дубляжи як қатори филмҳо низ саҳм дорад. Баъди хатми Донишкадаи санъати Тоҷикистон аввал дар Театри давлатии ба номи Лоҳутӣ ҳунарнамоӣ карда, баъдан дар мактаби мусиқии бачагонаи шаҳри Хоруғ муддате дарс гуфтааст.

Дар саҳнаи театр бо иҷрои нақшҳо дар намоишномаҳои “Рӯдакӣ”, “Отелло”, “Дод аз дасти ақл” дар хотирҳо мондааст. Дар синамо бошад, дар филмҳои тоҷикии “Духтарони суғдӣ”, “Асрори нӯҳ пайғамбар”, “Гумгаштапайдо”, “Иштибоҳ”, “Вохӯрӣ дар дараи марг” ва ғайра нақш бозидааст.

Ӯ ҳамчунин дар сужаҳои киножурнали ҳаҷвии “Калтак”, саҳнаю намоишҳои телевизионӣ нақшҳои зиёд иҷро кардааст. Саҳмаш дар дубляжи филмҳо ба забони тоҷикӣ низ бузург аст.

Савринисо Сабзалиева 4-уми майи соли 2020 дар 72-солагӣ даргузашт.

Соли 1964 – Мавлуди Маҳмадқул Каримов, кимиёгар, доктори илмҳои кимиё.

Соли 1983 – Зодрӯзи Шукрулло Хайрзода, собиқ ректори Донишгоҳи давлатии молия ва иқтисод, муовини пешини вазири маориф ва ҳоло ректори Донишгоҳи давлатии Данғара.

Соли 2022 – Далер Лоҳутӣ, файласуф, забоншинос ва тарҷумон, писари Абулқосим Лоҳутӣ дар синни 87-солагӣ дар Маскав даргузашт.

ИЗОБРАЖЕНИЕ Далер Лоҳутӣ

Далер Лоҳутӣ, писари Абулқосим Лоҳутӣ, шоири пуровозаи Тоҷикистону Эрон буда, мутахассиси варзидаи кибернетика ва ҳуши маснӯӣ, файласуфи мантиқдон, забоншинос ва тарҷумони варзида буд. Ӯ муаллифи асарҳои гаронарзише дар заминаи тарҷумаи матнҳои фалсафӣ низ буд.

Далер Лоҳутӣ хатмкардаи факултаи риёзии Донишгоҳи давлатии Маскав ба номи Ломаносов буда, аз соли 1998 дар Донишгоҳи давлатии гуманитарии Русия фаъолият кардаас. Ҳамчунин ба унвони роҳбари Маркази илмиву таълимии таъмини барномавию лингвистии низомҳои интелектуалӣ буд.

САНАҲОИ МУҲИМИ ҶАҲОНӢ

Имруз, рӯзи аз муҳосираи фашистӣ комилан озод шудани Ленинград ҷашн гирифта мешавад. Соли 1941 Гитлер дар канори Ленинград амалиёти ҷангӣ cap карда, 8 сентябр шаҳрро ба муҳосира гирифт. 27 январи соли 1944 артиши шӯравӣ мухосираро, ки 872 рӯз давом карда буд, комилан барҳам доданд.

ИЗОБРАЖЕНИЕ

Ин сана ба хотири ёдбуди миллионҳо нафаре интихоб гардидааст, ки дар солҳои Ҷанги дуюми ҷаҳон қурбони сиёсати нобудсозии оммавии режими онвақтаи Олмон шуданд. Маҳз 27-уми январи соли 1945 нерӯҳои Иттиҳоди Шӯравӣ урдугоҳи консентратсионии Освенсим (Аушвитс)-ро озод карданд, ки яке аз рамзҳои фоҷиаи Ҳолокост ба шумор меравад.

Тибқи маълумоти таърихӣ, дар натиҷаи Ҳолокост зиёда аз 6 миллион нафар, инчунин миллионҳо намояндагони дигар миллатҳо, ақаллиятҳо ва гурӯҳҳои иҷтимоӣ кушта шуданд. 

Имрӯз Рӯзи байналмилалии ёдбуди қурбониёнии Ҳолокост таҷлил мешавад. Ин рӯз аз ҷониби Маҷмаи Умумии СММ 1-уми ноябри соли 2005 тасдиқ шудааст.

ИЗОБРАЖЕНИЕ

Имрӯз, рӯзи кашфи Антарктида таҷлил мешавад. 27 январи соли 1820 аввалин экспедитсияи русҳо ба Антрктида бо сардории Таддей Беллингсгаузен пас аз шаш моҳ ба қитъаи ҷанубӣ расид. Дар маҷмӯъ, сафар 750 рӯз давом карда, 28 ҷазира дар баҳрҳои ҷанубӣ ва як соҳили қаблан номаълуми материк кашф карда шуданд.

ИЗОБРАЖЕНИЕ

Дар ҳамин рӯз, "Кайҳон моликияти тамоми инсоният" эълон карда шудааст. 27 январи соли 1967 “Дар бораи меъёрҳои фаъолияти давлатҳо дар тадқиқ ва истифодаи фазоӣ кайҳон, аз ҷумла Моҳ ва дигар ҷисмҳои осмонӣ” созишнома ба имзо расид. Имруз зиёда аз 100 мамлакат иштирокдори ин Шартнома мебошанд.

ИЗОБРАЖЕНИЕ

ВАЗЪИ ҲАВО*

Дар вилояти Суғд – Ҳавои тағйирёбанда, дар баъзе ноҳияҳои барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона 0-5º сард, дар водиҳо шабона -2+3º, дар ноҳияҳои кӯҳӣ шабона 7-12º сард.

Дар вилояти Хатлон – Ҳавои тағйирёбанда, дар баъзе ноҳияҳо барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 2+7º гарм, дар ноҳияҳои доманакӯҳӣ рӯзона 1+6º гарм, дар водиҳо шабона -3+2º, дар ноҳияҳои доманакӯҳӣ шабона -4+1º.

Дар шаҳру ноҳияҳои тобеи ҷумҳурӣ – Ҳавои тағйирёбанда, дар баъзе ноҳияҳо барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 1+6º гарм, дар ноҳияҳои кӯҳӣ рӯзона 1-6º сард, дар баъзе ноҳияҳо то 2+4º гарм, дар водиҳо шабона 0-5º сард, дар ноҳияҳои кӯҳӣ шабона 2-7º сард, дар баъзе ноҳияҳо то 11-13º сард.

Дар Вилояти Мухтори Кӯҳистони Бадахшон – Ҳавои тағйирёбанда, дар баъзе ноҳияҳои ғарбии вилоят барф борида, дар шарқи вилоят бебориш дар назар аст. Ҳарорат: дар ғарби вилоят рӯзона -1+4º, дар шарқи вилоят рӯзона 10-15º сард, дар баъзе минтақаҳо то 7-9º сард, дар ғарби вилоят шабона 6-11º сард, дар баъзе ноҳияҳо то 1-3º сард, дар шарқи вилоят шабона 23-28º сард, дар баъзе минтақаҳо то 17-19º сард.

Дар шаҳри Душанбе – Ҳавои  тағйирёбанда пешгӯӣ шуда, дар баъзе ҳолатҳо борон ва барф меборад. Ҳарорат: рӯзона 4+6º гарм, шабона 1-3º сард.

Дар шаҳри Хуҷанд – Ҳавои тағйирёбанда, баъзан барф борида, тормеғ мефарояд. Ҳарорат: рӯзона 1+3º гарм, шабона 1-3º сард.

Дар шаҳри Бохтар – Ҳавои тағйирёбанда пешгӯӣ шуда, дар баъзе ҳолатҳо барф меборад. Ҳарорат: рӯзона 1+3º гарм, шабона 0-2º сард.

Дар шаҳри Хоруғ – Ҳавои тағйирёбанда пешгӯӣ шуда, дар баъзе ҳолатҳо барф меборад. Ҳарорат: рӯзона 0+2º гарм, шабона 1-3º сард.

*Ҳарорати шабонаи ҳаво шаби 26 ба 27-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.

Акси маконҳои таърихӣ, хӯрокҳои миллӣ, наворҳои таблиғотӣ, ки баъзеи он тавассути ҳуши маснуӣ омода шудааст, муҳтавои асосии тарҳи “Tajikborn” аст, ки аз сӯйи ду духтари тоҷики бурунмарзӣ роҳандозӣ шудааст ва ҳадафи он муаррифии тоҷикон ва фарҳанги онҳо ба ҷаҳон аст.

Анаҳита Назрӣ ва Моҳитобон Ҷонон муассисони тарҳи ”Tajikborn” мебошанд, ки ба хотири муаррифии фарҳанги миллати худ бо се забон – тоҷикӣ, русӣ ва англисӣ ин лоиҳаро пеш мебаранд. Онҳо бо “Азия Плюс” дар мавриди мақсади таъсис ва фаъолияти ”Tajikborn” суҳбат карданд.

Ғурури миллӣ

Анаҳита баъд аз 13-солагӣ дар чандин кишварҳои хориҷӣ зиндагӣ кардааст ва ӯ таҳсилдидаи Академияи байналмилалии Уммон, Донишгоҳи менеҷмент ва иқтисоди ISM дар Вилнюс, Мактаби тиҷоратии SolBridge дар Донишгоҳи Вусонги Теҷон мебошад.

ИЗОБРАЖЕНИЕ Анаҳита Назрӣ

Даврони кӯдакии Моҳитобон низ дар Душанбе гузаштааст. Баъдтар дар синни наврасӣ бо оилааш ба Покистон, Чин ва сипас ба Британияи Кабир рафта, дар он ҷо ба воя расидааст. 

Анаҳита мегӯяд, ки чанд сол пеш ҳангоме хориҷиён дар бораи аз куҷо будани ӯ мепурсиданд, мегуфт тоҷикам ва аз Тоҷикистон, аммо муҳтавои дурусту шоистае барои муаррифӣ дар шабакаҳои иҷтимоӣ пайдо карда наметавонист.

“Медидам, ки намояндагони дигар кишварҳо дар бораи таърихи парчам, забон ва мусиқии худ бо ифтихор суҳбат мекарданд. Дарк кардам, ки ман низ метавонам бо халқи худ ифтихор кунам ва ғурури миллиам бедор шуд”, – гуфт ӯ.

Аз рӯйи гуфтаи Анаҳита, волидонаш гуфтаанд, ки ӯ бояд бо тоҷик будани худ ғурур кунад ва ба ҷаҳониён нишон диҳад, ки миллаташ дорои фарҳанги ғанӣ аст.

“Ҳадаф гузоштам то исбот намоям, ки тоҷикон низ метавонанд муосир, мустақил, донишманд бошанд ва дар ин баробар, эҳтиром ба миллату фарҳангро ба ҷо оранд”, – мегӯяд ӯ.

Моҳитобон бошад, баъд аз хатми мактаб, шавқаш ба омӯзиши забон ва фарҳанги тоҷикӣ бедор шудааст. Ба андешаи ӯ, садҳо тоҷикони бурунмарзӣ пазмони забону фарҳанги худ ҳастанд. Ва ин ба ӯ барои тарғиби забону фарҳанги халқаш ангеза бахшидааст.

ИЗОБРАЖЕНИЕ Моҳитобон Ҷонон

Чӣ тавр таъсиси ғояи тарҳ тавлид шуд?

Моҳитобон мегӯяд, ки унвони “TajikBorn” тасодуфан дар зеҳни муаллифон пайдо шудааст. Ӯ бо дӯсташ Анаҳита, ки тариқи Instagram шинос шудааст, роҳи такмили замони тоҷикиро меҷустаанд.

Рӯзе Анаҳита дар шарҳи ҳоли саҳифаи Instagram-и худ “Tajik-born, South Korea-based”, (тоҷики муқими Кореяи Ҷанубӣ) навиштааст. Сипас Моҳитобон низ дар саҳифааш "Tajik-born, London-based” (тоҷики муқими Лондон) навиштааст. Ҳамон лаҳза дар зеҳни духтарон ғояи сохтани тарҳи рақамии “TajikBorn” ба миён омадааст.

“Мо қабл аз таъсис, тарроҳон ва шахсони хоҳишмандро ба ин лоиҳаи бемузд, ки мақсади асосиаш тарғиби фарҳанги миллӣ аст, ҷалб кардем. Ҷавоншер ва Робия розӣ шуданд бо мо кор кунанд”, – гуфт Анаҳита.

Ҳоло "Tajikborn" -ро чор тоҷик аз чор кишвари дунё пеш мебаранд. Анаҳита муассиси лоиҳа ва ҳоло муқими Рига аст, ҳаммуассис Моҳитобон дар Лондон, тарроҳ Робия дар Маскав ва мудири тарҳ дар шабакаҳои иҷтимоӣ Ҷавоншер дар Душанбе зиндагӣ мекунанд.

“Тарҳи аксу навор ва худи муҳтаво барои мо хеле муҳим аст. Бо ин роҳ метавон мухотабони бештарро ҷалб кард. Тавассути муҳтавосозӣ саъй дорем, ки фарҳанги тоҷиконро берун аз марзҳо фарогир намоем”, – таъкид доштаанд муассисони лоиҳа.

ИЗОБРАЖЕНИЕ Робия

Шиносоӣ бо худ

Анаҳита гуфт, хориҷиён ва гурӯҳе аз тоҷикони бурунмарзӣ тоҷикиро намедонанд. Ба ин хотир, муҳтаворо бо се забон нашр мекунанд.  Барои бештаре аз ҷамъиятҳои тоҷикон ин саҳифа як навъ “шиносоӣ бо худ” шудааст.

“Дар расонаҳо ва доираҳои илмии англисзабон фарҳанги тоҷикон то ҳол ба қадри кофӣ муаррифӣ нашудааст. Ҳадафи асосии TajikBorn дастрас кардани маълумот дар бораи таърих, ҳунар ва мероси тоҷикон бо забони англисӣ аст”, – мегӯяд Анаҳита.

Дар тӯли каме бештар аз як сол, TajikBorn аз як лоиҳаи хурд дар шабакаҳои иҷтимоӣ ба як ҷомеаи фаъоли рақамӣ табдил ёфт. Муҳтавои лоиҳа тоҷиконро аз саросари ҷаҳон, ки аксари онҳо ташнаи маълумот дар бораи таъриху фарҳангу забони худ буданд, бо ниёконашон ошно кард.  

“Нишон додани фарҳанги тоҷикӣ дар олами рақамӣ танҳо истифоди аксу навори духтарони либоси миллипӯш  нест. Ҳадафи аслӣ шикасти қолабҳои шахшуда ва нишон додани давлату фарҳанги муосир аст. Яъне тоҷикон баробари дигар халқҳо қадам мениҳанд, аз донишҳои муосир огаҳанд, аммо бо ин ҳама, ҷадди худро фаромӯш накардаанд ва одату одоби онҳоро арҷ мегузоранд”, – гуфт Моҳитобон.

Ба гуфтаи муаллифони лоиҳа, “TajikBorn”-ро гурӯҳе аз муҳаққиқон, рассомон, тарроҳон ва нафароне хоҳишманд, ки хориҷианд ва ба фарҳанги кишварҳои Осиёи Марказӣ таваҷҷӯҳ доранд, пайгирӣ мекунанд.

Ҳамчунин, муаллифони лоиҳа бо истифода аз ҳуши маснӯӣ аксҳои таърихӣ, тасвирҳои рассомон, хӯрокҳои миллиро “зинда” мекунанд ба ба шеваи ҷолиб ба мухотабони худ пешниҳод мекунанд.

Ҳоло “TajikBorn” бастаи стикерҳои худро дорад, ки бо ҳадафи  муаррифии лоиҳа таҳия шудааст. Стикерҳоро метавон тавассути саҳифаи расмии “TajikBorn” бар ивази 55 сомонӣ харидорӣ кард.

“Ҳадаф аз таҳияи стикерҳо на фоидаи молӣ, балки муаррифии тоҷикон аст. Маблағи бадастомада барои дастгирии лоиҳа истифода мешавад”, – зикр кард Анаҳита.

Барои муаллифони лоиҳа муҳим аст, ки махсусан ҷавонон аз решаи худ ифтихор ва фарҳанги хешро ба таври муосир муаррифӣ кунанд.

Муассисон орзу доранд, ки дар чанд соли наздик “TajikBorn” аз саҳифаи иҷтимоӣ дар Instagram, ба як лоиҳаи бузурги фарҳангӣ табдил ёбад.

Дар Telegram, Facebook ва Instagram бо мо бимонед.

Оҷонсии ҳавошиносии Тоҷикистон ба сокинон ҳушдор додааст, ки аз 27 то 29-уми январ, бо сабаби боришоти (атмосферӣ) барфу борон, дар бархе минтақаҳо хавфи фаромадани тарма вуҷуд дорад.

Ин ниҳод, аз ҷумла, гуфтааст, ки эҳтимоли бештари тармафароӣ дар шоҳроҳи Душанбе–Чаноқ (километрҳои 48–74), минтақаҳои Майхура ва Зидеҳи ноҳияи Варзоб, ноҳияҳои кӯҳии тобеи ҷумҳурӣ, минтақаҳои Манем, Вуж, Тангив ва Бидуи ноҳияи Шуғнон пешгӯӣ мешавад.

Дар робита ба ин, мақомот ба сокинону ронандаҳо тавсия додаанд, ки бе зарурат ба минтақаҳои кӯҳӣ ва тармафаро сафар накунанд.

“Ба масъулони соҳаҳои роҳу нақлиёт тавсия дода мешавад, ки чораҳои заруриро андешанд”, – гуфта мешавад дар ҳушдори Оҷонсӣ.

Қаблан, рӯзи 22-юми январ дар кишвар барфи шадид борид, ки боиси қариб як шабонарӯз баста шудани роҳи Душанбе-Чаноқ, ягона роҳе, ки шимоли кишварро бо марказ мепайвандад, гардида буд. Ҳамин тариқ, рӯзҳои 23-24-уми январ баъди қатъ гардидани боришот ҳарорати ҳаво дар қисми зиёди минтақаҳои водию-доманакӯҳӣ шабона то 8-13º хунук шуда буд.

Ёдовар мешавем, ки моҳи январ дар Тоҷикистон ҳаво нисбатан гарм пешгӯӣ шуда буд. 

Дар Telegram, Facebook ва Instagram бо мо бимонед.

Носир Саидзода, раиси Кумитаи телевизион ва радио истифодаи ҳуши маснӯӣ (зеҳни сунъӣ)-ро дар эҷоди суруду мусиқӣ ва таҳияи барномаҳои телевизионӣ шарҳ дода гуфт, “истифодаи он ягон хатар надорад, вале наметавонад ҷойгузини сарояндагону мусиқинавозон бошад”.

Ба гуфтаи ӯ, ҳуши маснӯӣ танҳо барои “тезонидани кор” истифода мешавад ва тавассути он метавон ҳаттол садои асбобҳои миллии тоҷикиро эҷод кард. Ба гуфтаи ӯ, зеҳни сунъӣ танҳо барои эҷоди мусиқӣ истифода мешавад, вале наметавонад ҷойгузини садо бошад.

“Мо ин қадар сарояндагони машҳур, садоҳои хуб дорем. Мо ҳоло то ба он марҳила нарасидем, ки садои зеҳни сунъӣ эъҷодкарда ба ҷойи садои як сарояндаи мо истифода шавад. Ман дақиқ мегӯям, ки ҳеҷ чиз садои сарояндагони моро иваз ё такрор карда наметавонад”, – тавзеҳ дод ӯ.

Носир Саидзода гуфт, овози зинда ҳамеша ҳис карда мешавад ва “якҷоя кардани он бо мусиқии зеҳни сунъӣ офаридаи хеле зебо мешавад”.

Ба гуфтаи ӯ, барои омода кардани мусиқӣ, ки қаблан ансамбл алоҳида даъват мешуду садои ҳар як асбоби мусиқӣ алоҳида сабт ва баъдан ҳамоҳанг мешуд, вақти зиёд лозим буд. Вале имрӯз метавон номгӯи асбобҳоро дар барнома супориш дод ва кореро, ки қаблан то як ҳафта сарф мешуд, дар 5-10 дақиқа иҷро кард.

Аммо бо вуҷуди ин, ба қавли ӯ, баъзан ниёз ба навозандагон ҳаст ва садои баъзе асбобҳои мусиқӣ, чун ғижжаку най аввал зинда сабт мешаванд ва баъдан, ба мусиқии зеҳни сунъӣ эҷодкарда ҳамҷоя мегарданд.

Ба гуфтаи Носир Саидзода, яке аз далоили ҷойгузини оҳангсоз шуда натавонистани ҳуши маснӯӣ ин аст, ки “ба зеҳни сунъӣ низ оҳангсоз супориш медиҳад ва бояд ӯ ҳирфаӣ бошад, то донад, ки аз барномаи зеҳни сунъӣ чӣ мехоҳад”.

Ҳамчунин, раиси Кумитаи телевизион ва радио таъкид кард, ки ҳоло оҳангсозон ва ҳам созандагони филмҳои тасвирӣ аз ҳуши маснӯӣ васеъ истифода мекунанд.

Ба гуфтаи ӯ, ҳамчунин, коргардонҳои филм ва барномаҳо вақте ба мавзуъҳои таърихӣ даст мезананд, “маҷбурем барои сохтани баъзе мавзеъҳои таърихӣ аз зеҳни сунъӣ истифода кунем”.

Бо рушди фанновариҳои рақамӣ дар кишвар, вазорату идораҳо ва наҳодҳои давлатӣ низ талош доранд, дар фаъолияти худ аз ҳуши маснӯӣ истифода кунанд. Махсусан, баъди дастури роҳбари давлат дар паёми соли 2024 дар робита ба истифодаи васеи ҳуши маснӯӣ дар пешниҳоди хидматрасониҳо ва низоми бақайдгирии давлатӣ, ин раванд вусъат меёбад. 

Қаблан, дар моҳи июли соли гузашта, Маҷмаи умумии Созмони Милали Муттаҳид (СММ) лоиҳаи қатъномаи “Нақши зеҳни сунъӣ (ҳуши маснуӣ) дар фароҳам овардани имконоти навин барои рушди устувор дар Осиёи Марказӣ”-ро, ки аз сӯи Тоҷикистон пешниҳод гардида буд, бо иттифоқи оро қабул карда буд.

Дар Telegram, Facebook ва Instagram бо мо бимонед.