Аз Вазорати тандурустӣ ва ҳифзи иҷтимоии аҳолии Тоҷикистон ба "Азия-Плюс" гуфтанд, ки ҷорӣ гардидани низоми суғуртаи ҳатмии тиббӣ (СҲТ) дар Тоҷикистон пас аз соли 2030 ба нақша гирифта шудааст.

Ба иттилои манбаъ, дар Вазорат чанд лоиҳаи санадҳои меъёрӣ таҳия шудааст, ки ба гуфтаи ин ниҳод, ба ҷанбаҳои калидии низоми СҲТ дахл доранд. "Дастурамал дар бораи пардохти ҳақмуздҳои суғурта", "Барномаи заминавии СҲТ", инчунин муқаррарот дар бораи "Фонди суғуртаи ҳамтии тиббӣ", аз ҷумлаи чунин ҳуҷҷатҳои таҳиягардида маҳсуб меёбанд.

Лоиҳаҳои мазкур барои мувофиқасозӣ ба дигар вазорату идораҳои кишвар фиристода шудаанд.

"Қабули қонун дар бораи суғуртаи тиббӣ дар Тоҷикистон пас аз соли 2030 ба таъхир гузошта шуд. Ин тасмим ба шароитҳои воқеӣ марбут буда, айни замон низоми СҲТ дар марҳилаи омодашавӣ қарор дорад", – гукфтанд аз ин ниҳод.

Арзиши суғурта ва пардохтҳои иловагӣ

Дар Вазорати тандурустӣ зикр карданд, ки арзиши суғуртаи ҳатмии тиббӣ барои шаҳрвандон аз ҷониби ҳукумат муайян карда мешавад.

манбаъ гуфт, дар доираи низоми СҲТ ба шаҳрвандон хидматрасониҳои ройгони тиббӣ ва маводи доруворӣ пешниҳод мешаванд, ки ба номгӯйи тасдиқшуда дохиланд. Дастгирӣ аз ҷониби давлат барои оилаҳои камдаромад аз ҳисоби буҷети давлатӣ сурат мегирад.

Ҳамчунин, назорати сифати хидматрасониҳои тиббӣ дар доираи низоми суғуртаи ҳамтии тиббироро Вазорати тандурустӣ амалӣ мекунад. Самаранокии пешниҳоди хидматрасониҳои тиббӣ аз ҷониби Хадамоти назороти тиббӣ ва иҷтимоӣ пайгирӣ мешавад.

Аз ин ниҳод гуфтанд, номгӯйи хидматрасониҳое, ки ба низоми СҲТ дохил шудаанд, дар мувофиқа бо Хадамоти зиддиинҳисорӣ тасдиқ карда мешавад.

Барои хидматрасониҳои тиббии марбут ба технолгияҳои муосир ва хароҷоташ бештар эҳтимол пардохти иловагӣ талаб карда шавад.

ИЗОБРАЖЕНИЕ Табибони тоҷик

Чаро татбиқи СҲТ ба таъхир гузошта шуд?

Қонун “Дар бораи суғуртаи тиббӣ дар Тоҷикистон” соли 2008 қабул шуда, вале он замон парлумон тасмим гирифт, ки амалисозии санад то соли 2010 мавқуф гузошта шавад. Лекин пас аз 2 соли дигар низ қарор қабул  нашуд.

Охири соли 2022 вакилони парлумон бори панҷум муҳлати мавриди амал қарор гирифтани қонунро мавқуф гузоштанд.

Дар ҷаласаи парлумон зимни шарҳи вазъият, Ғафур Муҳсинзода, собиқ муовини аввали вазири тандурустӣ ва ҳифзи иҷтимоии аҳолӣ гуфта буд, ки "мувофиқи хулосаи комиссияи кории байниидоравӣ, дар кишвар барои пурра гузаштан ба низоми суғуртаи тиббӣ шароитҳои мусоид фароҳам оварда нашудааст".

Ба гуфтаи ӯ, барои ҷорисозии он бояд талаботи иқтисодӣ, молиявӣ ва тадорукотӣ ба инобат гирифта шавад.

Номбурда илвоа карда буд, ки мувофиқи хулосаи Вазорати молия, “дар сурати пардохти аъзоҳаққӣ ба суғуртаи тиббӣ аз ҳисоби меъёри амалкунандаи андози иҷтимоӣ, эҳтимоли коҳиши даромад ба буҷети суғуртаи иҷтимоӣ ва нафақа вуҷуд дорад, ки метавонад ба иҷро нашудани уҳдадориҳои иҷтимоии давлат ба аҳолӣ оварда расонад”.

Вай зикр карда буд, ки таҷрибаи кишварҳои дигар нишон дод, ки барои ҷорисозии суғуртаи ҳатмии тиббӣ маблағи зарурӣ барои соҳаи тандурустӣ бояд на камтар аз 4-6%-и Маҷмӯи маҳсулоти дохилӣ (ММД)-ро ташкил диҳад. Он вақт ин нишондиҳанда дар Тоҷикистон ба 2,8% (дар ҳамин ҳол, 80-90%-и буҷетро дар маҳалҳо маоши кормандон ташкил медод) баробар буд.

Қобили зикр аст, ки дар лоиҳаи буҷети давлатӣ барои соли 2026 хароҷоат ба соҳаи тандурустӣ дар ҳаҷми 5,03 млрд сомонӣ пешбинӣ шудааст, ки ҳудуди 2,5% нисбат ба ММД-ро ташкил медиҳад.

Суғуртаи ҳатмии тиббӣ яке аз навъҳои суғуртаи иҷтимоӣ мебошад, ки дар доираи он аз ҳисоби маблағҳои суғуртаи ҳатмии тиббӣ ба таъмини шаҳрвандон бо кумаки заминавии тиббӣ ва дору имкон дода мешавад.

Дар Telegram, Facebook ва Instagram бо мо бимонед.

Дирӯз, 23-юми январ таҳти раёсати Эмомалӣ Раҳмон, президент ва роҳбари ҳукумати кишвар ҷаласаи солонаи ҳукумат баргузор гашт, ки дар он “натиҷаҳои рушди иқтисодию иҷтимоии кишвар дар соли 2025 муфассал баррасӣ гардида, вазифаҳои асосӣ барои соли 2026 муайян карда шуданд”.

Хадамоти матбуотии раисҷумҳури менависад, ки дар ҷаласа аъзои ҳукумат, масъулини дастгоҳи иҷроияи президент, роҳбарони мақомоти давлатӣ, идораҳои назди президент ва ҳукумат, корхонаю муассисаҳои ҷумҳуриявӣ, раисони вилоятҳо ва шаҳру ноҳияҳо ва дигар масъулин иштирок карданд.

Нахуст, Қоҳир Расулзода, сарвазири кишвар дар бораи натиҷаҳои рушди иқтисодию иҷтимоӣ дар соли 2025 ҳисобот дода, аз ҷумла гуфтааст, ки соли гуҳашта, “ҳаҷми маҷмӯи маҳсулоти дохилӣ ба 176,9 миллиард сомонӣ баробар гардида, суръати афзоиши он 8,4 фоиз таъмин карда шуд”.

ИЗОБРАЖЕНИЕ

Б иттилои ӯ, сатҳи таваррум 3,5 фоизро ташкил дод, ки нисбат ба соли 2024 0,1 банди фоизӣ кам мебошад.

“Соли 2025 ба қисми даромади буҷети давлатӣ 60,3 миллиард сомонӣ маблағ ворид гардид, ки нисбат ба нақша 7 миллиард сомонӣ зиёд мебошад. Дар соли ҳисоботӣ дар кишвар 400 корхонаи нави саноатӣ ба истифода дода шуда, суръати рушди истеҳсоли маҳсулоти саноатӣ таъмин гардид”, – гуфтааст сарвазир.

Дар идома зикр кардааст, ки “бо мақсади таъмини рушди устувори соҳаи энергетика ва ноил шудан ба ҳадафҳои гузошташуда соли 2025 13 лоиҳаи сармоягузории давлатии соҳа ба маблағи 14,9 млрд сомонӣ мавриди татбиқ қарор дода шуд”.

Ҳаҷми истеҳсоли неруи барқ нисбат ба соли 2024-ум 7 фоиз зиёд гардида, ба 24 млрд кВт. соат расонида шудааст.

ИЗОБРАЖЕНИЕ

Ҳаҷми умумии маҳсулоти кишоварзӣ 84,6 миллиард сомониро ташкил дода, афзоиши он нисбат ба соли 2024-ум 9,5 фоиз таъмин гардидааст.

Ба иттилои сарвазири кишвар, дар соли 2025 ба кишвар ба маблағи 59,5 миллиард сомонӣ сармояи хориҷӣ ворид шудааст, ки нисбат ба соли 2024-ум 35 фоиз зиёд мебошад.

“Дар ин давра ҳаҷми умумии қарзҳои аз ҷониби низоми бонкии кишвар ба соҳаҳои иқтисоди миллӣ ва аҳолӣ додашуда зиёд гардида, 30 миллиард сомониро ташкил дод”, – гуфтааст Қоҳир Расулзода.

Ба таъкиди вай, дар ин давра ҳаҷми маблағгузорӣ ба сармояи асосӣ ба 28,7 миллиард сомонӣ баробар гардид, ки нисбат ба соли 2024 23 фоиз зиёд аст.

Соли 2025 ҳаҷми умумии гардиши савдои дохилӣ 77,3 миллиард сомониро ташкил дод, ки нисбат ба соли 2024 14 фоиз зиёд аст. Гардиши савдои хориҷӣ бошад нисбат ба соли 2024-ум 20,5 фоиз афзоиш ёфтааст. Вале омори мушаххас наовардааст.

Ҳамчунин, ҳаҷми хизматрасонии пулакӣ дар ҳамаи соҳаҳои хизматрасонӣ соли 2025 ба 30,5 миллиард сомонӣ баробар гардид, ки нисбат ба соли 2024-ум 13,2% зиёд мебошад.

Сарвазир гуфтааст, ки дар ин давра 38 муассисаи томактаби сохта шуда, шумораи умумии онҳо дар кишвар ба 795 адад расидаааст.

Соли 2025 дар мамлакат 214 мактаб ва бинову синфхонаҳои иловагӣ барои 99 ҳазор хонанда сохта, ба истифода дода шудааст. Ҳоло дар кишвар 4 ҳазору 56 муассисаи таҳсилоти миёнаи умумӣ фаъолият дорад.

Дар ин давра 113 муассисаи соҳаи тандурустӣ сохта, ба истифода дода шуда, 301 муассиса таъмиру азнавсозӣ карда шудааст.

Ба иттилои Қоҳир Расулзода, соли гузашта 280 ҳазор ҷойи кории нав таъсис дода шудааст.

Дар идома, Файзиддин Қаҳҳорзода, вазири молия, Нусратулло Давлатзода, раиси Кумитаи андоз ва Хуршед Каримзода, сардори Хадамоти гумрук ҳисобот доданд.

ИЗОБРАЖЕНИЕ Файзиддин Қаҳҳорзода

Гуфта шуд, ки соли 2025 “аз ҳисоби андозҳо ва пардохтҳои дохилӣ ба буҷети давлатӣ 26,5 миллиард сомонӣ ворид карда шуд, ки нисбат ба нишондиҳандаҳои пешбинишуда 3 миллиард 598 миллион сомонӣ зиёд мебошад”.

Иҷрои нақшаи андоз, дар Вилояти Мухтори Кӯҳистони Бадахшон 104,3%, вилояти Хатлон 103,1 %, вилояти Суғд 107,1 %, шаҳри Душанбе 119,8 % ва шаҳру ноҳияҳои тобеи ҷумҳурӣ 109,5 % таъмин гардидааст.

Баъди ин, Эмомалӣ Раҳмон ҷиҳати баланд бардоштани нишондиҳандаҳои иҷрои нақшаи пардохтҳои гумрукӣ, бартарафсозии қарзҳои андоз, пардохти нафақа ва суғуртаи иҷтимоӣ ва ба шакли электронӣ гузаронидани тамоми муносибатҳои молиявӣ дар ин соҳаҳо дастуру супоришҳои қатъӣ додааст.

ИЗОБРАЖЕНИЕ

Пас аз ҳисоботи Ҳабибулло Воҳидзода, Додситони кулли кишвар бар бораи фаъолияти мақомоти назорату санҷиш дар самти пешгирии ҷинояту ҷинояткорӣ, бартарафсозии қонуншиканиҳо дар соҳаҳои иқтисодиву иҷтимоӣ ва риояи ҳатмии қонунҳои амалкунанда, дастур шудааст, ки “мақомоти прокуратура ҷиҳати пешгирӣ аз ҳолатҳои риоя накардани қонунгузории мамлакат оид ба истифодаи замин, танзими ҷашну маросим ва дигар соҳаҳо тадбирҳои саривақтӣ ва бетаъхир андешанд”.

Дар идома, Султон Раҳимзода, раиси Кумитаи давлатии сармоягузорӣ ва идораи амволи давлатӣ дар робита ба раванди ҷалби сармоя ба иқтисоди миллӣ ва роҳҳои афзун намудани он, Фирдавс Толибзод, раиси Бонки миллии Тоҷикистон ва Алиҷон Салимзода, раиси “Амонатбонк” дар бораи соҳаи бонкдорӣ ва сиёсати пулию қарзӣ ҳисобот доданд.

Ба онҳо супориш дода шудааст, ки ҷиҳати ҷалби сармояи дохиливу хориҷӣ ба иқтисоди миллӣ, хусусан сармояи мустақим, устувор нигоҳ доштани қурби асъори миллӣ, афзун намудани ҳаҷми қарздиҳӣ, гузариш ба муомилоти ғайринақдӣ ва ба шакли пурраи электронӣ гузаронидани тамоми муносибатҳои молиявию бонкӣ чораҳои мушаххас андешанд.

ИЗОБРАЖЕНИЕ

Шералӣ Кабир, вазири саноат ва технологияҳои нав зимни гузориши худ гуфтааст, ки “соли 2025 дар кишвар корхона ва коргоҳҳои нави саноатӣ бо таъсиси 17 ҳазор ҷойҳои нави корӣ мавриди истифода қарор дода шуда, нисбат ба соли қаблӣ ҳаҷми истеҳсоли маҳсулоти саноатӣ 22,1 фоиз афзоиш ёфт”.

Зимни ҳисоботи солонаи Азим Иброҳим, вазири нақлиёт натиҷаҳои фаъолияти соҳа дар соли 2025 ҷамъбаст гардида, самтҳои асосии рушди инфрасохтори нақлиётӣ ва беҳтар намудани сифати хизматрасониҳо барои давраи минбаъда муайян карда шудааст.

Ба Далер Ҷумъа, вазири энергетика ва захираҳои об ва роҳбарони ширкатҳои соҳа барои татбиқи саривақтиву босифати лоиҳаҳои кам кардани талафоти неруи барқ дар шаҳру ноҳияҳои кишвар, ҷорӣ намудани низоми биллингӣ ва баҳисобгирии пурраи истифодабарандагони неруи барқ, ҷамъоварии саривақтии маблағи он аз аҳолӣ ва ташкилоту корхонаҳо ва бунёди иқтидорҳои алтернативии истеҳсоли неруи барқ дастуру супориш дода шудааст.

Қурбон Ҳакимзода, вазири кишоварзӣ ва Баҳодур Шерализода, раиси Кумитаи ҳифзи муҳити зист низ дар робита ба самтҳои фаъолияти худ ҳисобот додаанд.

ИЗОБРАЖЕНИЕ

Раҳим Саидзод, вазири маориф ва илм, Ҷамолиддин Абдуллозода, вазири тандурустӣ ва ҳифзи иҷтимоии аҳолӣ ва Солеҳа Холмаҳмадзода, вазири меҳнат, муҳоҷират ва шуғли аҳолӣ ҷиҳати баланд бардоштани сифати таҳсилот, таҳия ва нашри китобҳои босифати дарсӣ ва маводи таълимӣ, бунёди мактабҳои наву замонавӣ, тарғибу ташвиқи тарзи ҳаёти солим, бунёду навсозии бунгоҳҳои тиббӣ ва марказҳои саломатӣ, ҳамчунин бо шуғл таъмин намудани мардум дар маҳалҳо ва рушди ҳунармандию косибӣ вазифадор карда шуданд.

ИЗОБРАЖЕНИЕ

Рустами Эмомалӣ, раиси шаҳри Душанбе зимни ҳисоботи худ гуфтааст, ки соли гузашта дар пойтахт 46 ҳазор ҷойи нави корӣ таъсис дода шудааст.

Ба иттилои вай, дар ин давра, 62 корхонаву коргоҳи нави истеҳсолӣ ба истифода дада шуд ва суръати рушди истеҳсоли маҳсулоти саноатӣ 26 фоиз таъмин гардид.

“Дар баробари ин, суръати рушди маблағгузорӣ ба сармояи асосӣ нисбат ба соли 2024 31 фоиз зиёд гардида, ба масоҳати 713 ҳазор метри мураббаъ хонаҳои истиқоматӣ ва дигар иншооти иҷтимоию хизматрасонӣ ба истифода супорида шуд”, – гуфтааст Рустами Эмомалӣ.

ИЗОБРАЖЕНИЕ Рустами Эмомалӣ

Дар идома, Алишер Мирзонабот, раиси ВМКБ, Раҷаб Аҳмадзода, раиси вилояти Суғд ва Давлаталӣ Саид, раиси вилояти Хатлон доир ба натиҷаҳои рушди иқтисодиву иҷтимоии вилоятҳо ва шаҳру ноҳияҳо дар соли 2025 ҳисобот доданд.

Дар охири кори маҷлиси васеи ҳукумат, Эмомалӣ Раҳмон суханронӣ карда, бо натиҷагирӣ аз фаъолияти тамоми соҳаҳои иқтисоди миллӣ ба масъулин “барои рафъи камбудиҳои мавҷуда, иҷрои дастуру супоришҳои Паёми Президенти Ҷумҳурии Тоҷикистон, таҳияву татбиқи нақшаи чорабиниҳои таъминкунандаи пешрафту тараққиёти соҳаҳо ва минтақаҳои кишвар дастуру супоришҳои мушаххас” додааст.

ИЗОБРАЖЕНИЕ Алишер Мирзонабот, Раҷаб Аҳмадзода, Давлаталӣ Саид

Президент масъулинро вазифадор кардааст, ки рушди иқтисоди кишварро дар сатҳи на кам аз 8 фоиз таъмин кунанд.

Аз ҷумла, раисҷумҳур супориш додаааст, ки “дар самти пешгирӣ кардани омилҳои коррупсионӣ дар ҳамаи сохтору мақомоти давлатӣ тадбирҳои иловагӣ ва муассир амалӣ карда шаванд”.

Ҳамчунин, намояндагиҳои дипломатӣ ва тиҷоратии Тоҷикистон дар хориҷи кишвар вазифадор шудаанд, ки “муаррифии мунтазами имкониятҳои сармоягузориро ҳамчун вазифаи аввалиндараҷа ба роҳ монда, фаъолияти худро дар самти ҷалби сармояи мустақим ба таври ҷиддӣ тақвият бахшанд”.

“Бонки миллӣ якҷо бо ташкилотҳои қарзии молиявӣ аз ҷониби Роҳбари давлат вазифадор карда шуданд, ки ҷараёни қарздиҳиро самаранок ба роҳ монда, ҳаҷми қарзҳоро ба соҳибкории истеҳсолӣ, хусусан, дар ноҳияҳои дурдасти кишвар бамаротиб афзоиш диҳад”, навиштааст хадамоти матбуотии президент.

Ҳамчунин, Бонки миллӣ вазифадор гардидааст, ки якҷо бо вазорату идораҳо рушди низоми пардохт ва татбиқи пурраи низоми ғайринақдиро дар соҳаҳои савдо ва хизматрасонӣ таъмин намуда, аз 1-уми июли соли 2026 истифодаи ҳатмии рамзи ягона барои соҳибкорони инфиродиро ҷорӣ кунад.

ИЗОБРАЖЕНИЕ

Ҳамчунин, Хадамоти алоқа вазифадор гардидааст, ки дар ҳамкорӣ бо ширкатҳои мобилӣ чораҳои фаврӣ ва муассир андешида, суръат, сифати хизматрасонӣ ва дастрасии интернетро беҳтар намояд.

Эмомалӣ Раҳмон ба Вазорати саноат супориш додааст, ки то соли 2030 ҳиссаи соҳаи саноатро дар ММД ба 30% расонанд.

“Дар баробари ин супориш дода шуд, ки ҷиҳати бартараф намудани мушкилоти корхонаҳои аз фаъолият бозмонда ва азнавтаҷҳизонии онҳо тавассути механизми шарикии давлат ва бахши хусусӣ, махсусан, бо ҷалби сармоягузорони ватанӣ чораҳои мушаххас андешида шаванд”,- гуфта мешавад дар хабар расмӣ.

Ба Вазорати энергетика ва захираҳои об, ҷамъиятҳои саҳҳомии «Барқи Тоҷик» ва «Шабакаҳои тақсимоти барқ» супориш дода шудааст, ки ҷорӣ намудани низоми биллингӣ, баҳисобгирии пурраи истифодабарандагон ва ҷамъоварии саривақтии маблағи неруи барқ аз аҳолӣ ва ташкилоту корхонаҳоро таъмин кунанд.

ИЗОБРАЖЕНИЕ

Дар охир, Эмомалӣ Раҳмон таъкид кард, ки аъзои ҳукумат, роҳбарони дигар сохторҳо, раисони вилоятҳо ва шаҳру ноҳияҳо “дар ин соли бисёр муҳим барои амалӣ намудани супоришҳои Паёми Роҳбари давлат ва қарорҳои Ҳукумати мамлакат, бартараф кардани камбудиву норасоиҳои дар маҷлиси имрӯза зикргардида, супоришу вазифаҳои гузошташуда ва риояи ҳатмии интизоми давлатӣ масъулияти шахсӣ доранд”.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

– Имрӯз дар Кохи Борбад ҷоизасупории “Суруди сол – 2025”, ки чанд соли охир аз сӯи Вазорати фарҳанги Тоҷикистон гузаронида мешавад, доир мегардад. Чорабинӣ соати 16:30 оғоз хоҳад шуда, 24 овозхон бо ҷоиза қадрдонӣ мешаванд. Арзиши чипта аз 250 то 400 сомонӣ аст.

ИЗОБРАЖЕНИЕ

– Имрӯз дар Сирки давлатӣ дар шаҳри Душанбе ҳунармандони машҳури ҷаҳонӣ – Флавио ва Бруно Тони барномаи сиркӣ пешниҳод мекунанд. Дар барнома ҳамчунин ҳунарнамоии акробатҳо, гимнастҳои ҳавоӣ, жонглёр ва масхарабоз пешниҳод мешавад. Ҳамчунин бо паланги омӯзонидашуда саҳнаҳои ҷолиб таҳия шудаанд. Арзиши чиптаҳо аз 80 то 150 сомонӣ буда, метавон аз хазинаи Сирк ва ё сомонаи ticketon.tj дастрас кард.

– Имрӯз соати 18:00 дар Театри давлатии опера ва балети ба номи Садриддин Айнӣ балети машҳури Лео Делиб – “Коппелия” намоиш дода мешавад. Арзиши чипта аз 33 то 55 сомонӣ буда, метавон аз хазинаи театр ва ё сомонаи echipta.tj дастрас кард.

ЯК РӮЗ ДАР ТАЪРИХ

Соли 1970 – Дар Хоруғ нахустин корхонаи тавлиди маҳсулоти дӯзандагӣ ба фаъолият оғоз кард.

Соли 2001 – Парламент қарор кард, ки Ҷумҳурии Тоҷикистон ба Конвенсия дар бораи ҳифзи ҳуқуқи шахсони мансуб ба ақаллиятҳои миллӣ ҳамроҳ шавад.

Соли 2010 – Намояндагии дипломатии шоҳигарии Арабистони Саудӣ дар Душанбе фаъолияти худро оғоз намуд.

Соли 2011 – Дар терминали байналмилалии фурудгоҳи “Домодедово” таркиш рух дод. Дастгоҳи тарканда, ки бо элементҳои металлии осебрасон пур шуда буд, аз ҷониби террористи маргталаб фаъол карда шуд.

Дар натиҷаи ин ҳодиса 37 нафар ҳалок ва 172 нафар маҷрӯҳ гардиданд. Дар миёни фавтидагон 3 шаҳрванди Тоҷикистон низ буданд. Тафтишот муайян кард, ки таркишро террористи маргталаб Магомед Евлоев анҷом дода, ташкилкунандаи он Доку Умаров, раҳбари созмони ҷиноии “Иморати Кавказ” будааст.

Соли 2021 – Номи ноҳияи Шаҳритуз ба Шаҳритус иваз карда шуд.

ШАХСИЯТҲО

Соли 1911 – Мавлуди Наврӯзшо Қурбонҳусейнов, овозхон, навозанда ва оҳангсози тоҷик.

ИЗОБРАЖЕНИЕ Наврӯзшо Қурбонҳусейнов

Наврӯзшо Қурбонҳусейнов яке аз аввалин мутрибу сарояндагоне буд, ки бо таъсиси Театри драмаи мусиқии шаҳри Хоруғ ба фаъолият пардохт. Ӯ солҳо дар ин театр фаъолият бурда, як муддат роҳбари бахши мусиқии ин театр буд. Дар давоми фаъолияти ҳунарии ӯ беш аз 200 суруду навоҳои мукаммали мусиқӣ офарида шуданд.

Ӯ ҳамчунин созҳои мусиқии рубоб, танбӯр, сетор, ғижжак, най ва ҷуфтсозро моҳирона менавохт. Ба як зумра филмҳои синамоӣ оҳангу наво офаридааст, аз ҷумла дар филми “Бачагони Помир”, намоишҳои “Тошбек ва Гулқурбон”, “Қишлоқи тилоӣ”, “Овози ман”, “Духтари тоҷик” аз маъруфтарин сурудаҳои ӯянд.

Соли 1944 – Зодрӯзи Субҳон Ибодов, физикдон ва ахтаршиноси тоҷик.

Соли 1962 – Мавлуди Муаззамхон Ансорӣ, номзади илмҳои филология, ректори Донишкадаи омӯзгорӣ дар шаҳри Панҷакент.

ИЗОБРАЖЕНИЕ Муаззама Ансорӣ

Ӯ 18 сол инҷониб, аз соли 2007 то имрӯз ректори Донишкадаи давлатии омӯзгории Тоҷикистон дар шаҳри Панҷакент аст

Муаззамхон Ансорӣ имрӯз ҳамчунин профессори фахрии Донишгоҳи Вена ва аъзои Шӯрои академияи Донишгоҳи Оксфорди Британияи Кабир аст.

Дар соҳаи адабиётшиносӣ якчанд таҳқиқотҳои адабӣ анҷом дода, 8 китоб таълиф намуда, барои китоби Энсиклопедияи миллии тоҷик зиёда аз 300 мақола таълиф намудааст..

САНАҲОИ МУҲИМИ ҶАҲОНӢ

Имрӯз Рӯзи байналмилалии маориф ҷашн гирифта мешавад. Ба иттилои Созмони Милали Муттаҳид, имрӯз тақрибан 244 миллион кӯдак ва наврас дар ҷаҳон имкони ба мактаб рафтан ё хатми онро надоранд. Сабаби ин ҳолат камбизоатӣ, табъиз, низоъҳои мусаллаҳона, ҳолатҳои фавқулода ва оқибатҳои тағйирёбии иқлим мебошанд. Ҳамчунин муҳоҷират ва кӯчонидани маҷбурӣ ба дастрасии маориф таъсири манфӣ мерасонанд.

ИЗОБРАЖЕНИЕ

24 январ Рӯзи байналмилалии “эскимо” ҷашн гирифта мешавад. Дар ин рӯзи соли 1922 Кристиан Нелсон, соҳиби дӯкони шириниҳо дар шаҳри Онава (штати Айова, ИМА) барои ихтироъи “эскимо” – яхмоси қаймоқӣ дар чӯбчаи шоколадпӯш патент гирифт. Дар Иттиҳоди Шӯравӣ “эскимо” аз соли 1937 паҳн шуд.

ИЗОБРАЖЕНИЕ

Имрӯз Рӯзи огоҳӣ дар бораи синдроми Мёбиус аст. Синдроми Мёбиус, ки ба номи Паул Юлиус Мёбиус, олим ва асабшиноси олмонӣ гузошта шудааст, як бемории нодири ирсӣ аст. Он бо фалаҷи асабҳои рӯй ва дигар аномалияҳо, аз қабили норасоии мушакҳои қафаси сина ва нуқсони узвҳо мушаххас мешавад. Таҳқиқот нишон медиҳанд, ки сабаби ин синдром метавонад вайроншавии асабҳо дар давраи рушди ҷанин, таъсири доруҳо ё бемориҳои музмини модар бошад.

ИЗОБРАЖЕНИЕ

24-уми январи соли 1965 Уинстон Черчил, сарвазири Бритониёи Кабир дар 90-солагӣ даргузашт. Ӯ яке аз маъруфтарин сиёсатмадорон ва давлатмардони асри ХХ ба шумор меравад. Черчилл ду маротиба – солҳои 1940–1945 ва 1951–1955 сарвазири Британияи Кабир буд ва дар солҳои Ҷанги дуюми ҷаҳонӣ бо иродаи қавӣ, қарорҳои қатъӣ ва суханрониҳои таъсирбахшаш маъруф гардид.

Ғайр аз фаъолияти сиёсӣ, Уинстон Черчилл нависанда, таърихнигор ва журналист низ буд. Ӯ осори зиёди таърихӣ навиштааст ва барои саҳмаш дар адабиёт ва тавоноии баён, соли 1953 бо Ҷоизаи Нобел дар соҳаи адабиёт қадрдонӣ шуд.

ИЗОБРАЖЕНИЕ

24 январи соли 1935 бори аввал нӯшокии пиво дар банка ба фурӯш бароварда шуд. Ширкати амрикоии "Krueger Brewing Co" дар шаҳри Ричмонд аввалин марҳилаи пивои банкаро истеҳсол намуд.

Навоварӣ зуд писанди мардум гашт: ҳамагӣ пас аз ним сол фурӯши пиво дар банкаҳои металлӣ нисбат ба фурӯши анъанавӣ панҷуним маротиба зиёд шуд. Талабот рӯ ба афзоиш овард ва пиво дар байни аҳолӣ хеле маъмул гардид. Дар ибтидо банкаҳо аз пӯлод сохта мешуданд. Истифодаи алюминий барои истеҳсоли банкаҳо бори аввал соли 1958 дар ҷазираҳои Ҳавай оғоз ёфт.

ИЗОБРАЖЕНИЕ

24 январ ҳамчунин “табларзаи тиллоии Калифорния” – истихроҷи оммавии тилло дар солҳои 1848-1855 оғоз ёфт. Ин рӯйдод ба рушди босуръати минтақа сабаб гардид: дар чанд соли кӯтоҳ Сан-Франсиско аз як шаҳраки хурд ба маркази бузург табдил ёфт, роҳҳо, мактабҳо ва калисоҳо бунёд шуданд.

Бо гузашти вақт низоми қонунгузорӣ ташаккул ёфт ва соли 1850 Калифорния расман ба ҳайси як иёлати Амрико пазируфта шуд. Аз ҳамон вақт онро аксар вақт “Иёлати тиллоӣ” меноманд.

ИЗОБРАЖЕНИЕ

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона -3+2º, дар ноҳияҳои кӯҳӣ рӯзона 7-12º сард, дар водиҳо шабона -2+3º, дар ноҳияҳои кӯҳӣ шабона 7-12º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона 0+5º гарм, дар  доманакӯҳҳо рӯзона -1+4º, дар водиҳо шабона -3+2º, дар ноҳияҳои доманакӯҳӣ шабона -4+1º.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона 0-5º сард, дар водиҳо шабона 0-5º сард, дар ноҳияҳои кӯҳӣ шабона 2-7º сард, дар баъзе ноҳияҳо то 11-13º сард.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона 0-5º сард, дар баъзе ноҳияҳо то 2+4 гарм, дар шарқи вилоят рӯзона 7-12º сард, дар ғарби вилоят шабона 6-11º сард, дар баъзе ноҳияҳо то 1-3º сард, дар шарқи вилоят шабона 23-28º сард, дар баъзе минтақаҳо то 17-19º сард.

Дар шаҳри Душанбе – Ҳавои  тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 2+4º гарм, шабона 1-3º сард.

Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 0+2º гарм, шабона 1-3º сард.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 1+3º гарм, шабона 1-3º сард.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона 0-2º сард, шабона 6-8º сард.

*Ҳарорати шабонаи ҳаво шаби 24 ба 25-юми январ ба ҳисоб гирифта шудааст.

Дар Telegram, Facebook ва Instagram бо мо бимонед.