Соли гузашта Маҷлиси намояндагон, палатаи поёнии Маҷлиси олии Тоҷикистон 48 миллиону 32 ҳазор сомонӣ харҷ кардааст, ки  беш аз 18 миллиони он барои пардохти музди меҳнати вакилон ва кормандони ин палатаи парлумон сарф шудааст. Дар ин бора Абдуҷаббор Сатторзода, роҳбари дастгоҳи Маҷлиси намояндагон рӯзи 22-юми декабр дар як ҷаласаи парлумон гузориш додааст.

Ба гуфтаи ӯ, хазинаи ҳармоҳаи музди меҳнати вакилон ва кормандони Маҷлиси намояндагон, 1 миллиону 490 ҳазор сомониро ташкил дода, дар умум дар соли сипаришуда 18 миллиону 83 ҳазор сомонӣ фақат барои пардохти музди меҳнати вакилон ва кормандони дигар харҷ шудааст. Маълум нест, ки вакилон моҳе чӣ қадар маош мегиранд. Тибқи иттилои тасдиқнашуда, ҳар моҳ вакилон беш аз 10 ҳазор сомонӣ маош мегиранд.

Тибқи гузориши расмӣ, маблағҳои дигари барои палатаи поёнии парлумон ҷудошуда чунин харҷ шудаанд:

Суғуртаи иҷтимоӣ ва нафақа – 4 миллиону 630 ҳазору 250 сомонӣ;

Маводи сӯхт ва равғанҳои молиданӣ –  2 миллиону 112 ҳазору 400 сомонӣ;

Хариди маводи конселярӣ, молҳои хоҷагӣ ва либоси махсус – 1 миллиону 967 ҳазору 835 сомонӣ;

Сафари хизматии хориҷа – 1 миллиону 207 ҳазору 205 сомонӣ;

Пардохти хизмати коммуналӣ-гармидиҳӣ – 920 ҳазор сомонӣ;

Қисмҳои эҳтиётии нақлиёт ва суғуртаҳои давлатӣ – 731 ҳазор сомонӣ;

Таъмири собиқ бинои Маҷлиси Олӣ – 620 ҳазор сомонӣ;

Хӯроки кормандони техникӣ – 322 ҳазору 500 сомонӣ;

ИЗОБРАЖЕНИЕ Бинои парлумони Тоҷикистон

Таъмири бинои нави Парлумон, аз ҷумла ҷудо кардани ҳуҷраҳои корӣ – 560 ҳазор сомонӣ;

Харидани қисмҳои эҳтиётӣ барои таъмири автомобилҳо – 532 ҳазору 410 сомонӣ;

Таъмири парки автомобилии Маҷлиси намояндагон – 247 ҳазор сомонӣ;

Суғуртаи нақлиёту бино, андози нақлиёт, муоинаи техникӣ, экология, нобудсозии автомашинаҳо (утилизатсия) – 198 ҳазору 590 сомонӣ;

Таъмиру таҷдиди осорхонаи Маҷлиси Олӣ ва корҳои иловагии дохили бино – 196 ҳазор сомонӣ;

Хароҷоти боркашонии кўчи вакилон – 184 ҳазору 550 сомонӣ;

Таъмини осорхона бо мусаввараҳои рамзии кишвар – 146 ҳазор сомонӣ;

Армуғонҳои ороишии осорхона – 125 ҳазор сомонӣ;

Суғуртаҳои дигари давлатӣ – 84 ҳазору 200 сомонӣ.

Шуҳрат Ғанизода, раиси Комиссияи дастур ва ташкили кори парлумон сарфи маблағҳои ҷудогардида дар соли гузаштаро “тибқи талаботи қонунгузории муҳосибӣ ва дигар санадҳои меъёрии ҳуқуқии соҳа” арзёбӣ кардааст.

“Дастгоҳи Маҷлиси намояндагон аз уҳдаи вазифаҳои худ дар мавриди сарфу харҷи маблағҳои сметаи ягонаи даромад ва хароҷоти Маҷлиси намояндагон, махсусан дар соли 2025, ки мо якҷо фаъолият кардем, баромада истодааст”, – гуфтааст ӯ.

Аммо маълум нест, ки ин арзёбӣ то куҷо воқеъист ва боз кадом ниҳод харҷи маблағҳоро назорат мекунад.

Дар соли 2026 чӣ?

Дар соли 2026 ҳаҷми маоши ҳармоҳаи вакилон ва дигар кормандони Маҷлиси намояндагон 1 миллиону 683 ҳазор сомонӣ пешбинӣ шудааст. Ин 193 ҳазор сомонӣ зиёдтар нисбат ба соли гузашта аст. Аммо ҳаҷми умумии хазинаи Маҷлиси намояндагон барои соли 2026 ва дигар хароҷот маълум нест. Кӯшишҳои мо низ барои дарёфти ин маълумот бенатиҷа анҷомид. Аз дафтари матбуотии парлумон гуфтанд, чунин иттилоъро дар даст надоранд. 

Дар Маҷлиси намояндагон 181 воҳиди корӣ мавҷуд аст. Теъдоди кормандони техникӣ ва ёрирасони дастгоҳи Маҷлиси намояндагон 232 воҳиди кориро ташкил дода, хазинаи ҳармоҳаи музди меҳнати онҳо 324 ҳазор сомонӣ пешбинӣ шудааст.

Палатаи поёнии Маҷлиси олии Тоҷикистон 63 вакил дорад. Тибқи қонуни конститутсионии Тоҷикистон, вакилони Маҷлиси намояндагон бо манзили хидматӣ, мошин, суғуртаи ҳатмии давлатӣ, рухсатии музднок ва дигар имтиёзҳо таъмин буда, ҳуқуқи дахнопазирӣ доранд.

Бо вуҷуди ҳамаи ин, ҷомеа фаъолияти вакилонро интиқод мекунад ва ин ниҳодро ҳамчун як ниҳоди рамзӣ мешиносанд, ки дар аксари мушкилоти ҷомеа бетарафанд. Ҳатто дар натиҷаи чанд пурсиш маълум шуда буд, ки аксар сокинони кишвар вакилони ҳавзаи худро ҳам намешиносанд.

Дар Telegram, Facebook, Instagram бо мо бимонед.

Соли гузашта дар пайи санҷиши 7 ҳазору 700 иншоот, 13 ҳазору 96 шахси масъул барои риоя накардани талаботи беҳдоштиву эпидемиологӣ ҷарима шуда, фаъолияти 186 иншоот то бартараф намудани камбудиҳо муваққатан боздошта шудаанд.

Дар ин бора дар ҷаласаи солонаи Вазорати тандурустӣ ва ҳифзи иҷтимоии аҳолии Тоҷикистон, ки дирӯз, 8-уми январ баргузор гардид, зикр шудааст.

Ба иттилои манбаъ, Хадамоти назорати давлатии санитарию эпидемиологӣ дар пайи санҷишҳо 5 ҳазору 925 кг “маҳсулоти хӯрокаи пастсифат ва мӯҳлати истеъмолашон гузашта” аз муомилот боздошта ва нобуд кардааст.

Дар ҷаласа зикр шудааст, ки соли 2025 табибон 330 амалиёти ҷарроҳии пайванди узвҳо анҷом додаанд, ки нисбат ба соли 2024-ум 35 ҳолат зиёд будааст.

Ҳоло дар кишвар чанд табиб ва ҳамшираи тиб кор мекунанд?

Тибқи иттилои Вазорати тандурустӣ ҳоло дар Тоҷикистон беш аз 87 ҳазору 300 корманди тиб фаъолият мекунанд, ки 22 ҳазору 419 нафари он табибон ва 64 ҳазору 909 ҳамшираи тиб ва ё парастор мебошанд. Ин ниҳод гуфтааст, ки ин нишондод нисбат ба соли 2024-ум 2,3 фоиз зиёд аст. 

“Тибқи оморҳои пешакӣ, банд будани воҳидҳои кории табибон 94,3 ва кормандони миёнаи тиббӣ 99,7%-ро ташкил дода, ба соли пеш нисбат тахминан 0,8 ва 0,1% зиёд мебошад”,- навиштааст манбаъ.

Дар ҳамин ҳол, ба ҳолати нимсолаи соли гузашта дар соҳаи тибби кишвар 1 ҳазору 600 мутахассис намерасад. Масъулини мақомот бар он боваранд, ки аз ҳисоби хатмкунандагони макотиби олии тиббӣ камбуд бартараф мешавад.

Дар бораи норасоии табибон ва муҳоҷирати онҳо дар ин пайванд мутолиа кунед.

Истеҳсол ва содироти дору

Ба иттилои расмӣ, соли гузашта дар 71 корхонаи истеҳсоли дору зиёда аз 106,5 млн дору ва маҳсулоти тиббӣ истеҳсол шудааст, ки нисбат ба ҳамин давраи соли 2024-ум 4,5 млн адад бештар будааст.

ИЗОБРАЖЕНИЕ Роҳбарияти Вазорати тандурустӣ дар мушовара

Дар ин давра ширкатҳои фарматсевтӣ дору ва моддаҳои фаъоли биологӣ ба маблағи 27,14 млн сомонӣ ба хориҷи кишвар содир кардаанд, ки нисбат ба соли 2024 4,8 млн сомонӣ зиёд мебошад.

Чанд духтар бар зидди зидди вируси папилломаи одам эм карда шуданд?

Дар моҳи октябри соли гузашта 517 ҳазор духтарони синни 10-14 солаи кишвар бар зидди вируси папилломаи одам (ВПО) эм гирифтаанд. Вазорати тандурустӣ таъкид кардааст, ки 96,6%-и духтарон ба ваксина фаро гирифта шудаанд.

Бояд гуфт, ки эмкунӣ бар зидди ВПО дар асоси қарори ҳукумати кишвар дар моҳи октябр гузаронида шуд. Вируси папилломаи одам (ВПО) барангезандае мебошад, ки пӯсти инсон ва луобпардаи узвҳои гуногуни бадан, аз ҷумла гарданаки бачадон ва қисми берунаи узвҳои таносулиро зарар расонида, ҳар сол боиси марги садҳо нафар мегардад.

Дар хусуси ин беморӣ ва раванди гузаронидани маъракам эмкунӣ дар матлаби “Чаро моякӯбии духтарон бар зидди вируси папилломаи одам муҳим аст?” мутолиа кунед. 

Дар Telegram, Facebook ва Instagram бо мо бимонед.

Дар Тоҷикистон соати 02:14-и 9-уми январ заминларза рух дод. Дар ин бора Хадамоти геофизикии Академияи илмҳои кишвар хабар додааст.

Ба гуфтаи манбаъ, маркази заминҷунбӣ дар 61-километрии ноҳияи Мурғоб, дар ҳудуди Вилояти Мухтори Кӯҳистони Бадахшон будааст. Ларзиши замин дар маркази он 5,3 дараҷаро ташкил додааст.

Маълум нест, ки дар дигар минтақаҳо бузургии заминларза чанд дараҷа будааст.

Сокинон аз шаҳри Душанбе ва дигар минтақаҳо дар шабакаҳои иҷтимоӣ навиштаанд, ки ларзиши заминро эҳсос кардаанд.

Дар бораи хисороти ин заминларза иттилоъ дода намешавад.

Бояд гуфт, дар пайи заминларзаи рӯзи 13-уми апрели соли гузашта дар ноҳияҳои Рашту Тоҷикобод 1 нафар ҷон бохта, 16 каси дигар ҷароҳат бардоштанд. Ҳамчунин, 67 манзили истиқоматӣ пурра ва 280 хона қисман вайрон шуда, 321 хонаи дигар зарари сабук дида буданд. Ҳамчунин, 146 бинои ёрирасон, аз қабили мактаб, бунгоҳи тиббӣ, хатҳои интиқоли барқ, роҳҳо ва системаҳои обтаъминкунӣ зарар дида, 57 сар чорво талаф ёфта буд.

КҲФ гуфта буд, зарари заминларза дар умум беш аз 17,78 миллион сомонӣ ($1,66 млн) ҳисоб шуда, дар маҷмуъ 1 ҳазору 331 оила зарар дидаанд.

Мақомот моҳи ноябри соли 2025 хабар доданд, ки ҳамаи хонаҳои зарардида сохта ба сокинон дода шуд. 

Дар бораи чӣ гуна метавон худро ҳангоми заминларза ҳифз кард ва ба кадом хатоҳо набояд роҳ дод, дар ин маводи мо хонед: Заминларза. Чӣ гуна метавон худро ҳифз кард ва ба кадом хатоҳо набояд роҳ дод?

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани маҷмуъи ҳикояҳои Юнус Юсуфӣ, Нависандаи халқии Тоҷикистон оғоз кард. Дар нашри навбатӣ, қисми дуввуми ҳикояи “Хошарӯб” манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин ва ҳикояҳои Антон Чеховро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани роман ва ҳикояҳои китоби "Киштии Нӯҳ"-и Юнус Юсуфӣ оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ метавонед гӯш кунед.

Дар Telegram, Facebook ва Instagram бо мо бимонед.

Сафорати Амрико дар Тоҷикистон расман эълон кард, ки Котиботи давлатии ин кишвар барномаи қуръакашӣ ё лотереяи “Корти сабз” (“Green Card”)-ро муваққатан боздоштааст. Ғайр аз ин, онҳое ки барандаи ин қуръакашӣ ҳастанд, метавонанд аз мусоҳиба гузаранд, вале муваққатан раводид намегиранд.

“Аризадиҳандагони барнома метавонанд аризаҳои худро супорида, мусоҳиба гузаранд ва Котиботи давлатӣ таъини мусоҳибаҳоро барои аризадиҳандагони барнома идома хоҳад дод, лекин ягон раводид дар чаҳорчӯбаи ин барнома судур нахоҳад шуд. Умуман, мусоҳибаҳои аллакай таъйиншуда дар доираи ин барнома ба санаи дигар гузаронида ё лағв карда намешаванд.”, – навишт Сафорат ИМА дар Тоҷикистон.

Ба гуфтаи манбаъ, дар сурати пайдо шудани иттилои дигаре дар ин маврид Котиботи давлатии Амрико аризадиҳандагонро огоҳ хоҳад кард.

ИЗОБРАЖЕНИЕ Эълони Сафорати ИМА дар Тоҷикистон

Сафорат ҷузъиёти дигаре дар ин маврид ироа накардааст.

Дастури боздошти барномаи мазкурро чанде пеш Доналд Трамп, раисҷумҳури Амрико баъди тирпарронӣ дар Донишгоҳи Брауни шаҳри Провиденс дар рӯзи 13-уми декабри соли 2025, ки дар пайи он, ду кас кушта ва 18 тан маҷруҳ шуданд, содир карда буд.

Гуфта мешуд, гумонбари ин ҳодиса Клаудио Мануэл Невеш Валенте, шаҳрванди 48-солаи Пуртуғол буда, соли 2017 тавассути барномаи лотереяи “Корти сабз” ба Амрико ворид шудааст.

Боз доштани қуръакашии “Корти сабз” дар ҳолест, ки ҳамасола дар моҳҳои октябр ва ноябр сабтином дар ин барнома оғоз мешуд. Вале имсол оғоз нашуд. Сабабаш ҳам шарҳ дода намешавад.

Ҳамасола даҳҳо тан аз Тоҷикистон “Корти сабз”-ро пур мекунанд ва миқдори камашон соҳиби он мегарданд. Аз ҷумла, соли гузашта аз Тоҷикистон 2 ҳазору 982 кас барандаи “Корти сабз” шуда буданд. 

Сар аз соли 1990, ҳамасола Департаменти давлатии ИМА тавассути лотерея ба шаҳрвандони кишварҳое, ки мизони муҳоҷирати таърихан паст ба ИМА доранд, аз ҷумла ба Тоҷикистон, 50 ҳазор раводиди иқомати доимӣ медиҳад. Ғолибони лотереяи “ Корти сабз” ҳуқуқ пайдо мекунанд, ки ба таври қонунӣ дар Амрико зиндагӣ кунанд.

Дар ин матлаби таҳиянамудаи мо дар бораи пур кардани мустақилонаи аризаи "Green Card" ва дар матлаби дигари дар бораи чӣ гуна санҷидани натиҷаҳои бозии лотерея ва ба доми қаллобон наафтодан маълумот пайдо кунед.

Дар Telegram, Facebook ва Instagram бо мо бимонед.

ЯК РӮЗИ ТАЪРИХ

Соли 1925 – Дар шаҳри Тошканд Ҷамъияти омӯзишии “Тоҷикистон” таъсис ёфт.

Соли 1929 – Дар Тоҷикистон аввалин совхозҳо, аз ҷумла пахтакорӣ дар Вахш, ғаллакорӣ дар Данғара, Истаравшан ва Ҳисор таъсис дода шуданд,

Соли 1936 – Шаҳри Хуҷанд, ки яке аз қадимтарин шаҳрҳои Тоҷикистон аст, ба шаҳри Ленинобод тағйири ном кард. Баъд, 26-уми феврали соли 1991 бо қарори Шӯрои Олии кишвар ба номи таърихии худ – Хуҷанд баргардонида шуд.

ИЗОБРАЖЕНИЕ Рамзи шаҳри Хуҷанд

Соли 1940 – Иттифоқи композиторони Тоҷикистон таъсис ёфт. Ин иттифоқ бо мақсади инкишоф додани анъанаҳои мусиқии классикӣ ва халқии тоҷик, аз бар намудани мероси гаронбаҳои мусиқии классикии халқҳои дигар, аз ҷумла осори мусиқии ҷаҳонӣ таъсис ёфт.

Соли 1986 – Ҳавопаймои боркаши Ан – 124 (“Руслан”) аввалин парвози худро анҷом дод.

Соли 1992 – Муносибатҳои дипломатӣ байни  Тоҷикистон ва Ҷумҳурии Исломии Эрон барқарор шуд ва сафорати ин кишвар дар Душанбе ба фаъолият шурӯъ кард.

Соли 2002 – Бар асари заминларза 3 маҳаллаи аҳолинишин дар мавзеи сохтмони НБО “Роғун” осеб дид. Дар пайи он 3 кас ҷон бохта, 55 нафар ҷароҳат бардоштанд.

Соли 2001 – Дар вилояти Суғд аввалин Оҷонсии хусусии иттилоотӣ – “Вароруд” таъсис ёфт.

Соли 2020 – Дар ВМКБ мақомоти ҳифзи ҳуқуқ ба шикорчиёни маҳаллӣ силоҳ доданд, то одамон ва чорворо аз ҳамлаи гургон ҳифз кунанд.

ШАХСИЯТҲО

Соли 1932 – Мавлуди Султон Мирзошоев, вазири пешини фарҳанг ва собиқ роҳбари Дастгоҳи иҷроияи президенти Тоҷикистон.

ИЗОБРАЖЕНИЕ Султон Мирзошоев

Султон Мирзошоев соли 1953 Донишкадаи муаллимтайёркунии шаҳри Кӯлоб, соли 1963 Донишкадаи давлатии омӯзгории Кӯлоб ва соли 1966 мактаби олии ҳизбии назди Кумитаи маркази  Ҳизиб комунисти иттиҳоди Шӯравиро дар Москав хатм кардааст.

Ӯ фаъолияти худро дар вазифаи котиби якуми Комитети комсомолони шаҳри Кӯлоб, котиби дуюми Комитети Ҳизби комунсисти ноҳияи Арал (ҳозира Восеъ, 1957-59), котиби якуми Кумитаи марказии комсомоли Тоҷикистон (1960), котиби Комитети Ҳизби комунисти ноҳияи Восеъ (1961-1964) оғоз карда, то солҳои баъдӣ, ҳамчун раиси Комитети давлатии кинематографияи Шӯрои Вазирони Тоҷикистони Шӯравӣ (1967-1973), намояндаи доимии Шӯрои Вазирони Тоҷикистони Шӯравӣ дар назди шӯрои Вазирони Иттиҳоди Шӯравӣ (1973-1979) кор кардааст.

Ҳудуди 10 сол, аз соли 1979 то 1987 вазири маданият ё фарҳанги Тоҷикистони Шӯравӣ баъдан, аз як сол сардори Идораи саёҳии назди Шӯрои Вазирони Тоҷикистони Шӯравӣ ва се сол, аз 1990 то 1993 котиби якуми Комитети Ҳизби комунисти вилояти Кӯлоб, амалан раиси ин вилоят буд. 

Баъди ин, як сол, аз 1993 то 1994 ҳамчун роҳбари Дастгоҳи иҷроияи президенти Тоҷикистон кор кардааст. Аз 1995 то 1997 раиси "Коҳи Ваҳдат"-и Дастгоҳи иҷроияи президенти Тоҷикистон буд. Султон Мирзошоев ду даъват 6 ва 11  вакили Шӯрои Олии Тоҷикистони Шӯравӣ буд.

Инчунин дар нависандагӣ низ панҷа озмуда, асарҳои ҷолиб офаридааст. Асарҳои “Борис Кимёгаров” бо ҳамкории адиб Карим Давлат, қиссаҳои “Ҷонфидо” ва “Арзи дил”, повести “Дуои сари роҳ” аз ҷумлаи онҳоянд.

Собиқ вазири фарҳанги Тоҷикистон дар синни 85-солагӣ шаби 7 июни соли 2019 пас аз бемории начандон тӯлонӣ дар шаҳри Душанбе аз олам даргузашт.

Соли 1934 – Зодрӯзи Муаззама Мироқилова, доктори илмҳои тиб.

Соли 1936 – Мавлуди Ғанӣ Ҷӯразода, шоир, нависанда ва рӯзноманигори тоҷик.

ИЗОБРАЖЕНИЕ Ғанӣ Ҷӯразода

Ғанӣ Ҷӯразода солҳо дар рӯзномаҳои “Комсомолии Тоҷикистон”, “Ҷумҳурият”, “Садои мардум” ва маҷаллаи “Коммунисти Тоҷикистон” ба фаъолияти журналистӣ машғул буд. Дар ин муддат худро ҳамчун нависанда ва шоир низ муаррифӣ кард. Ҳикоя ва қиссаҳои “Кулоҳи падар”, “Захми дил”, “Қисмат” аз ҷумлаи таълифоти ӯянд.

Ғанӣ Ҷӯразода 28-уми феврали соли 2021 баъди беморӣ дар синни 85-солагӣ  даргузашт.

Соли 1945 – Зорӯзи Комил Бекзода, шарқшинос, номзади илмҳои фалсафа, асосгузори маҳфили илмӣ-фалсафии “Ҷаҳони андеша”.

ИЗОБРАЖЕНИЕ Комил Бекзода

Комил Бекзода файласуфи тоҷик, доктори илми фалсафа ва асосгузори маҳфили илмӣ-фалсафии “Ҷаҳони андеша” аст, ки замоне дар пайи нашри китобе баҳсбарангез гардид ва дар пайи он худи Комил Бекзода низ ба вокуниши тунди ҷомеа рӯбарӯ шуд.

Ӯ таҳсилкардаи шуъбаи забони арабии факултаи шарқшиносии Университети давлатии Тоҷикистон ба номи В. И. Ленин (ҳоло ДМТ) аст.

Беш аз 7 сол дар кишварҳои арабии Миср, Яман, (Адан, Санъо) таҳсил ва ба ҳайси тарҷумон кору фаъолият кардааст. Муддате дар ДМТ, Маркази Синошиносии Пажӯҳишгоҳи фалсафа, сиёсатшиносӣ ва ҳуқуқ ва Маркази омӯзиши равандҳои муосир ва оянданигарии илмии Академияи милли илмҳои Тоҷикистон кор кардааст.

Ӯ ба моддигароӣ ва ормонгароии фалсафаи ҷаҳонӣ муътақид нест ва ба андешааш, “моддигароии имрӯза ба идеология мубаддал гардидааст ва ормонгароӣ ҳамеша идеология аст”.

Бекзода соли 1993 дар назди Пажӯҳишгоҳи фалсафаи АИ маҳфили фалсафӣ-фарҳангии “Ҷаҳони андеша”-ро таъсис дод, ки ҳоло дар тобеияти Маркази омӯзиши равандҳои муосир ва оянданигарии илмии АИ қарор дорад.

Аъзои он соли 2013 китоберо бо номи “Ҷаҳонбинии оянда” дар нашриёти “Кайҳон” ба табъ расонданд, ки аз 40 саҳифа иборат буда, як боби он дар мавриди вуҷуди Худо баҳс мекунад. Ин мавзӯъ танҳо баъд аз тақрибан як соли нашри ин китобча бо вокунишҳои тунди бисёре аз сокинон ва руҳониён қарор гирифт. Дар ин байн маҳфил муддате фаъолияти худро қатъ кард, аммо баъди чанд моҳ, моҳи ноябри соли 2014 дубора фаъолияти худро оғоз кард.

Соли 1948 – Мавлуди Ҷӯра Ҳошимӣ, Шоири халқии Тоҷикистон.

ИЗОБРАЖЕНИЕ Ҷӯра Ҳошимӣ

Ҷӯра Ҳошимӣ аз шоирони забардасти кӯдакона дар Тоҷикистон буда, ҳар як кӯдак аз остонаи мактаб бо шеъри “Ман Алифбо мехонам” бо ашъори ӯ шинос мешавад. Шеърҳои зиёди ӯ дар китобҳои дарсии хонандагони синфҳои поёнӣ ҷо дода шудаанд ва ба завқи хонандагони хурдсол созгоранд. “Баччаҳову кӯчаҳо”, “Ре мегӯям ман бурро”, “Нинӣ бапо шуд” аз намунаҳои маъруфи эҷодиёти ӯ мебошанд.

Ӯ хатмкардаи факултаи филологияи тоҷики Донишгоҳи давлатии Тоҷикистон ба номи В. И. Ленин (ДМТ) буда, фаъолияти худро ҳамчун мусаҳҳеҳ дар Нашриёти “Ирфон” оғоз кардааст.

Минбаъд дар Кумитаи давлатии телевизион ва радио, рӯзномаи “Пионери Тоҷикистон” (“Анбоз”-и имрӯза), маҷаллаи “Чашма” дар вазифаҳои гуногун фаъолият карда, муддате сардабири ҳафтаномаи ҷумҳуриявии бачагонаи “Гул-гул” буд. Аз соли 1991 мушовири бахши адабиёти кӯдакону наврасони Иттифоқи нависандагони Тоҷикистон буд.

Ҷӯра Ҳошимӣ оғози солҳои 70-уми асри гузашта вориди майдони адабиёт гардид. То имрӯз китобҳои ашъори ӯ бо номҳои “Соябони садранга”, “Офтобак”, “Ман Алифбо мехонам!”, “Нинӣ бапо шуд”, “Аз як-як то лак-лак”, “Кулча чаро ширин аст?”, “Ман ба куҷо медавам?”, “Ре“ мегӯям ман бурро!”, “Чаро шамолак вазид?”, “Баччаҳову кӯчаҳо” мунташир шудаанд.

Ӯ ҳамчунин бо оҳангсозони маъруфи кишвар барои кӯдакону наврасон як қатор сурудҳои ҷолиб офаридааст. Беҳтарин шеърҳояш ба забонҳои гуногуни дунё тарҷума шудаанд ва худи ӯ дар баргардони ашъори шоирони халқҳои гуногуни ҷаҳон ба тоҷикӣ саҳми арзанда дорад. Ахиран, китоби “Очаҷону бачаҷон”-и ӯ дар озмуни “Китоби сол-2025” дар бахши “Назми бачагона” сазовори ҷойи дуюм гардид.

Соли 2009  – Ҷумъабой Ниёзов, муовини пешнии Ҳизби демократи Тоҷикистон (ҲДТ) дар 61-солагӣ даргузашт.

ИЗОБРАЖЕНИЕ Ҷумъабой Ниёзов

Ҷумъабой Ниёзов аз бунёдгузорони ҳизби демократи Тоҷикистон маҳсуб ёфта, муддате бахши вилоятии ҲДТ-ро роҳбарӣ мекард ва соли 1995 раиси ҳизб интихоб шуда, аз соли 2000 то поёни умр муовини аввали раиси ҲДТ буд.

Ӯ хатмкардаи факултаи энергетикии Донишгоҳи Политехникии шаҳри Душанбе буда, фаъолияти худро дар ҳамин донишгоҳ оғоз ва муддате дар филиали Донишгоҳи Политехникии Тоҷикистон дар Хуҷанд кор кардааст.

Аз соли 1989 фаъолияти сиёсии Ҷумъабой Ниёзов оғоз мегардад. Ӯ худи ҳамон сол ҳамраиси ҳаракати мардумии “Эҳёи Хуҷанд” интихоб шуда, то охири соли 1990 дар ин созмон фаъолият доштааст.

Гуфта мешавад, ки ин созмон баъди ба мақсади сиёсии худ расидан дар соли 1993, ки барқарор намудани номи таърихии шаҳри Хуҷанд будааст, фаъолияташро қатъ кард. Баъдан аксар узви фаъоли он, аз ҷумла Ҷумъабой Ниёзов ба узвияти ҲДТ шомил шуданд.

Номбурда соли 1990 раиси бахши вилоятии ҲДТ дар вилояти Ленинобод (ҳоло Суғд) интихоб шуд. Соли 1995 бошад раисиҳизб интихоб гардид.

Ӯ муддате зиндонӣ ҳам шуда буд ва худро “маҳбуси сиёсӣ” меномид.

Ҳамчунин аз соли 1995 то соли 1997 узви ҳайати музокироти сулҳи байни тоҷикон буда, моҳи июни соли 1997 ба узвияти Комиссияи Оштии Миллӣ пешбарӣ гардид ва то соли 2000 дар зеркомиссияи сиёсии он буд. Минбаъд то охири умр муовини аввали раиси ҲДТ буд.

САНАҲОИ МУҲИМИ ҶАҲОНӢ

Соли 1839 аввалин таҷҳизоти аксбардорӣ кашф шуд. Луи Дагер, ихтироъкори фаронсавӣ онро кашф ва 9 январи соли 1839 ҳукумати Фаронса онро бо номи "Дагеротипия" ба ҷаҳониён муаррифӣ кард.

ИЗОБРАЖЕНИЕ

"Дагеротипия" аввалин технологияе буд, ки барои аксбардории доимӣ истифода мешуд. Ин раванд аз сабти тасвир ба рӯи плитаҳои нуқрагӣ, ки бо йод ҳассос гардонида шуда буданд, иборат буд. Ин ихтироъ имкони эҷоди тасвирҳои возеҳ ва доимиро фароҳам овард, ки қаблан ғайриимкон буд. 

Имрӯз Рӯзи саёҳат бо тӯби ҳавоӣ (воздушний шар) аст. Дар ин рӯзи соли 1793 Жан-Пер Бланшар аввалин парвози худро бо чунин тӯб дар Амрико анҷом дод.

ИЗОБРАЖЕНИЕ

Ӯ 44 маротиба дар Аврупо бо тӯбҳои ҳидрогенӣ ба осмон баромада, тасмим гирифт, ки дар ҷаҳони нав аввалин шахсе шавад, ки ин корнаморо иҷро мекунад.

9-уми январ Рӯзи байналмилалии хореограф таҷлил мешавад. Ин ҷашн ба онҳое бахшида шудааст, ки техника ва санъати рақсро нигоҳ дошта, онро такмил ва насли ояндаро таълим медиҳанд.

ИЗОБРАЖЕНИЕ

Соли 1951, дар ин рӯз, 74 сол пеш дар Ню-Йорк (ИМА) қароргоҳи СММ расман ифтитоҳ гардид.

ИЗОБРАЖЕНИЕ

То он замон ниҳодҳои асосии СММ муваққатан дар маҳалли Лейк-Саксесс фаъолият мекарданд. Бинои нави қароргоҳ дар соҳили дарёи Ист-Ривер ҷойгир шуда, ба маркази асосии фаъолияти дипломатии байналмилалӣ табдил ёфт. Аз он вақт инҷониб қароргоҳи СММ макони баргузории иҷлосияҳои Маҷмаи умумӣ, Шӯрои амният ва дигар ниҳодҳои муҳими созмон аст.

Соли 1969 аввалин парвози озмоишии ҳавопаймои “Конкорд” баргузор гардид. Ин ҳавопаймоҳои баландсуръат 27 сол истифода шуда, аз рӯйи  суръат якчанд маротиба рекорд гузошт.

ИЗОБРАЖЕНИЕ

Масалан, масири Лондон – Ню-Йоркро дар муддати 2 соату 55 дақиқа ва атрофи ҷаҳонро дар муддати 31 соату 27 дақиқа ва 49 сония бо шаш фуруд барои сӯзишворӣ пур кардан тай кард. Аммо соли 2003 бинобар хароҷоти зиёд, истифодаи тиҷоратии “Конкорд” қатъ гардид.

Соли 2007 аввалин телефони "iPhone" муаррифӣ шуд. "iPhone", ки Стив Ҷобс муаррифӣ кард, прототипи хеле сода ва нопурра буд. Моделҳое, ки баъдан ба бозор баромаданд, аз он фарқ мекарданд.

ИЗОБРАЖЕНИЕ

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: рӯзона дар водиҳо 4+9º гарм, дар ноҳияҳои кӯҳӣ -2+3º, шабона дар водиҳо -3+2º, дар ноҳияҳои кӯҳӣ 6-11º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона дар водиҳо 10+15º гарм, дар ноҳияҳои доманакӯҳӣ 6+11º гарм, шабона дар водиҳо -2+3º, дар ноҳияҳои доманакӯҳӣ -3+2º.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: рӯзона дар водиҳо 8+13º гарм, дар ноҳияҳои кӯҳӣ 1+6º гарм, дар баъзе ноҳияҳо то 3-5º сард, шабона дар водиҳо -2+3º, дар ноҳияҳои кӯҳӣ 0-5º сард, дар баъзе ноҳияҳо то 13-15º сард.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: рӯзона -4+1º, дар баъзе ноҳияҳо то 6+8º гарм, дар шарқи вилоят 6-11º сард, дар баъзе минтақаҳо то 16-18º сард, дар ғарби вилоят шабона 8-13º сард, дар баъзе ноҳияҳо то 1-3º сард, дар шарқи вилоят шабона 24-29º сард, дар баъзе минтақаҳо то 49-51º сард.

Дар шаҳри Душанбе – Ҳавои  камабри бебориш пешгӯӣ шуда, тормеғ мефарояд. Ҳарорат: рӯзона 8+10º гарм, шабона -1+1º.

Дар шаҳри Хуҷанд – Ҳавои камабри бебориш пешгӯӣ шуда, тормеғ мефарояд. Ҳарорат: рӯзона 5+7º гарм, шабона 0-2º сард.

Дар шаҳри Бохтар – Ҳавои камабри бебориш пешгӯӣ шуда, тормеғ мефарояд. Ҳарорат: рӯзона 8+10º гарм, шабона -1+1º.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона 1+3º гарм, шабона 9-11º сард.

*Ҳарорати шабонаи ҳаво шаби 9 ба 10-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.