Созмони аҳдномаи амнияти дастаҷамъӣ (СААД) дар изҳороте кӯмак хостани Тоҷикистон аз ин созмон дар пайи ҳамлаҳо аз хоки Афғонистон ба кишвари моро рад кард ва гуфт, “ҷониби Тоҷикистон дар робита ба ҳодисаҳои 26 ва 30-юми ноябри имсол барои кумак ба СААД муроҷиат накардааст”.

Дар пайи ду ҳамла аз қаламрави Афғонистон ба ноҳияҳои наздимарзии Тоҷикистон, ки рӯзҳои 26 ва 30-юми ноябр рух дод, хабаргузонии "Reuters" навишт, Тоҷикистон бо СААД дар мавриди ҷалби нерӯҳои Русия барои назорати муштараки марз бо Афғонистон музокира мекунад. ВКХ-и Тоҷикистон ин хабари "Reuters" рад кард. Пас аз изҳороти ин ниҳод, "Reuters" матлабашро пок кард.

СААД рӯзи 23-юми декабр хабарҳои дар ин хусус дар расонаҳо ва шабакаҳои иҷтимоӣ нашршударо “маълумоти носаҳеҳ” хондааст.

“Ҳамкории Тоҷикистон бо кишварҳои ҳампаймон дар доираи СААД дар заминаи таҳкими марз бо Афғонистон бар асоси Барномаи байнидавлатии дахлдор сурат мегирад, ки дар иҷлосияи Шӯрои амнияти дастаҷамъии СААД соли 2024 дар шаҳри Остона тасдиқ шудааст”, – омадааст дар изҳороти созмон.

Ёдовар мешавем, дар ду ҳамла аз қаламрави Афғонистон ба ноҳияҳои наздимарзии Тоҷикистон, ки рӯзҳои 26 ва 30-юми ноябр рух дод, 5 шаҳрвандони Чин кушта ва панҷ нафари дигар захмӣ шуданд. Ин ҳамлаҳо аввал ба бошишгоҳи як ширкати маъдантозакунӣ дар ноҳияи Шамсиддин Шоҳин ва баъдан ба як ширктаи роҳсозӣ дар ноҳияи Дарвоз сурат гирифтанд.

Тоҷикистон ин ҳамлаҳоро шадидан маҳкум карда аз “Толибон” хоста буд, ки омилони онро дастгир кунанд. ВКХ-и ҳукумати Толибон гуфт, ки ҳамла тавассути гурӯҳҳое анҷом шудааст, ки ҳадафашон “эҷоди бесуботӣ ва беэътимодӣ миёни кишварҳои минтақа аст”.

Эмомалӣ Раҳмон, раисҷумҳури Тоҷикистон ин ҳамлаҳоро шадидан маҳкум карда, ба роҳбарони мақомоти қудратии кишвар дастур дод, ки "доир ба ҳалли масъала ва пешгирӣ аз такрори чунин ҳодисаҳои нохуш аз чораю тадбирҳои муассир кор бигиранд”.

Дар пайи ин,  Сироҷиддин Муҳриддин, вазири корҳои хориҷии Тоҷикистон бо Амирхон Муттақӣ, вазири умури хориҷи ҳукумати Толибон телефонӣ суҳбат карда, масъалаи таҳқиқи муштараки ҳамлаҳо ва тақвияти амнияти марз бо Афғонистонро баррасӣ кард.

Ҳамин тариқ, намояндаи Чин дар нишасти Шӯрои амнияти Созмони Милали Муттаҳид (СММ) аз ҳукумати Толибон* хост, ки дар мавриди кушта шудани шаҳрвандони ин кишвар дар Тоҷикистон дар пайи ҳамлаҳо аз хоки Афғонистон “таҳқиқоти ҷиддӣ” анҷом диҳад.

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани маҷмуъи ҳикояҳои Юнус Юсуфӣ, Нависандаи халқии Тоҷикистон оғоз кард. Дар нашри навбатӣ, қисми якуми ҳикояи “Паррандаи сабзи ишқ” манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин ва ҳикояҳои Антон Чеховро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани роман ва ҳикояҳои китоби "Киштии Нӯҳ"-и Юнус Юсуфӣ оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ ва “Телеграм”-и радиои “Азия-Плюс” метавонед, гӯш кунед.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

– Имрӯз дастаи футболи “Истиқлол” дар доираи даври шашуми марҳилаи гурӯҳии Лигаи қаҳрамонҳои дуюми Осиё-2025/26 бо тими “Гоа”-и Ҳиндустон рақобат мекунад. Бозӣ дар Ҳиндустон доир шуда, соати 21:00 ба вақти Тоҷикистон оғоз мешавад. 

– Имрӯз, соати 17:00 дар Филармонияи давлатии ба номи Акашариф Ҷӯраев консерти Ҷӯрабек Муродов, овозхони маъруфи тоҷик баргузор мешавад. Имрӯз ин ҳофизи тоҷик 83-сола мешавад. Арзиши чипта аз 100 то 250 сомонӣ вобаста ба ҷойи нишаст аст. Чиптаҳоро метавон аз сомонаи ticketon дастрас кард.

ЯК РӮЗИ ТАЪРИХ

Соли 1962 – Аввалин агрегати Нерӯгоҳи барқи обии “Сарбанд” дар дарёи Вахш ба истифода дода шуд.

Соли 1932 – Сохтмони роҳи мошингарди “Душанбе – Қӯрғонтеппа” ба итмом расид.

Соли 1969 – Дар Иттиҳоди Шӯравӣ гурӯҳи ташаббускори ҳимояи ҳуқуқи инсон таъсис дода шуд

Соли 1940 – Театри давлатии академии опера ва балети ба номи Садриддин Айнӣ таъсис ёфт.

ИЗОБРАЖЕНИЕ

Соли 2015 – Амри президенти Тоҷикистон дар бораи ҳавасмандгардонии варзишгарон ва муаррифии ғолибону ҷоизадорони мусобиқаҳои байналмилалӣ аз намудҳои гуногуни варзиш ба имзо расид.

Соли 2021 – Эмомалӣ Раҳмон, раисҷумҳури Тоҷикистон 45 қонун, аз ҷумла Кодекси андозро дар таҳрири нав имзо кард.

ШАХСИЯТҲО

Соли 1908 – Мавлуди Мастибек Тошмуҳаммадов, аввалин генерали тоҷик.

Мастибек Тошмуҳаммадов, раҳбари низомии шӯравӣ ва нахустин генерал аз Тоҷикистони Шӯравӣ буд. Ӯ соли 1937 бо гумони хеши наздик будан бо Шириншоҳ Шоҳтемур аз сафи Артиши Шӯравӣ ихроҷ ва боздошт шуд.

Баъди оғози Ҷанги Бузурги Ватанӣ моҳи августи соли 1941 ӯро дар Артиши Сурх барқарор карданд.

ИЗОБРАЖЕНИЕ

Ӯ соли 1970 бознишаста шуда, 22-юми ноябри соли 1988 аз олам даргузашт.

Соли 1910 – Мавлуди Набиҷон Баротов, навозанда;

Соли 1934 – Зодрӯзи Муҳаммадалӣ Мадиброҳимов, олими соҳаи техника;

Соли 1942 – Мавлуди Ҷӯрабек Муродов, Ҳунарпешаи мардумии Иттиҳоди Шӯравӣ, яке аз сутунҳои мусиқии муосири тоҷик

Ҳунарпешаи халқии Тоҷикистон Ҷӯрабек Муродов зодаи деҳаи Куруди ноҳияи Айнӣ буда, имсол 83-сола шуд.

Ӯ аз маъруфтарин сарояндагони тоҷик шинохта шуда, дар санъати миллӣ саҳми шоён гузоштааст. Ин ҳунарвар бо суруду наво, Тоҷикистонро дар арсаи ҷаҳонӣ муаррифӣ намудааст.

Ҷӯрабек Муродов аз соли 1992 ба ҳайси сароянда дар Театри давлатии мусиқӣ-мазҳакавии шаҳри Хуҷанд фаъолият мекунад. Як замон роҳбари бадеии ансамбли “Шашмақом”-и назди Кумитаи телевизион ва радиои Тоҷикистон буд.

Ӯ дар тӯли фаъолияти эҷодиаш беш аз 2 ҳазор суруд иҷро кардааст, ки тақрибан 450-тояш оҳангҳои худи ӯянд.

Пиромуни эҷоду ҳунари ӯ дар мусоҳибаи "Ҷӯрабек Муродов: Ҳунарманд бояд ба сиёсат ворид нашавад" мутолиа кунед, ки бахшида ба 80-солагиаш ороста шуда буд.

Соли 1943 – Зодрӯзи Ҳуснигул Талбакова, забоншинос, Корманди шоистаи Тоҷикистон;

Соли 1945 – Сайидризо Ализода, мутарҷим ва забоншиноси тоҷик дар синни 58-солагӣ аз олам даргузашт.

ИЗОБРАЖЕНИЕ Сайидризо Ализода

Саидризо Ализода шахсияти таърихӣ ва адиби тоҷик буд, ки дар таърих бо фаъолияти илмиву адабӣ ва сиёсии худ номаш сабт гардидааст. Ӯ бо ибтикори шахсӣ маҷаллаи “Шуълаи инқилоб”-ро таъсис дод, ки дар он мақолаҳои ҷанбаи маърифатӣ ва ошкоркунанда дошта мавриди муҳокима қарор мегирифтанд.

Саидризо Ализода аввалин муаллифи адабиёти таълимӣ ба забонҳои тоҷикӣ баъд аз Инқилоби Октябр мебошад. "Дабистони тоҷик", "Китоби нахустин", "Сарфу наҳви тоҷикӣ", "Маданияти ислом", "Саодатнома" аз ҷумлаи онҳоянд.

Дар солҳои 1919-21 Саидризо Ализода котиби Кумитаи ҳизбии Самарқанд буд. Аммо бо ҷурми “ҷосуси империализми ҷаҳонӣ” дар зиндони Шӯравӣ ба ҳалокат расид.

Англисҳо барои сари Саидризо Ализода 50000 фунт стерлинг муқаррар намуда будаанд. Амири Бухоро низ ӯро куштан мехостааст. Баъдан зимомдорони давлати шӯравӣ ӯро бо гумони "ҷосуси империализми ҷаҳонӣ" дар маҳбас ба қатл расониданд. Саидризо Ализода кӣ буд ва чаро барои сари ӯ 50 ҳазор футн стерлинг муқаррар карда буданд, дар маводи "50 ҳазор фунт стерлинг барои сараш. Саидризо Ализода кӣ буд?" мутолиа кунед.

Соли 1948 – Мавлуди Абдусаттор Абдуҷаббор, арбоби давлатӣ, доктори илмҳои иқтисодӣ;

Соли 1957 – Мавлуди Иззатулло Сатторӣ, доктори улуми бахши байторӣ, профессор;

Соли 1961 – Зодрӯзи Набӣ Набизод, рӯзноманигор, собиқ директори ТВ "Синамо".

Соли 2015 –  Шарофиддин Сайфиддинов, бастакори маъруфи тоҷик, муаллифи суруди “Республикаи ман” пас аз бемории тӯлонӣ дар синни 87-солагӣ дар Душанбе аз олам даргузашт.

ИЗОБРАЖЕНИЕ Шарофиддин Сайфиддинов

Сайфиддинов Шарофиддин бастакори шинохтаи тоҷик, муаллифи суруди маъруфи “Республикаи ман” буда, дар олами санъати тҷоик ҷойгоҳи вижа дорад. Ӯ хатмкардаи омӯзишгоҳҳои мусиқии шаҳрҳои Ленинобод ва Сталинобод буда, соли 1952 шуъбаи миллии Консерваторияи Маскавро хатм карда, ҳамзамон дар факултаи назарияи оҳангсозӣ низ таҳсил кардааст.

Ӯ давоми солҳои 1962-1984 раисии Иттифоқи оҳангсозони Тоҷикистони шуравиро ба уҳда дошт. Ҳамзамон дар Донишкадаи санъати Тоҷикистон дарс мегуфт. Ӯ муассиси Академияи ҳунари мусиқӣ, феълан факултаи санъати Донишгоҳи давлатии Хуҷанд аст.

Миёни тамоми шеърҳое, ки оҳанг бастааст, суруди “Республикаи ман” бештар ба Шарофиддин Сайфиддинов шуҳрату  маъруфият овард.

Номбурда 24-уми декабри соли 2015 дар синни 87 аз олам чашм баст.

Соли 1941 – Онаҷон Азизқулова  химик, доктори илми химия;

Соли 1957 – Ҳомид Қарзай, собиқ президанти Афғонистон.

САНАҲОИ МУҲИМИ ҶАҲОНӢ

Дар ин рӯзи соли 1982 Ҳавопаймои Ан-124 “Руслан” аввалин парвози худро анҷом дод. Ин бузургтарин ҳавопаймои ҳарбӣ – нақлиётӣ дар ҷаҳон буд.

ИЗОБРАЖЕНИЕ

Баландии ҳавопаймо 21,1 метр ва паҳноии болҳояш 73,3 м буда, вазни ниҳоии парвоз 392 тонна буд.  Қувваи борбардориаш 120 тонна ва масофаи парвоз 16 000 км-ро ташкил медод. Соли 1990 ин ҳавопаймо парвози сартосарии ҷаҳонро анҷом дода, дар 72 соату 16 дақиқа 50 ҳазору 5 км-ро тай кард.

24-уми декабри соли 1801 дар шаҳраки саноатии Камборн дар ҷанубу ғарби Англия Ричард Тревитик, механик-конструктор аввалин мошини озмоишии буғиро ба намоиш гузошт. Дар таърих он ҳамчун “фойтуни буғӣ”-и Лондон маъруф шуд, ки аввалин воситаи нақлиёти худгарди патентӣ бо муҳаррики буғӣ барои интиқоли мусофирон буд.

ИЗОБРАЖЕНИЕ

Ҳарчанд Николя Кюнои фаронсавӣ соли 1769 аввалин мошини буғиро сохта буд, вале ба далели хеле суст ҳаракат карданаш барои интиқоли мусофирон "фойтуни буғи-и Лондон аввалин нақлиёти мусофиркашони худгард дар ҷаҳон дониста шуд.

Дар соли 1829 ин фойтун барои мусофирон нақлиёти аз ҳама зудгард ҳисобида мешуд ва суръати ҳаракаташ ба 24 км/соат расид. Баъдтар аспҳо монеи рушди фойтунҳои буғӣ шуданд.

24-уми декабри соли 1865 дар Амрико ташкилоти махфии нажодпарасту террористии "Ку-клукс-клан" таъсис ёфт. Онро баъди шикаст дар Ҷанги шаҳрвандии солҳои 1861–1865 чанд нафар собиқадорони Конфедератсия бунёд карданд.

ИЗОБРАЖЕНИЕ

Аъзои "Ку-клукс-клан" барои худ либоси махсус ихтироъ карда буданд: ҷомаву рӯйпӯшҳои сафед бо сӯрохӣ барои чашм, то ҳам итоатнопазиронро тарсонанд ва ҳам шиносоии аъзои созмон аз ҷониби мақомоти федералӣ номумкин гардад. Дар солҳои 1870-ум, бинобар иҷрои қатлҳо бо бераҳмии махсус, ин созмон расман пароканда эълон шуд. Бо вуҷуди ин, фаъолияти он пурра қатъ нагардид ва соли 1915 дубора эҳё шуд.

Соли 1999 қарор қабул шуд, ки "Ку-клукс-клан" ҳамчун ташкилоти террористӣ эътироф карда шавад.

ВАЗЪИ ҲАВО

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: дар водиҳо шабона -4+1º, рӯзона 3+8º гарм, дар ноҳияҳои кӯҳӣ шабона 4-9º сард, рӯзона -4+1º.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо шабона -3+2º, рӯзона 6+11º гарм, дар доманакӯҳҳо  шабона 1-6º сард, рӯзона 0+5º гарм.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Ҳарорат: дар водиҳо шабона 0-5º сард, рӯзона 3+8º гарм, дар ноҳияҳои кӯҳӣ шабона 2-7º сард, рӯзона -2+3º.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят шабона 3-8º сард, дар баъзе ноҳияҳо то 10-12º сард, рӯзона -2+3º, дар шарқи вилоят шабона 20-25º сард, рӯзона 5-10º сард.

Дар шаҳри Душанбе – Ҳавои  тағйирёбандаи бебориш пешгӯӣ шуда, тормеғ мефарояд. Ҳарорат: шабона 0-2º сард, рӯзона 6+8º гарм.

Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: шабона -1+1º, рӯзона 4+6º гарм.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: шабона 0-2º сард, рӯзона 9+11º гарм.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: шабона 6-8º сард, рӯзона -1+1º.

Дар Telegram, Facebook ва Instagram бо мо бимонед.

Ҳукумати Толибон* дар Афғонистон Нақибуллоҳ Деҳқонзода, консули Афғонистон дар шаҳри Хоруғи Вилояти Мухтори Кӯҳистони Бадахшон (ВМКБ)-и Тоҷикистонро аз кор ронда, фаъолияти консулгарии генералии Афғонистон дар Хоруғро қатъ кардааст.

Дар ин бора рӯзномаи “8-и субҳ” дирӯз, 22-юми декабр хабар дода, навишт, ки Вазорати корҳои хориҷии ҳукумати Толибон фаъолияти консулгарии Афғонистон дар Хоруғро аз 15-уми декабр қатъ кардааст.

Аз Вазорати корҳои хориҷии Тоҷикистон хабари баста шудани консулгарии Афғонистон дар Хоруғро ба “Азия-Плюс” тасдиқ карда, гуфтанд, “ин тасмими худи ҳукумати ҳоким дар Афғонистон аст”.

“Мо дар робита ба ин масъала дар ҷараён ҳастем. Тибқи созишномаҳои байналмилалӣ боз ё қатъ кардани фаъолияти консулгарӣ дар як кишвари дигар кори худи ҳукумати кишварҳо аст”, – гуфтанд аз ин ниҳод.

Рӯзномаи “8-и субҳ” навиштааст, Нақибуллоҳ Деҳқонзода, ки консули ҳукумати пешини Афғонистон дар Хоруғ буд, пас аз тағйири қудрат дар ин кишвар бо Толибон ҳамкорӣ дошт. Ба гуфтаи манбаъ, ӯ 120 ҳазор доллари амрикоиро ба Вазорати корҳои хориҷии ҳукумати Толибон интиқол додааст. Ин кадом маблағ аст, маълум нест.

ИЗОБРАЖЕНИЕ Нақибуллоҳ Деҳқонзода

Расонаҳои Афғонистон гузориш додаанд, ки барканории Деҳқонзода дар ҳоле сурат гирифтааст, ки Толибон тасмим доштанд ӯро ба ҷои Зоҳир Ағбар, сафири ҳукумати пешини Афғонистон дар Тоҷикистон, ба ҳайси сафири нав муаррифӣ кунанд.

Мақомоти расмии ҳукумати Толибон то ҳол дар робита ба баста шудани консулгарии Хоруғ изҳороти расмӣ нашр накардаанд.

Нақибулло Деҳқонзода моҳи ноябри соли 2023 ва пас аз ду соли ба қудрат расидани ҳукумати Толибон дар Афғонистон эълон карда буд, ки Консулгарии Афғонистон дар шаҳри Хоруғи Тоҷикистон расман фаъолият мекунад ва он мустақил буда, мустақиман таҳти ҳимоят ва ҳидояти Вазорати умури хориҷии ҳукумати Толибон қарор дорад.

Ин изҳорот дар посух ба баёнияи Зоҳири Ағбар, ки он замон гуфта буд, консулгарии Афғонистон дар Хоруғ “барои надоштани имконоти иқтисодӣ” аз кор мондааст, садо дода буд.

Вале Вазорати корҳои хориҷии Тоҷикистон моҳи феврали соли 2024 изҳор дошт, ки Консулгарии Афғонистон дар Хоруғ таҳти назорати Толибон қарор надорад ва Тоҷикистон ба ҳеҷ як намояндаи ин гурӯҳ парвонаи кор (аккредитатсия) надодааст.

"Ҳайати кормандони Консулгарии Афғонистон дар Хоруғ баъди соли 2020 иваз нашудаанд. Одамоне кор мекунанд, ки дар соли 2020 аккредитатсия гирифта буданд. Агар онҳо (Толибон, дар назар аст, -муаллиф) кадом як раиси навро муаррифӣ мекунанд, ин кори худашон аст", – гуфта буд он замон Сироҷиддин Муҳриддин, вазири умури хориҷаи Тоҷикистон.

Чанд рӯз қабл аз ин, Хайриддин Усмонзода, директори Маркази тадқиқоти стратегии Тоҷикистон гуфта буд, "ҳадафи фаъолияти консулгарӣ дуруст ба роҳ мондани фаъолияти бозорҳои наздимарзӣ аст".

Дар ҳамин ҳол, расонаҳои Афғонистон гузориш медоданд, ки консулгарии ин кишвар дар шаҳри Хоруғ амалан фаъолият мекунад. Ҳатто хабарҳо дар робита ба боздиди як ҳайати гурӯҳи "Толибон" аз ин консулгарӣ дар моҳи феврали соли 2023 баъди осеб дидани бинои он дар пайи фаромадани тарма дар ин шаҳр расонаӣ шуда буд. Ҳарчанд омадани онҳоро ҳукумати Тоҷикистон тасдиқ ё рад накарда буд.

Бояд гуфт, Тоҷикистон ягона кишвар дар Осиёи Марказӣ аст, ки ба таври расмӣ мегӯяд, бо Толибон равобити мустақим надорад, аммо гузоришҳо аз мулоқоту машвари дуҷониба, ки вақтҳои охир зиёд нашр мешаванд, гумони нармиш дар сиёсати Тоҷикистон дар қиболи Толибонро зиёд мекунад.

Аз ҷумла, чанде пеш расонаҳо аз сафари як ҳайати дигари Тоҷикистон зери раҳбарии Заробиддин Файзуллозода, муовини раиси вилояти Хатлон ба шаҳри Қундуз ва мулоқоти ӯ бо Мулло Муҳаммадхон, волии Толибон дар ин вилоят гузориш дода буданд.

Пеш аз ин хабарҳо дар бораи сафари Юсуф Вафо, волии вилояти Балх ба Душанбе ва дидораш бо  бо Саймумин Ятимов, раиси Кумитаи давлатии амнияти миллии Тоҷикистон ва Саидмукаррам Абдулқодирзода, раиси Шӯрои уламо ва муфтии Тоҷикистон расонаӣ шуда буд. 

Пештар аз ин, боз ҳам расонаҳои Афғонистон навишта буданд, ки Саймумин Ятимов ба Кобул сафар карда, бо мақомдорони Толибон вохӯрдааст. Аммо мақомоти Тоҷикистон ҳеҷ як аз ин сафару дидорҳоро тасдиқ ё рад накарданд.

*Дар Тоҷикистон гурӯҳи террористӣ эътироф шудааст.

Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.

Дар Telegram, Facebook ва Instagram бо мо бимонед.

Шаби 21-22-юми декабр дар деҳаи Тангаии шаҳри Ваҳдат Шаби Ялдо ё Чилла бо тамоми вижагиҳояш ҷашн гирифта шуд. Барои таҷлили ин ҷашни бостонӣ, сокинони маҳаллӣ, фарҳангиён ва чанде аз эрониёни муқими Тоҷикистон дар ин деҳаи канори Душанбе ҷамъ омаданд.

Ташаббускори ин маросим Шаҳобиддин Фаррухёр, эронии муқими Тоҷикистон аст, ки Ялдоро ҳамасола ҷашн мегирад.

Суфраи ин шабро аз як силсила ашё ва ғизоҳои рамзӣ ороста буданд. Дар рӯи хон асосан меваҳои сурхранг, чун тарбуз, анор, хурмо, лаблабу, гузошта буданд, ки рамзи баракат аст.

Шаби Ялдо дар ин деҳа чӣ гуна ҷашн гирифта шуд, дар гузориши мо бинед:

Имсол шаби Ялдоро дар чанд ҷойи дигар, аз ҷумла Сафорати Эрон дар Душанбе ва чанде аз тарабхонаҳои пойтахт низ ҷашн гирифтанд.

Ялдо шаби дарозтарини сол аст ва пас аз он рӯзҳо дарозтару шабҳо ку‌тоҳтар мешаванд. Ҳарчанд он дар Тоҷикистон ба таври оммавӣ таҷлил намегардад, вале чанд соли охир бештар мардумӣ мешавад.

Дар Telegram, Facebook ва Instagram бо мо бимонед.

Як корманди зеристгоҳи барқии 35/10 "Кангурт" (ноҳияи Темурмалик), ки ба Шабакаҳои барқии минтақаи Кӯлоб таллуқ дорад, ба дуздии барқ гумонбар дониста шуда, бар зиддиаш парвандаи маъмурӣ боз гардидааст. Дар ин бора Оҷонсии назорат дар соҳаи энергетика рӯзи 20-уми декабр хабар дода, аз ин корманд Шуҳрат Самиев ном бурдааст.

Манбаъ гуфтааст, ки гумонбар “аз бинои навбатдорӣ то хонаи истиқоматиаш, ки дар наздикии зеристгоҳ ҷойгир аст, хатти барқро пинҳонӣ кашида, бидуни пайвастшавӣ ба ҳисобкунак аз нерӯи барқ ғайриқонунӣ истифода мебурдааст”.

“Гузашта аз ин, бинои навбатдорони зеристгоҳи барқи дар ҳолати садамавӣ қарор дошта, навбатдорон аз таҷҳизотҳои худсохти барқӣ истифода менамуданд”, – гуфтааст Оҷонсӣ.

Ин ниҳод зикр кардааст, ки нисбати Самиев парванди маъмурӣ боз шудааст, вале нагуфтааст, бо кадом моддаи Кодекси ҳуқуқвайронкунии маъмурии Тоҷикуистон.

Назари худи Шуҳрат Самиев дар ин маврид маълум нест.

Ошкор шудани дуздии барқ аз сӯи як корманди шабкаҳои барқ дар ҳолест, ки Эмомалӣ Раҳмон, раисҷумҳури кишвар чанде пеш дар паёми солонааш низ аз тарафи кормандони соҳа сӯисфтифода аз мансабро танқид кард.

Ӯ гуфта буд, ки “аз тарафи баъзе кормандони соҳа, пардохтҳо пурра ба ҳисоб гирифта намешуданд ва талафоти беасоси нерӯи барқ ба таври сунъӣ ба зимаи аҳолӣ ва дигар гурӯҳҳои истифодабарндагони нерӯи барқ гузаронида мешуд".

Ӯ афзуд, ки маблағҳоро “пурра аз аҳолӣ ҷамъоварӣ мекарданд ва маблағро сӯистифода карда” аҳолиро қарздор мекарданд.

Тибқи иттилои расмӣ, соли ҷорӣ талафоти нерӯи барқ дар кишвар 3 миллиард кВт соатро ташкил додааст.

Ёдрас мешавем, ки имсол ҷазо барои истифодаи ғайриқонунии нерӯи барқ ва саркашӣ аз пардохти пули он сангин шуд. Бар асоси Кодекси ҷиноятӣ касоне, ки қоидаҳои истифодаи нерӯи барқро вайрон ва аз пардохти пули он саркашӣ мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол зиндонӣ мешаванд.

Пурзӯр кардани ҷазо барои истифодаи ғайриқонунии нерӯи барқ дар ҳолест, ки ҳамасола дар фасли тирамоҳу зимистон дар кишвар маҳдудият ё “лимит”-и барқ ҷорӣ мешавад. Имсол он шадидтар шуда, тибқи мушоҳида, аҳолӣ дар як шабонарӯз аз 2 то 4 соат нерӯи барқ доранд.

Дар Telegram, Facebook ва Instagram бо мо бимонед.

Сар аз 21-уми декабр дар чанде аз гӯшаҳои шаҳри Душанбе намош ва фурӯш (ярмарка)-и маҳсулоти ниёзи аввал оғоз шуд. Он ба муносибати Соли нав ташкил шуда, то рӯзи охири соли равон идома мекунад. 

Дар ярмарка деҳқонон аз манотиқи гуногуни кишвар маҳсулоти кишоварзӣ ва савдогарон маҳсулоти дигари ниёзи аввалро ба фурӯш бароварданд. Ба гуфтаи шаҳрдории Душанбе, дар ин нуқтаҳо сокинон метавонанд маҳсулоти ниёзи аввалро бо нархҳои арзонтар харидорӣ кунанд.

ИЗОБРАЖЕНИЕ

“Азия-Плюс” аз яке аз ин намош ва фурӯш, ки дар назди боғи “Куруши Кабир” (назди Театри опера ва балети ба номи С. Айнӣ) ташкил шуда буд, дидан кард, ки то чӣ андоза нархи маҳсулоти ярмарка аз нархи бозор арзонтар аст ва сифати хуб доранд.

Муқоисаи нархи маҳсулоти ярмарка бо бозор:

ИЗОБРАЖЕНИЕ

Тавре маълум шуд, нархи маҳсулот нисбат ба нархи бозор он қадар фарқияти зиёде надоранд, аммо нархи гӯшт, ки вақтҳои охир сокинони кишварро нигарон кардааст, дар ярмарка ба таври назаррас поён аст. Нархи як килограмм гӯшти гов 65 сомонӣ ва гӯшти гусфанд 75 сомонӣ аст, дар ҳоле, ки дар бозор нархи он аз 100 сомонӣ оғоз меёбад.

Савдогарон дар суҳбат бо мо гуфтанд, гӯште, ки онҳо ба фурӯш гузоштанд, аз Беларус аст ва айни ҳол он дар тамоми бозорҳои кишвар датсрас аст. Бо вуҷуди он ки бархеҳо нигаронӣ карданд, ки нисбат ба гӯшти маҳаллӣ мазза ва тамъи гӯшти белорусӣ поинтар аст, натавонистем маълум кунем, ки то чӣ андоза сифати онҳо хуб аст.

ИЗОБРАЖЕНИЕ

Бештари маҳсулоти кишоварзие, ки дар ярмарка дидем ва аксбардорӣ кардем, зоҳиран сифати хуб ва харидорони зиёд доштанд.

Дар ҳамин ҳол, яке аз сокинони шаҳр гуфт, ки чанд маҳсулоте, ки аз ярмарка харидорӣ карда буд, он қадар сифати хуб надоштанд, аз ҷумла биринҷ.

Фаррух Ғаффоров, сокини ноҳияи Мастчоҳ, ки асал ба фурӯш бароварда буд, гуфт, соли 15-ум аст дар чунин ярмакаҳо ширкат меварзад ва ин дафъа ӯро “Тоҷикматлубот” даъват кардааст, чун ӯ аъзои ин ниҳод ҳаст. Ба гуфтаи ӯ тамоми харҷи роҳ ва истиқомат аз ҷониби ин ниҳод пардохт шуд.

Дар ҳамин ҳол кишоварзоне, ки аз ноҳияҳои Рашт ва Тоҷикобод омада буданд гуфтанд, ки деҳқонони минатақа бо навбат дар чунин ярмаркаҳо иштирок мекунанд ва харҷи иловагии онҳо “хизмат барои миллат” аст. Ҳамчунин, ба гуфтаи онҳо, маҳсулотҳои кишоварзии ба фурӯш баровардашуда, ҳосили меҳнати худи онҳост. 

Бояд гуфт, ки ин намош ва фурӯш бо қарори раиси шаҳри Душанбе ба муносибати соли нав аз сӯи Оҷонсии захираҳои давлатӣ, “Тоҷикматлуобот” гузаронида мешавад.

Ярмаркаҳо дар суроғаҳои зерин идома доранд:

ИЗОБРАЖЕНИЕ

Маъмулан чунин ярмаркаҳо пеш аз ҷашнҳо ташкил шуда, маҳсулоти хӯрокворӣ бо нархи арзонтар аз бозор ба фурӯш гузошта мешаванд. Вале баъзан сокинон аз сифати маҳсулоте, ки дар ин ярмаркаҳо ба фурӯш гузошта мешавад, нигаронӣ мекунанд. 

Дар Telegram, Facebook ва Instagram бо мо бимонед.