Дар Тоҷикистон гирифтани иҷозатномаи истифодаи шишаҳои сиёҳу хира дар мошин тариқи онлайн имконпазир шуд. Дар ин бора аз Оҷонсии навоварӣ ва фанновариҳои нави Тоҷикистон ба “Азия-Плюс” хабар дода, гуфтанд, ки ронандаҳо ин иҷозатномаро тавассути Пойгоҳи ягонаи хидматрасониҳои давлатӣ – "ekhizmat.tj" метавонанд ба даст оранд.

Ба гуфтаи манбаъ, ҷорӣ шудани ин хидматрасонӣ дар шакли электронӣ ба шаҳрвандон имкон медиҳад, ки ба мақомоти дахлдор наомада, дар муҳлати то 1 дақиқа ҳуҷҷатро дарёфт кунанд. Масъулин ҳадаф аз ин иқдомро, баланд бардоштани сатҳи дастрасӣ, шаффофият ва самароварии хидматрасониҳои давлатӣ мегӯянд.

Барои ин, шаҳрванд бояд дар Пойгоҳи "ekhizmat.tj" сабтином кунад ва аз шиносоии ҳувият (идентификатсия) гузарад. Сипас, хидматрасониро дар пойгоҳ пайдо карда, маълумоти лозимаро ворид ва арзиши онро пардохт кунад. Нархи иҷозатнома вобаста ба соли барориши мошинҳо муайян карда мешавад. Раванди шиносоии ҳувият дар ин навори мо нишон дода шудааст.

Бояд гуфт, дар Тоҷикистон аз соли 2000 то соли 2010 сиёҳ кардани шишаи мошинҳо мамнӯъ буд. Мақомот инро “ба вазъи иҷтимоию сиёсии кишвар ва мубориза бо афзоиши ҷинояткорӣ” марбут медонистанд.

Аммо баъдан, дар пайи дастури Эмомалӣ Раҳмон, раисҷумҳури кишвар, сиёҳ кардани шишаи мошин иҷоза шуд, аммо муқаррар шуд, ки пули аз ин ҳисоб воридшуда, барои сохтмони НБО “Роғун” равона шавад.

Ҳамакнун, соҳибони мошинҳои истеҳсолашон то 31-уми декабри соли 2004 барои соли 2026 65 нишондиҳанда барои ҳисобҳо, яъне 5 ҳазору 70 сомонӣ пардохт мекунанд.

Соҳибони мошинҳои сохти соли 2005 ва баъди он, 84 нишондиҳанда барои ҳисобҳо ё 6 ҳазору 552 сомонӣ пардохт мекунанд.

Дар Telegram, Facebook ва Instagram бо мо бимонед.

Ширкатҳои барқрасони кишвар мегӯянд, соли гузашта дар пайи ошкор шудани камбудҳо дар таъмини барқ ба аҳолӣ, 125 корманди шабакаҳои барқрасонӣ ба ҷавобгарии ҷиноӣ кашида ва аз кор ронда шудаанд. Дар ин бора Ҷомӣ Умарзода, намояндаи “Шабакаҳои тақсимоти барқ” дар нишасти матбуотии рӯзи 3-юми феврал ба хабарнигорон иттилоъ дод.

Ба гуфтаи номбурда, дар пайи қабули ҷазо барои истифодаи ғайриқонунии нерӯи барқ “камбуди зиёд дар кори кормандони барқрасонӣ ошкор шудааст”.

“Дар соли 2025 нисбат ба 125 корманд аз ҷониби сохторҳои ҳифзи ҳуқуқ парвандаи ҷиноӣ боз гардида, онҳо аз кор озод шуданд. Ҳамчунин, баъзе парвандаҳо дар тафтишот буда, баъди анҷоми тафтишот маълумот пешниҳод мекунанд”, – гуфт Умарзода.

ИЗОБРАЖЕНИЕ Аз рост: Ҷомӣ Умарзода

Зимнан, аз Оҷонсии назорат дар соҳаи энергетика рӯзи 4-уми феврал ба “Азия-Плюс” гуфтанд, ки соли гузашта 406 корманди  идораҳои барқрасониро барои қоидавайронкунӣ дар истифодаи барқ дар ҳаҷми 293 ҳазор сомонӣ ҷарима кардаанд.

Ба иттилои манбаъ, аз ин 406 нафар 375 корманди “Шабакаҳои тақсимоти барқ”, 12 корманди “Шабакаҳои интиқоли барқ”, 9 корманди ширкати “Барқи Тоҷик” ва 10 корманди “Помир Энерҷӣ” ҳастанд.

Аз ин ниҳод гуфтанд, ки онҳо бар асоси моддаҳои 394 ва 397-и Кодекси ҳуқуқвайронкунии маъмурӣ, "риоя накардани қоидаҳои истифодаи захираҳои энергетикӣ ва қоидаҳои истифодаи таҷҳизот, асбобҳо ва дастгоҳҳои барқиву гармидиҳанда" ҷарима шудаанд.

ИЗОБРАЖЕНИЕ Акси марбут

Аммо аз Оҷонсӣ ҳаҷми ҷаримаҳои ситонидашударо нагуфтанд.

Пештар аз ин, намояндаи Оҷонсии назорат дар соҳаи энергетика ба “Азия-Плюс” гуфта буд, ки дар соли 2025 аз сӯйи кормандони “Шабакаҳои тақсимоти барқ”  дар умум 321 млн 464 ҳазор кВт соат нерӯи барқ изофанависӣ шуда, аз ин ҳисоб ба буҷаи кишвар 106 млн 393 ҳазор сомонӣ зарар ворид шудааст.

Вале аз ин ниҳод нагуфтанд, ки ин изофанависӣ аз сӯи чанд корманди шабакаҳои барқ содир шуда, чанд нафар барои ин кирдор ҷазо гирифтаанд.

Оҷонсии назорат дар соҳаи энергетика борҳо аз боздошти кормандони шабакаҳои барқ ва ё боз шудани парванда бар зидди онҳо барои “дуздии барқ” хабар дода буд Аз ҷумла, моҳи январи имсол аз ду ҳолати “дуздӣ”-и барқ бо роҳи пинҳонӣ кашидани хатти барқ аз зеристгоҳ то хонаи истиқоматӣ аз сӯи ду корманди шабакаҳои тақсимоти барқ хабар дода буданд. Оҷонсӣ гуфта буд, ки барои ин кирдор, ҳардуи онҳоро дар ҳаҷми 2 ҳазору 250 сомонӣ ҷарима кардаанд.

Бояд гуфт, ки “шикори барқдуздон” замоне оғоз шуд, ки соли гузашта ҷазо барои истифодаи ғайриқонунии нерӯи барқ ва саркашӣ аз пардохти пули он сангин шуд. Бар асоси Кодекси ҷиноятӣ, касоне, ки қоидаҳои истифодаи нерӯи барқро вайрон ва аз пардохти пули он саркашӣ мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол зиндонӣ мешаванд. Ҷазои маъмурӣ ё ҷарима ҳам барои “дӯздӣ”-и барқ низ зиёд шуд.

Дар Telegram, Facebook ва Instagram бо мо бимонед.

Хайриддин Усмонзода, роҳбари Маркази тадқиқоти стратегӣ (МТС) дар Тоҷикистон гуфт, ки изҳороти Владимир Соловёв ва Александр Дугин – ду мубаллиғи рус алайҳи кишварҳои Осиёи Марказӣ ва Қафқоз мавқеи расмии Русия нест ва посух ба ин изҳорот дар ҳадди баробарсатҳ дода шуд. Пештар вазири корҳои хориҷии Тоҷикистон он ду изҳоротро “ҳангомаҷӯёна” гуфта буд.

Усмонзода имрӯз зимни нишасти хабарӣ дар посух ба саволи рӯзноманигори “Азия-Плюс” иброз дошт, ки аз нигоҳи таҳлили коршиносӣ ба мавқеъи ин ё он муассиса, ташкилот ва ё доираи коршиносӣ, таълимӣ ё илмӣ бояд посухи баробарсатҳ дода шавад.

“Тоҷикистон ҳам бо пайгирӣ  аз посухи усулӣ кӯшиш мекунад, ки посухҳо баробарсатҳ бошанд. Ин яке аз талаботи муҳими равобити дипломатӣ аст”, – таъкид кард Усмонзода.

Вай афзуд, “мо пеш аз ҳама вобаста ба мундариҷа ва чӣ гунагии арзиши расмӣ доштани ин изҳорот, мундариҷаи изҳороти Вазорати корҳои хориҷии Русияро ба инобат мегирем. Дар изҳороти Вазорати корҳои хориҷии Русия нисбати кишварҳои Осиёи Марказӣ ҳусни эҳтиром ва хусусан эҳтиром ба якпорчагӣ ва мустақилияти онҳо изҳор шудааст”.

ИЗОБРАЖЕНИЕ Хайриддин Усмонзода

Хайриддин Усмонзода гуфт, ки тибқи посухи усулӣ Вазорати корҳои хориҷии Тоҷикистон ҳам вокуниш кард, ки Маркази тадқиқоти стратегӣ ҳам онро ҷонибдорӣ мекунад.

Роҳбари МТС инчунин иброз дошт, ки “дар саҳифаҳои ахбори омма мо ҳам дидем, ки баробарсатҳ бо ҳамин мақомҳо – яке рӯзноманигор, дигаре намояндаи илм – посухҳо рӯйи кор омаданд ва мо онро муносиб медонем”.

Изҳороти мубаллиғони рус дар расонаҳои давлатӣ интишор шуд ва, ба қавли коршиносон, “тобиши мавқеи расмии Русия”-ро гирифт. Аммо дар расонаҳои давлатии Тоҷикистон мо ба ин изҳорот посухеро надидем.

Дар ин робита, ин мансабдори тоҷик бо ишора ба вокуниши вазири корҳои хориҷии Тоҷикистон гуфт, ки “изҳороти мақоми ваколатдори Тоҷикистон дар кадом саҳифае, ки нашр нашавад, арзиши ягонаи расмӣ дорад”.

Вазир изҳороти онҳоро “назарияҳои ҳангомаҷӯёна” номид

Рӯзи 6-уми феврал Сироҷиддин Муҳриддин, вазири корҳои хориҷии Тоҷикистон зимни нишасти хабарӣ изҳороти Александр Дугин ва Владимир Соловёвро “амбитсияҳои шахсии чеҳраҳои расонаӣ” ва “назарияҳои ҳангомаҷӯёнаи онҳо” номид.

ИЗОБРАЖЕНИЕ Сироҷиддин Муҳриддин

“Мавқеи мо комилан возеҳ аст, заминаи муколамаи давлатӣ байни Душанбе ва Маскавро на амбитсияи шахсони алоҳидаи расонаӣ ва на назарияҳои ҳангомаҷӯёнаи онҳо, балки принсипҳои устувори ҳуқуқи байналмилалӣ ва маҷмӯи васеъи созишномаҳои дуҷониба, ки аз озмоиши замонии муносибатҳо гузаштаанд, ташкил медиҳад”, – гуфт Сироҷиддин Муҳриддин.

Соловёву Дугин чӣ гуфтанд?

Владимир Соловёв, рӯзноманигори мубаллиғи Русия, рӯзи 10-уми январ дар барномаи “Соловьёв Live” Арманистон ва кишварҳои Осиёи Марказиро “минтақаи зери нуфузи Русия” номид ва гуфт, ки аз даст додани ин кишварҳо барои Маскав “мушкили бағоят ҷиддӣ” аст.

Ӯ савол гузошт: агар барои таъмини амнияти миллӣ дар Украина “амалиёти махсуси низомӣ” оғоз шуд, пас чаро Русия ҳамин корро “дар дигар нуқтаҳои зери нуфузаш” карда наметавонад? Соловёв таъкид кард, ки ба ҳуқуқ ва низоми байналмилалӣ набояд пойбанд буд.

Баъд аз ин изҳорот, Александр Дугин, яке аз ғояпардозон ва мубаллиғони сиёсати Кремл, ки аз машваратчиёни роҳбари Русия ном бурда мешавад, гуфт, замони давлатҳои миллӣ ба охир расидааст ва ошкоро зидди соҳибихтиёрии кишварҳои Осиёи Марказӣ, аз ҷумла Тоҷикистон ҳарф зад.

“Бо мавҷудияти Арманистони мустақил, Гурҷистони мустақил, Озарбойҷони мустақил, Қазоқистони мустақил, Ӯзбекистони мустақил, Тоҷикистони мустақил ва Қирғизистони мустақил розӣ шудан мумкин нест. Дар модели нави ҷаҳонӣ ҳеҷ чиз мустақил буда наметавонад. Соҳибихтиёрӣ тамом шуд, давлатҳои миллӣ ба гузашта тааллуқ доранд”, – гуфт Дугин.

Идеологи рус таъкид кард, қаламравҳое, ки зери назорати Русия нестанд, ё бояд қисми иттиҳоди Русия шаванд, ё ба пойгоҳҳои ҳарбии Ғарб, НАТО ё Чин табдил хоҳанд ёфт. Ба гуфтаи ӯ, “роҳи миёна вуҷуд надорад”.

Изҳороти таҳдидомези Соловёв ва Дугин дар ҷомеаи ин давлатҳо нигаронӣ ва вокунишҳоро ба вуҷуд овард. Ҳарчанд мақомоти расмии кишварҳои Осиёи Марказӣ ба ин таҳдидҳо вокуниши ошкор накардаанд, аммо ҷомеаи шаҳрвандӣ ва чеҳраҳои алоҳида чунин изҳоротро маҳкум карданд.

Коршиносони тоҷик ин суханонро, ки бидуни ризоияти Кремл ҳеҷ гоҳ аз телевизиони давлатии зери назорати комили ин ниҳод садо намедиҳад, кӯшиши нишон додани қудрат дар шароити заифии роҳбурдӣ ва заминасозӣ барои эҳтимоли дахолати оянда тафсир карданд.

Вокуниши сиёсатмадору низоъшиносу коршиноси масолили муҳоҷиратро муфассал дар ин мақолаи “Азия-Плюя” мутолиа кунед: “Намоиши қудрат дар ҳоли заъф”. Изҳороти “мубаллиғони Кремл” то куҷо баёнгари нақшаи Русия ва таҳдид ба кишварҳои Осиёи Марказӣ аст?.

Дар Telegram, Facebook ва Instagram бо мо бимонед.

Намояндагони Ваколатдори ҳуқуқи инсон дар Тоҷикистон (Омбудсмен) соли гузашта бо чанд рӯзноманигори зиндонӣ ва дигар маҳкумшудагон дар маҳбасҳои Тоҷикистон мулоқот кардаанд. Ҳусниддин Нидоев, намояндаи ин ниҳод имрӯз дар нишасти матбуотии Омбудсмен гуфт, моҳи декабри соли 2025 аз зиндони занонаи Норак боздид карда, аз ҷумла бо Рухшона Ҳакимова, рӯзноманигори як сол пеш зиндонишудаи тоҷик ва чанд зиндонии дигар суҳбат кардааст.

Ба қавли ӯ, Рухшона Ҳакимова аз вазъи риояи ҳуқуқҳояш дар зиндон изҳори қаноат ва муносибати кормандонро хуб арзёбӣ кардааст. Ҳамчунин, ӯ гуфтааст, дар зиндон забони англисӣ меомӯзад.

Ин нуктаро чанд рӯз пеш, дар матлабе, ки баъди расо як соли эълони ҳукми Рухшона Ҳакимова “Азия-Плюс” таҳия кард, модари рӯзноманигор ҳам зикр карда буд, ки муфассал метавонед дар ин пайванд тамошо кунед.

“Гурӯҳи санҷишии Ваколатдори ҳуқуқи инсон дар рафти санҷиши зиндонҳо, на аз таштишот ва парвандаҳои маҳкумшудагон мепурсад, балки вазъи риояи ҳуқуқҳои маҳкумшудагонро дар муассисаҳои ислоҳӣ месанҷад. Намояндагони мо аз зиндониён мепурсад, ки кӣ бо онҳо суҳбати алоҳида кардан мехоҳад. Агар касе хоҳиш дошта бошад, мо бо онҳо суҳбат мекунем”, – илова кард Нидоев.

ИЗОБРАЖЕНИЕ Ҳусниддин Нидоев

Чаро дархости пайвандони Пирмуҳаммадзода рад шуд?

Умед Бобозода, ваколатдори ҳуқуқи инсон ба суоли рӯзноманигор дар робита ба иҷоза нагирифтани пайвандони Абдусаттор Пирмуҳаммадзода, рӯзноманигори чор сол пеш зиндонишудаи тоҷик, ки мехостаанд, ӯро берун аз муассисаи ислоҳӣ ҷарроҳӣ кунанд, посухи мушаххас надод.

Танҳо ишора кард, ки “шояд вобаста ба ҷинояти шахс бошад”.

Ба гуфтаи пайвандони Абдусаттор Пирмуҳаммадзода, ӯ аз моҳи март то моҳи августи соли 2025, дар ҳуҷраи ҷаримавии зиндони шаҳри Хуҷанд (ШИЗО) қарор дошт ва пас аз хуруҷи бемориаш ӯро моҳи сентябр аввал ба Душанбе ва пасон ба бемористони зиндони шаҳри Ваҳдат интиқол доданд. Пайвандонаш гуфтанд, дар Сарраёсати иҷрои ҷазои ҷиноятӣ иҷоза надодаанд, ки Пирмуҳаммадзода берун аз маҳбас ҷарроҳӣ шавад ва сабабашро мавҷуд будани имкони ҷарроҳӣ дар бемористони зиндони шаҳри Ваҳдат гуфтанд.

Пирмуҳаммадзода кист ва чаро зиндонӣ шуд, дар ин матлаби мо хонед.

ИЗОБРАЖЕНИЕ Умед Бобозода

Шароити табобат дар зиндон

Омбудсмени тоҷик дар робита ба вазъи саломатӣ ва раванди муолиҷаи чеҳраҳои шинохтаи тоҷик, аз ҷумла Ҳамрохон Зарифӣ, Аҳмадшоҳ Комилзода ва дигарон низ посух надод ва дубора таъкид кард, ки шароити муолиҷа ва ҷарроҳӣ дар муассисаи ислоҳӣ мавҷуд аст.

Умед Бобозода илова кард, зиндониёне, ки вазъи саломатиашон нохуб мешавад, дар бемористони зиндони шаҳри Ваҳдат табобат мегиранд. Ба гуфтаи ӯ, дар ин муассиса маҳкумшудагони 18 зиндони дигар имкони табобат доранд.

“Аз он ҷо ду-се маротиба бевосита худам боздид кардаам. Тамоми доруворӣ ва табибон дастрас буда, ҳатто аз ҳисоби худи зиндониён табибони боқувват ҳастанд, ки метавонанд ҷарроҳӣ ҳам кунанд”, – мегӯяд Бобозода.

Ба гуфтаи ӯ, ҳамчунин дар таҷриба буд, ки  якчанд зиндоние, ки бояд амалиёти ҷарроҳии вазнин мегузарониданд, дар беморхонаи “Ёрии таъҷилӣ” ҷарроҳӣ шуда, ба муассисаи ислоҳӣ баргардонида шудаанд.

“Албатта, дилхоҳ падару модар мехоҳад, ки дар берун аз зиндон табобат гиранд”, – гуфт ӯ.

Ҳусниддин Нидоев илова кард, ки агар вазъи саломатии маҳкумшудае нохуб шавад ва зарурат пайдо шавад, онҳо ба муассисаи Я3/13 (бемористони зиндони шаҳри Ваҳдат) барои ташхису муолиҷа ва ҷарроҳӣ интиқол дода мешаванд.

Ба қавли ӯ, зиндониён имкон доранд, ки аз берун духтури худро бурда, дар ҳамон ҷо ташхис ва муолиҷа кунанд.

Дар Telegram, Facebook ва Instagram бо мо бимонед.