Нархи раводид барои вуруд ба Туркия аз 60 то 190 доллар муқаррар шудааст. Дар ин бора сафорати Туркия дар Тоҷикистон хабар медиҳад.
Сафорат ба посухи корбарон дар саҳифаи фейсбукии худ ҷавоб навишт, ки “арзиши раводиди яккаратаи Туркия 60 доллар ва раводиди бисёркарата 190 долларро ташкил медиҳад”.
Аммо онҳое, ки парвози транзитӣ доранд, яъне ба Туркия ворид намешаванд ва тариқи фурудгоҳи ин кишвар ба кишвари сеюм сафар мекунанд, ба гирифтани раводид зарурат надоранд.
Бояд гуфт, ки Туркия барои шаҳрвандони Тоҷикистон низоми раводидро ҷорӣ кард.
Тавре аз Вазорати корҳои хориҷии Тоҷикистон ба “Азия-Плюс” хабар доданд, Туркия рӯзи 6-уми апрел ҷониби Тоҷикистонро тавассути роҳҳои дипломатӣ расман аз ин тадбир огоҳ кардааст.
Акнун аз 20-уми апрел шаҳрвандони Тоҷикистонро лозим меояд, ки барои сафар ба ин кишвар раводид дарёфт намоянд.
Қаблан шаҳрвандони Тоҷикистон метавонистанд бе раводид вориди Туркия шаванд ва 90 рӯз он ҷо бошанд.
