Алмаз Сайфиддинов, шореҳи иқтисодӣ ва роҳбари пешини “Бунёди Сорос” дар Тоҷикистон, дар Амрико даргузаштааст. Ӯ дар моҳи августи соли ҷорӣ муқими Амрико шуда буд.
Наздикони хонаводаи Алмаз Сайфиддинов рӯзи 24-уми октябр ба “Азия-Плюс” марги ӯро тасдиқ карданд. Сабаби марги ӯ то ҳол маълум нест.
Ба қавли пайвандонаш, ҷасади Алмаз Сайфиддиновро ба Душанбе оварда, ба хок месупоранд.
Алмаз Сайфиддинов аз ҷумлаи иқтисоддонҳои тоҷик буд, ки андешаҳояшро дар мавзуъҳои иқтисодӣ ва мушкили ҷомеа баён карда, дар "Фейсбук" саҳифаеро бо номи “Хабарҳои иқтисодии Тоҷикистон” роҳандозӣ карда буд ва ҳар навигарии иқтисодӣ ва андешаву таҳлилҳои худро онҷо нашр мекард.
Вай солҳои 2016 то 2021 раҳбарии шӯрои “Бунёди Сорос” дар Тоҷикистонро ба ӯҳда дошт.
Гурӯҳи расонаҳои "Азия-Плюс" ба пайвандони марҳум ҳамдардии амиқ изҳор намуда, барояшон сабри ҷамил мехоҳад.
