Президенти Русия Владимир Путин муҳлати қонунӣ гардонидани будубоши шаҳрвандони хориҷиро дар қаламрави Русия, ки қоидаҳои муҳоҷиратро риоя накардаанд, то 10 сентябр дароз кард. Касоне, ки то ин муҳлат мақоми ҳузури худро қонунӣ намесозанд, бояд кишварро тарк кунанд. Амри марбутаи сарвари давлати Русия дар портали санадҳои ҳуқуқӣ нашр шудааст.
Ин ҷо сари шаҳрвандони хориҷӣ ва шахсони бешаҳрвандие сухан меравад, ки ба рӯйхати шахсони таҳти назорат дохил шудаанд. Ин рӯйхат аз 5 феврал мавриди амал қарор гирифт. Ба ин феҳрист афроде дохил мешаванд, ки барои ҳузур доштан дар қаламравҳои Русия асосҳои қонунии худро аз даст додаанд.
Нахуст дар амр пешбинӣ гардида буд, ки онҳо бояд то 30 апрел будубоши худро қонунӣ созанд ё кишварро тарк кунанд. Акнун чунин муҳоҷирон боз қариб 4,5 моҳи дигар вақт доранд, ки ҳузури худро қонунӣ кунанд.
Қаблан моҳи март вазири корҳои дохилии Русия Владимир Колоколтсев изҳор дошта буд, ки ба рӯйхати шахсони таҳти назорат 685 ҳазор шаҳрвандони хориҷӣ шомил гардидаанд, ки барои ҳузур доштан дар Русия асосҳои қонунӣ надоранд. Сафи одамон дар ин рӯйхат доимо бо ному насабҳои нав зиёд мешавад.
Агар хориҷиён ба ин рӯйхат афтанд, нисбати онҳо амали реҷаи раводид оғоз шуда, ҳуқуқҳояшон ба таври назаррас маҳдуд мешавад. Ба онҳо сабтином ба сифати шахсони ҳуқуқӣ ва соҳибкорони инифродӣ, харидани амволи ғайриманқул ва нақлиёт, идоракунии воситаҳои нақлиёт, кушодани суратҳисобҳои бонкӣ ва анҷом додани баъзе амалиёти бонкӣ манъ мешавад. Ба ин гуна шахсон ақди никоҳ бастан ҳам иҷоза дода намешавад.
Дар сурати қонунӣ гардонидани мақоми будубоши худ дар Русия, муҳоҷирон аз рӯйхат хориҷ ва ҳуқуқҳояшон барқарор мешавад. Ҳамчунин шаҳрванди хориҷӣ дар сурати тарки ихтиёрӣ ё маҷбурии кишвар аз рӯйхат хориҷ мешавад (аз ҳамон замон амали реҷаи ихроҷ низ қатъ мешавад.
