Кумитаи давлатии амнияти миллии Тоҷикистон нозири хадамот оид ба пешгирии қонуншиканӣ миёни ноболиғони ВКД ҶТ, лейтенанти калони милитсия Сафаралӣ Сафаровро таҳти пайгарди қонунӣ эълон кард.
Тавре ба ОИ «Азия-Плюс» як манбаъ аз КДАМ ҶТ хабар дод, ин корманди милиса худро шахси ваколатдори яке аз ширкатҳои бузурги содироткунандаи бензин муаррифӣ намуда, бовари шаҳрвандонро ба даст меовардааст ва ба ҳамин васила маблағҳои пулии онҳоро гирифта, дигар барнамегардонидааст. «Алҳол азхудкунии ҳудуди 3,5 млн. доллари ИМА-и шаҳрвандон аз ҷониби ӯ ошкор гардид», – гуфт манбаъ.
Зимнан зикр гардид, ки айни замон макони будубоши Сафаралӣ Сафаров номаълум буда, баҳри ҷустуҷӯ ва боздошти ӯ чораҳо андешида мешаванд.
Дар ҳамин ҳол, имрӯз дар сомонаи расмии ВКД ҶТ хабаре нашр гардид, ки мувофиқи он, бо фармони вазири корҳои дохилӣ, корманди милисаи дар боло зикршуда барои вайрон намудани талаботҳои оинномаи интизомии ВКД Ҷумҳурии Тоҷикистон аз мақомот озод карда шудааст. ОИ «Азия-Плюс» кӯшиш ба харҷ дод, ки аз сардори маркази матбуоти ВКД Маҳмадулло Асадуллоев перомуни ин қазия шарҳу тавзеҳ дастрас кунад, вале ӯ аз пешниҳоди маълумот худдорӣ намуд.
