Маҳмурод Ризоев, падари яке аз маҳбусони аз Душанбе ба муассисаи ислоҳии Хуҷанд фиристодашуда ба ОИ «Азия-Плюс» иттилоъ дод, ки ӯро ба прокуратура даъват карда, таҳдид кардаанд, ки барои баёноти бардурӯғ нисбаташ парвандаи ҷиноӣ боз мекунанд.
М.Ризоев чандин маротиба ба ВАО перомуни истифодаи шиканҷа ва кирдори бераҳмона нисбати маҳбусони интиқолшуда, аз ҷумла писари худаш маълумот дода буд.
Ба андешаи вай, интиқоли маҳбусон танҳо ба хотири шоҳид будани ду нафар ба марги Ҳамза Икромзода сурат гирифта, онҳоро дуртар аз пойтахт, дар муассисаи ислоҳии Хуҷанд ҷазо доданӣ шудаанд. Ба қавли Ризоев, барои истифодаи беҳад зиёди шиканҷаву ҷазоҳои ғайриоддӣ муассисаи ислоҳии Хуҷанд миёни мардум ҳамчун «Гуантанамо» маъруф аст.
М.Ризоев ба ОИ «Азия-Плюс» сабти аудиои суҳбати телефонӣ бо писарашро пешниҳод намуда буд. Дар ин сабт С.Ризоев огоҳ мекунад, ки «агар ӯ зинда намонад, ба фарзияи худкушӣ ё ҳодисаи нохуш бо ӯ бовар накунанд».
«Имрӯз маро ба прокуратура даъват намуда, ошкоро таҳдид карданд, ки нисбатам парвандаи ҷиноӣ боз мекунанд ва умуман бо ман ҳамчун бо ҷинояткор рафтор карданд», – гуфт Ризоев ба ОИ «Азия-Плюс» имрӯз, 20-уми декабр.
Дар ҳамин ҳол намояндаи прокуратураи аз ҷониби Ризоев зикршуда – прокурори назорати иҷрои қонун дар муассисаҳои ислоҳии шаҳри Душанбе, ва навоҳии тобеи марказ Толиб Азимов дар робита ба ин масъала ба ОИ «Азия-Плюс» изҳор кард, ки М.Ризоев ба прокуратура барои пешниҳоди далел даъват шуда буд.
«Ман танҳо ба ӯ фаҳмонидам, ки дар қонунгузории ҷиноӣ моддаи 346 – «Дидаю дониста расонидани хабари бардурӯғ» амал мекунад ва аз ӯ дархост кардам, ки сабти аудиоиро ба прокуратура пешниҳод намояд, зеро сухани хушку холӣ ба парванда дӯхта намешавад. Дар сурати акс, прокуратура ба андешидани чораҳо ҳуқуқ дорад», – гуфт Азимов.
Ёдрас мекунем, ки аввали моҳи ноябр
наздикону хешовандони чанде аз маҳкумшудагон
, ки аз муассисаҳои ислоҳии Душанбе ва Ваҳдат ба вилояти Суғд фиристода шуданд, дар бораи лату кӯби бераҳмонаи онҳо бо расидан ба ҷойи таъинот хабар дода буданд.
Ба гуфтаи онҳо, шаби 6-уми ноябри соли равон беш аз 50 нафар маҳкумшудагон аз муассисаҳои ислоҳии шаҳрҳои Душанбеву Ваҳдат ба муассисаи ислоҳии №23-и шаҳри Хуҷанд фиристода шуданд.
Онҳо ҳамчунин изҳор намуда буданд, ки миёни маҳбусони интиқолшуда чор нафар шоҳидони марги марги Ҳамза Икромзода, ки рӯзи 20-уми сентябр ба эҳтимоли истифодаи шиканҷа дар муассисаи ислоҳии №1-и пойтахт ба ҳалокат расид, низ ҳузур доранд.
