Ба наздикӣ дар назди Маркази гастроэнтерологии шаҳри Душанбе озмоишгоҳи нави ташхиси бемории сил ифтитоҳ мегардад.
Тавре ба ОИ «Азия-Плюс» муовини директори Маркази ҷумҳуриявии мубориза бо бемории сил Фирӯз Давлатов хабар дод, барои сохтмон ва муҷаҳҳаз намудани озмоишгоҳ беш аз 15 млн. сомонӣ маблағ масраф гардида, пас аз мавриди истифода қарор гирифтан он якумин чунин озмоишгоҳи муосир дар қаламрави кишварҳои узви ИДМ хоҳад буд, зеро дорои сатҳи сеюми бехатарии биологӣ буда, барои кор бо микроорганизмҳои гурӯҳи хавф таъин шудааст ва ба талаботи меъёрҳои байнулмилалӣ комилан ҷавобгӯ мебошад.
«Ифтитоҳи озмоишгоҳи нав ба табибон барои бо сифати хубтар ошкор сохтан ва табобати бемории сил кӯмак расонида, ба фаъолияти марказ ва нуқтаҳои тиббии мавҷуда оид ба табобати тамоми навъҳои бемории сил тақвият хоҳад бахшид», – иброз дошт вай.
Қобили зикр аст, ки соли гузашта дар қаламрави Тоҷикистон ҳудуди 5 ҳазор нафар беморони тоза ба бемории сил гирифторшуда ба қайд гирифта шудаанд, ки аксариятро шаҳрвандони синнусоли аз 30 то 50-сола ташкил медиҳанд.
Дар бунёди озмоишгоҳи мазкур ба Вазорати тандурустии ҶТ Фонди глобалӣ кӯмаки зиёди молӣ расонидааст. Маросими ифтитоҳи расмии озмоишгоҳ моҳи марти соли ҷорӣ баргузор мешавад.
