Русия ба истифодаи сӯзишвории дараҷаи экологии Евро-3 гузашта, аз ин ба баъд тамоми ҳаҷми сӯзишвории Евро-2-ро барои содирот истеҳсол мекунад. Аз 1-уми январи соли 2013 дар Русия муомилоти сӯзишвории дараҷаи Евро-2 манъ гардид.
Тавре ба ОИ «Азия-Плюс» дар яке аз ширкатҳои воридкунандаи маҳсулоти нафтии Тоҷикистон хабар доданд, имрӯз ҳам як қатор корхонаҳои коркарди маҳсулоти нафтии Русия ба истеҳсоли бензини дараҷаи Евро-2 идома дода истодаанд, зеро то ҳанӯз дастгоҳу таҷҳизоти худро барои истеҳсоли бензини дараҷаи Евро-3 омода насохтаанд.
Ба иттилои манбаъ, тамоми ҳаҷми сӯзишвории Евро-2 барои содирот ба кишварҳои Осиёи Марказӣ, аз ҷумла Тоҷикистону Афғонистон низ равона мегардад.
«Албатта, баъзан сӯзишвории дараҷаи Евро-3 низ ворид мешавад, вале хеле кам иттифоқ меафтад, зеро он гарон аст. Корхонаҳои коркарди маҳсулоти нафтии Русия шояд то охири ҳамин сол пурра истеҳсоли сӯзишвории дараҷаи Евро-2-ро қатъ созанд», – гуфтанд дар ширкати мазкур.
Бино ба маълумоти «Тоҷикстандарт», айни замон бинобар сабаби арзонӣ ба Тоҷикистон асосан бензини дараҷаи пасти экологии Евро-2 ворид карда мешавад. «Баъди аз ҷониби Русия мавриди амал қарор додани созишномаи таҳвили маҳсулоти нафтӣ ба Тоҷикистон бидуни боҷи содиротӣ, метавон дар бораи афзоиши ҳаҷми воридоти сӯзишвории Евро-3 ҳарф зад», – иброз доштанд дар мақомоти мазкур.
