Охири моҳи апрел комиссияи Созмони байнулмилалии ҳавопаймоии мулкӣ (ICAO) аудит (санҷиш)-и нақшавии низоми ҳавопаймоии Тоҷикистонро баргузор мекунад.
Тавре ба ОИ «Азия-Плюс» аз Раёсати ҳавопаймоии мулкӣ (гражданӣ)-и Вазорати нақлиёт ва коммуникатсияи ҷумҳурӣ иттилоъ доданд, аудити пешини 5 сол қабл доиргардида барои Тоҷикистон бо натиҷаҳои мусбат анҷом пазируфта буд.
«Тамоми низоми ҳавопаймоии кишвар, сар аз ҳуҷҷатгузорӣ дар муассисаҳои давлатии масъул ба бахши ҳавопаймоӣ то ҳавопаймову фурудгоҳҳо мавриди санҷиш қарор хоҳанд гирифт», – гуфтанд дар вазорат.
Ба гуфтаи муовини сардори Хадамоти давлатии назорат ва танзим дар бахши нақлиёт Рашид Додобоев, эҳтимоли ба рӯйхати сиёҳи ICAO шомил гардидани Тоҷикистон хеле зиёд буда, дар ин ҳолат ба ширкатҳои ҳавопаймоии ҷумҳурӣ мақоми «ширкатҳои беэътимод» дода мешавад ва парвози ҳавопаймоҳои ин ширкатҳо ба кишварҳои Иттиҳоди Аврупо ва дигар давлатҳо манъ карда мешавад. «Манъи парвозҳо танҳо пас аз иҷрои тамоми талаботи ICAO аз рӯйи ҳамаи бандҳои эродҳо бекор хоҳад шуд», – иброз дошт вай.
Додобоев мегӯяд, талаботи аслии ICAO риояи меъёрҳои байнулмилалӣ буда, он ҳам ба ҳуҷҷатгузорӣ ва ҳам ба техникаву мутахассисон дахл дорад. «Имрӯз ширкатҳои ҳавопаймоии Қазоқистон, Қирғизистон, Арманистон, Молдова ва кишварҳои зиёди дигаре ба «рӯйхати сиёҳ»-и ICAO шомиланд ва муддати чандин сол аст, ки Қазоқистон кӯшиши аз он хориҷ шуданро дорад, вале алҳол бенатиҷа», – изҳор кард ӯ.
Мақомоти масъул ба бахши ҳавопаймоии Тоҷикистон ташрифи аудиторони ICAO-ро интизор буда, ҳуҷҷат ва техникаву иншооти дахлдорро барои санҷиш омода месозанд.
