Дар мавсими гармо Кумитаи ҳолатҳои фавқулодда ва мудофиаи граждании назди ҳукуматаи Тоҷикистон шаҳрвандон ва меҳмононро ба эҳтиёткорӣ зимни оббозӣ дар обанбору ҳавзҳо даъват мекунад.
Дар изҳороти интишоршудаи Кумита зикр мегардад, ки бо баланд шудани ҳарорати ҳаво ва оғози мавсими шиноварӣ дар дарёҳо, обанборҳо, каналҳо ва ҳавзҳо, ки ба таҳдиди эҳтимоли ғаркшавии шаҳрвандон оварда мерасонад, аз ҳамагон эхтиёткорӣ талаб карда мешавад.
Гуфта мешавад, мувофиқи маълумоти соли 2012, бар асари риоя накардани қоидаҳои шиноварӣ 113 нафар ба ҳалокат расиданд ва то 30-юми майи соли ҷорӣ бошад, шумораи ғарқшудагон дар ҷумҳурӣ ба 20 нафар расидааст, ки он ниҳоят ташвишовараст.
«Бинобар ин ба Шумо шаҳрвандон ва меҳмонони Тоҷикистон муроҷиат карда, хоҳиш ва тақозо дорем, ки барои ҳимояи ҳаёти худ ва наздиконатон ҳангоми истироҳат ва шиноварӣ дар наздикии дарёҳо, каналҳо ва обанборҳо қоидаҳои бехатариро риоя намоед ва аз оббозӣ дар ҷойҳои манъшуда ва дарёҳои тезҷараён худдорӣ кунед», – омадааст дар изҳорот.
