То имрӯз ҳамагӣ нисфи маблағи ба сифати қарз аз БДА «Амонатбонк» дастраскардаи пешвоёни ғайрирасмии ВМКБ ба бонк баргардонида шудааст.
Раиси БДА «Амонатбонк» Гулнора Ҳасанова зимни нишасти хабарӣ дар ин робита изҳор намуд, ки ҳанӯз соли гузашта вобаста ба пардохти ин қарзҳо парвандаҳои ҷиноӣ боз шуда, тамоми асноди зарурӣ ба Прокуратураи генералӣ супурда шудаанд. «Бо масъалаи пардохти ин қарзҳо мақомоти ҳифзи ҳуқуқ машғуланд ва бо ворид шудани воситаҳо, онҳоро ба бонк мефиристанд», – иброз дошт вай.
Раиси «Амонатбонк» аз шарҳу тавзеҳи минбаъда оид ба ин масъала худдорӣ варзида, тавсия дод, ки барои дастрас кардани маълумоти муафссал дар ин хусус ба прокуратура муроҷиат карда шавад.
Ёдрас мекунем, ки ҳаҷми умумии қарзҳои зикршуда 1 млн. 265 ҳазор сомониро ташкил медиҳад. Қарзҳо соли 2008 ба хешовандону наздикони пешвоёни ғайрирасмии Бадахшон Ёдгор Мамадасламов (700 ҳазор сомонӣ) ва Толиб Айёмбеков (565 ҳазор сомонӣ) дода шудаанд. Аммо дар муҳлати муқарраршуда қарзҳо ба «Амонатбонк» баргардонида нашуданд ва дар ин робита Прокуратураи генералӣ ба Мамадасламов ва Айёмбеков айбномаҳои нав пешниҳод намуд.
