Кормандони шуъбаи дар ноҳияи Ленини шаҳри Москва будаи Хадамоти федералии муҳоҷирати Русия барои нодуруст пур кардани патенти иҷозати кор шаҳрванди Тоҷикистон, сокини ноҳияи Қумсангир Ҷумъаназар Алимовро дар ҳаҷми 5 ҳазор рубли русӣ ҷарима карданд.
Тавре ба ОИ «Азия-Плюс» сухангӯи намояндагии Хадамоти муҳоҷирати назди ҳукумати ҶТ дар Русия Иброҳим Аҳмадов хабар дод, Ҷ.Алимов ба ин тасмим розӣ нашуда, ба намояндагӣ муроҷиат кардааст, ки дар ҳалли мушкилаш кӯмак расонанд.
«Барои ҳалли ин масъала Намояндагӣ бо ҷалби ҳимоятгар Осиб Файзуллоев муайян кард, ки нисбат ба муҳоҷири меҳнатӣ талаботи ғайриқонунӣ татбиқ шудааст. Баъд аз баррасии ҳамаҷонибаи масъала исбот карда шуд, ки зимни ба расмиятдарории патент беэътиноӣ аз ҷониби худи кормандони шуъбаи ХФМ ба амал омада, бо дарназардошти муайянсозии ҳамаи омилҳо, ҷаримаи муқарраргардида нисбат ба муҳоҷир бекор ва патент дода шуд», – иброз дошт номбурда.
Ба қавли вай, ҳамчунин бо мусоидати Намояндагӣ ба як бригадаи бинокорони тоҷики машғули кор дар ширкати сохтмонии «Аист»-и вилояти Маскав қисмате аз маблағи қарз аз музди меҳнат дар ҳаҷми 200 ҳазор рубли русӣ пардохта шуд.
