Таъини нархҳои муайян ба навъҳои асосии маҳсулоти ғизойӣ дар бозорҳои шаҳри Душанбе дар моҳи Рамазон ташаббуси худи соҳибкорони шаҳр буда, мақомоти шаҳрдории пойтахт онҳоро ба фурӯши маҳсулоти ғизойӣ бо нархҳои паст уҳдадор накардааст, – гуфт дар мусоҳиба ба хабарнигори ОИ «Азия-Плюс» сардори Раёсати рушди иқтисод ва савдои шаҳрдории Душанбе Сайфулло Амонов.
Ба гуфтаи ӯ, дар пешорӯи моҳи шарифи Рамазон як гурӯҳи ташаббускори соҳибкорони пойтахт дар соҳаи нархгузорӣ ба навъҳои асосии маҳсулоти ғизойӣ дар бозорҳои пойтахт мониторинги дақиқ доир намуда, ба хулосае расид, ки дар муддати як моҳ бо нархҳои муқарраршуда фурӯхтани онҳо имконпазир аст ва шаҳрдорӣ онҳоро танҳо дастгирӣ намудааст.
Номбурда ҳамчунин таъкид дошт, ки мақомоти шаҳрдорӣ баҳри коҳиши нарх ба маҳсулоти асосии ғизойӣ ҳамаҷониба тадбирҳо меандешад, аз ҷумла ба бозорҳо ва соҳибкорони ҷудогона қарзҳои бефоиз пешниҳод намуда, ярмарка-фурӯшҳои иловагӣ ва нуқтаҳои савдо ташкил мекунад.
Дар ҳамин ҳол ба ОИ «Азия-Плюс» маълум шуд, ки нархҳои тавсияшуда ба маҳсулоти ғизойӣ дар бозорҳои пойтахт дар моҳи Рамазон асосан риоя гардида, кӯшишҳои ҷудогонаи фурӯши маҳсулоти хӯрокворӣ бо нархҳои баланд аз ҷониби роҳбарони бозорҳо пешгирӣ мешавад.
Ёдрас мекунем, ки мутобиқи
қарори раиси пойтахт аз 8 июл
«Дар бораи таъмини тадбирҳои амалии пешгирии болоравии нархи маҳсулоти ниёзи аввалия дар моҳи шарифи Рамазон дар шаҳри Душанбе», ба соҳибкорон тавсия дода шуд, ки давоми моҳи шарифи Рамазон маҳсулоти ғизойии мавриди ниёзи аввалияи мардум бо нархҳои зерин фурӯхта шаванд: гӯшти гов то 29 сомонӣ, гӯшти гӯсфанд то 30 сомонӣ, орди навъи якум аз гандуми воридгардида аз хориҷа то 2,6 сомонӣ, картошка то 1,5 сомонӣ, бехпиёз то 65 дирам, сабзӣ то 1,6 сомонӣ, шакар то 4,2 сомонӣ, равғани рустанӣ то 7,5 сомонӣ, биринҷ то 6 сомонӣ барои як килограмм, шир дар бозорҳо то 3,5 ва шири истеҳсоли ҶСК «Комбинати шири Душанбе» 4,5 сомонӣ барои як литр, тухм то 50 дирам барои як дона ва гӯшти мурғи ҶСК «Мурғи ҳилол»-и ноҳияи Файзобод 7 сомонӣ барои як килограмм.
Қарори мазкури раиси шаҳри Душанбе дар Вазорати адлия ҳамчуни санади меъёрӣ-ҳуқуқӣ ба қайд гирифта шудааст. Бо дархости ҳукуматдорони пойтахт назорати иҷрои он аз ҷониби ташкилотҳои ҷамъиятӣ, ходимони дин, комиссияҳои вакилони Маҷлиси вакилони халқи шаҳри Душанбе ва ҳамчунин як қатор мақомоти ҳокимияти давлатӣ амалӣ мегардад.
