Муҳоҷирони кории тоҷик ба навовариҳои ҷоришуда дар қонунгузории муҳоҷирати Русия бештар мароқ зоҳир мекунанд.
Бино ба маълумоти шуъбаи робита бо ҷомеаи Хадамоти муҳоҷирати назди ҳукумати ҶТ, танҳо тайи 10 рӯзи ахир ба бахши қабул ва маслиҳатдиҳии хадамот ҷиҳати шарҳу тавзеҳи тағйироти ҷоришуда дар қонунгузории муҳоҷирати Русия ва ҳамчунин мушкилоти марбут ба истирдод аз Русия ва ҷустуҷӯи кор дар Русия 348 нафар шаҳрвандони кишвар муроҷиат кардаанд.
Ба иттилои манбаъ, миёни шаҳрвандони нияти муҳоҷирати корӣ ихтиёрдошта 92 нафарашонро сокинони шаҳри Душанбе, 70 нафарро – сокинони вилояти Суғд, 54 нафарро – сокинони вилояти Хатлон, 11 нафарро – сокинони ВМКБ ва 121 нафарро тоҷикистониёни машғули кор дар Маскав ташкил медиҳанд.
«Ба ҳар яки аз онҳо маслиҳатҳои ҳуқуқӣ ва машваратҳои муфид дода шуда, дар зимн 15 намуд маводҳои иттилоотӣ оид ба қонунгузориҳои нави Федератсияи Россия супорида шуд», – гуфта мешавад дар иттилои Хадамоти муҳоҷират.
