Чанде қабл дар пойтахти Қирғизистон – шаҳри Бишкек ҷаласаи Раёсати Шӯрои кории Созмони ҳамкории Шанхай (СҲШ) доир гардид, ки дар кори он ҳамаи роҳбарони Палатаҳои савдо ва саноати кишварҳои узви СҲШ ширкат варзиданд.
Бино ба иттилои хадамоти матбуоти Палатаи савдо ва саноати ҶТ, дар ҷаласа оид ба интихоби раиси ПСС ҶТ, раиси Бахши миллии Шӯрои кории СҲШ аз Тоҷикистон Шариф Саид ба сифати раиси Шӯрои кории СҲШ қарори дахлдор қабул шуд.
Ба иттилои манбаъ, Сергей Катирин, президенти Палатаи савдо ва саноати Русия ва Юй Пин, раиси Бахши миллии Шӯрои кории СҲШ аз Чин муовинони раиси Шӯрои кории СҲШ интихоб шуданд.
«Ҳамчунин дар ҷаласа як қатор масоили муҳими ҳамкориҳо миёни кишварҳои узви СҲШ баррасӣ шуда, дар чаҳорчӯби чорабиниҳои ҷаласа таҳти шиори «Дурнамои ҳамкориҳо дар паҳнои СҲШ. Боз кардани бозорҳои нав» ҳамоиши тиҷоратии Шӯрои кории СҲШ баргузор шуд», – зикр карданд дар хадамоти матбуоти ПСС ҶТ.
