Хоҷагиҳои пахтакори ҷумҳурӣ беш аз нисфи ҳосили пахтаи тибқи нақша пешбинишуда дар соли равонро ҷамъоварӣ намуданд.
Тавре аз Вазорати кишоварзии ҷумҳурӣ хабар доданд, айни замон миқдори ҳосили пахтаи ҷамъоваришуда беш аз 215 ҳазор тоннаро ташкил медиҳад, ки ба 53%-и нақшаи пешбинишуда баробар аст.
Гуфта мешавад, то имрӯз кишвоварзони вилояти Хатлон зиёда аз 167,5 ҳазор тонна, вилояти Суғд – каме бештар аз 42 ҳазор тонна ва навоҳии тобеи марказ – 5,7 ҳазор тонна ҳосили пахта ҷамъоварӣ намудаанд. «Дар майдонҳои кишти пахтаи ҷумҳурӣ беш аз 200 ҳазор нафар ба ғунучини ҳосили пунбадона машғуланд», – гуфтанд дар вазорат.
Бино ба маълумоти Вазорати кишоварзӣ, дар Тоҷикистон имсол дар майдони 192 ҳазор гектар пунбадона кишт шуда, ҷамъоварии беш аз 406 ҳазор тонна ҳосил дар назар аст. Соли гузашта пунбадона дар майдони ҳудуди 200 ҳазор гектар кишт шуда, 415 ҳазор тонна ҳосил ҷамъоварӣ карда шуд.
