Душанбе. 5-уми сентябр. ОИ «Азия-Плюс» – Чанде қабл бо ташаббуси ҷониби Тоҷикистон дар вазорати умури хориҷии Русия мулоқоти вазири умури хориҷии Русия Сергей Лавров бо ҳамтои тоҷики худ Ҳамрохон Зарифӣ доир гардид.
Роҳбари департаменти иттилооти вазорати умури хориҷии ҷумҳурӣ Давлат Назриев ба ОИ «Азия-Плюс» хабар дод, ки дар мулоқот маҷмӯи васеи масоили муносибатҳои дуҷониба мавриди баррасӣ қарор гирифтаанд.
Аз ҷумла, ҷонибҳо масъалаи тезонидани амалисозии сохтмони як қатор иншооти гидроэнергетикӣ дар Тоҷикистонро, ки дар ин хусус зимни боздиди расмии президенти Русия Дмитрий Медведев аз Тоҷикистон тавофуқ ҳосил шуд, муҳокима намуданд.
«Ҳамчунин атрофи масъалаҳои ҳалли мушкилоти муҳоҷирони меҳнатии тоҷик ва фароҳам сохтани шароити мусоиди кору зисти онҳо дар Русия табодули афкори судманд сурат гирифт», – афзуд манбаъ.
