Душанбе. 6-уми сентябр – Дирӯз, 5 сентябр Сарвазири Ҷумҳурии Тоҷикистон Оқил Оқилов ба маҳалли сохтмони нерӯгоҳи барқи обии «Сангтӯда-1» рафта, бо ҷараёни корҳои сохтмонӣ дар сарбанди нерӯгоҳ ва маҳалли насби агрегатҳо шинос шуд.
Оқил Оқилов дар ин ҷо бо иштироки роҳбарияти вазорату идораҳои дахлдори мамлакат маҷлиси ситоди кориро гузаронд. Дар он масъалаҳои ба истифода додани агрегатҳои 3-юм ва 4-уми нерӯгоҳ баррасӣ шуданд. Мутобиқи нақша бояд агрегати 3-уми нерӯгоҳ моҳи октябр ва агрегати 4-уми он моҳи декабри соли ҷорӣ ё аввали соли 2009 ба истифода дода шаванд.
Маврид ба ёдоварист, ки нерӯгоҳи барқи обии «Сангтӯда-1» сохтмони муштараки Тоҷикистону Русия буда, аз ҷониби мутахассисони ҳар ду давлат сохта мешавад. Айни ҳол 2 агрегати ин нерӯгоҳ мавриди истифода қарор гирифта, бо иқтидори 150 то 200 мегават дар як шабонарӯз кор мекунанд.
