Ваколатдор оид ба ҳуқуқи инсон (Омбудсмен) дар Ҷумҳурии Тоҷикистон Зариф Ализода бо кормандони масъули Дастгоҳи Ваколатдор тибқи нақшаи кории мақомот рӯзи 22-юми октябри соли 2013 ба тавқифгоҳи нигоҳдошти муваққат ӣ (СИЗО)-и Раёсати Вазорати корҳои дохилӣ дар ш. Душанбе ташриф овард.
Бино ба иттилои хадамоти матбуоти макомоти мазкур, мақсад аз ташрифи Ваколатдор ба муассисаи мазкур шиносоӣ бо вазъи риояи ҳуқуқи гумонбаршудагон ва шароити нигоҳдории онҳо буд.
Ба иттилои мнабаъ, ҳангоми сӯҳбат бо сардори муассиса Таваралиев М.Х. Ваколатдор оид ба ҳуқуқи инсон оид ба тартиби нигоҳдории занҳо, ноболиѓон, тартиби азназаргузаронии тиббии гумонбаршудагон, мӯҳлати нигоҳдошт, мавҷуд будани камераҳои назоратӣ дар муассисаи мазкур пурсон шуд. Ҳамчунин, Ваколатдор бо тартиб ва қоидаҳои нигоҳдошти шахсони дар муассиса қарордошта, шароитҳои моддӣ (ҳӯрок, пӯшок, ҷои хоб) ва шароити санитарӣ шинос шуд.
Зимни боздид Ваколатдор ба ҳуҷраҳое, ки дар он гумонбаршудагон нигоҳ дошта мешаванд, даромада, бо онҳо як ба як сӯҳбат намуда, оид ба муносибати кормандони муассиса нисбати онҳо пурсон шуд.
Инчунин ҳангоми боздид ба кормандони муассиса талаботҳои санадҳои байналмилалӣ, ки Ҷумҳурии Тоҷикистон онҳоро эътироф намудааст ва қонунгузории амалкунанда оид ба меъёрҳои муносибат бо шахсони гумонбаршуда фаҳмонида шуд.
Дар вақти боздид маълум гардид, ки умуман шароити нигоҳдорӣ дар муассисаи зикргардида қаноатбахш аст.
Бояд қайд кард, ки боздидҳои Ваколатдор оид ба ҳуқуқи инсон аз чунин муассисаҳо дар оянда идома меёбанд.
