Шокир Маҳкамов, яке аз осебдидагон аз садама бо иштироки писари раиси ширкати Роҳи оҳани Тоҷикистон Расули Амонулло аз шуъбаи эҳёгари рухсатӣ ва палатаи умумӣ гузаронида шудааст.
Тавре ба ОИ «Азия-Плюс» муовини сардухтури Маркази миллии тиббӣ (ММТ)-и пойтахт Хайрулло Шарифов хабар дод, вазъи солимии Ш.Маҳкамов ва дигар осебдидагон аз ин садама рӯ ба беҳбудӣ меорад. «Шокир аз дасту поҳояш ҷароҳатҳои зиёди шикаставу захм бардошта, аз шӯъбаи эҳёгарӣ ба палатаи умумии муолиҷа гузаронида шуд», – гуфт ӯ.
Дар суҳбат бо хабарнигори ОИ «Азия-Плюс» Мурод, яке аз наздикони Шокир Маҳкамов дар ин робита изҳор намуд, ки вазъи солимии Шокир хеле беҳтар гардида, ӯ акнун мустақилона ғизо истеъмол мекунад.
Хешону наздикони ҷабрдидагон аз садама зикр мекунанд, ки аз ҷониби оилаи Ҳукумовҳо ҳамарӯза осебдидагон аёдат шуда, ба онҳо кӯмаки моддиву маънавӣ расонида мешавад.
Дар ҳамин ҳол, имрӯз чанде аз хабаргузориҳо бо истинод ба табибони ММТ иттилоъ доданд, ки Шокир Маҳкамов ба ҳуш наомада, ҳанӯз рӯзи 21-уми октябр дар беморхона фавтидааст.
Аз ҷумла, радиои «Озодӣ» менависад, ки рӯзи 23-юми октябр табибони ММТ хабар додаанд, ки пас аз ҷароҳатҳои хеле вазнин вазъи Шокир бад шуда, рӯзҳои ахир ӯ дар ҳолати беҳушӣ қарор доштааст ва рӯзи душанбеи ҳамин ҳафта ба ҳуш наомада, фавтидааст.
