Дар оташдони махсуси Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд дар ҷамъи намояндагони мақомоти ҳифзи ҳуқуқ, сохторҳои қудратӣ ва хабарнигорони ватаниву хориҷии вилоят 146 килову 104 грам маводи мухаддир чун далели шайъии 9 парвандаи ҷиноӣ бо роҳи сӯзонидан нобуд карда шуд.
Бино ба иттилои Агентии назорати маводи нашъаовар, аз миқдори умумии мухаддироти сӯзондашуда 79 килову 567 грами он героин буда, ҳашиш 66 килову 357 грам ва афюн 180 грамро ташкил дод.
Ҳиссаи бештари мухаддироте, ки сӯзонда мешавад, героин (зиёда аз 79 кило) аст, ки кормандони мақомоти ҳифзи ҳуқуқ ва сохторҳои қудратии вилоят дар ҷараёни баргузории чорабиниҳои фаврӣ-ҷустуҷӯӣ мусодира кардаанд.
Маврид ба ёдоварист, ки аз рӯзи ташкилшавии Агентии назорати маводи нашъаовар то ҳоло зиёда аз 14 тонна воситаҳои нашъадор сӯзонида нобуд карда шудаанд.
