Моҳи июли соли равон Фурудгоҳи байнулмилалии Душанбе (ФБД) бо ҶММ «ЮТэйр-Лизинг» бобати дастрас намудани 50 адад техникаи аэродромӣ ба маблағи 5,9 млн евро шартнома баст.
Тавре котиби матбуотии ФБД Муҳаммадюсуф Шодиев хабар дод, аввали моҳи октябр 3 адад автобуси перронӣ, 2 экскаватор, 1 адад грейдер, 2 адад зинапояҳои худгард оварда шуд. «Дастрас намудани техника идома дошта, дар назар аст, ки то моҳи марти соли 2014 маҷмӯи техникаҳои дар шартнома нишондодашуда пурра дастрас карда шавад», – гуфт ӯ.
Ба қавли котиби матбуотӣ, техникаҳои нави замонавӣ имкон медиҳан, ки д сатҳ ва сифати хизматрасонӣ ба ҳавопаймоҳо ва мусофирон ба маротиб беҳтар карда шавад.
Ба гуфти мутахассисон «ЮТэйр-Лизинг» ба бозори авиатсионии Осиёи миёна ворид шуда, сараввал бо фурудгоҳи Душанбе ҳамкориро оғоз намудааст. «Дар назар аст, «ЮТэйр-Лизинг» бо истифода аз имкониятҳои мавҷуда парки техникии фурудгоҳро пурра намояд ва ҳамчун шарики стратегӣ дар оянда низ бо фурудгоҳи Душанбе ҳамкориҳоро вусъат диҳад», – гуфтааст и.в. директори «ЮТэйр-Лизинг» Мария Швартс.
Ёдовар мешавем, ки фурудгоҳи Душанбе калонтарин фурудгоҳи кишвар ба шумор рафта, айни ҳол имкони техникии хизматрасонӣ ба ҳамаи намуди ҳавопаймоҳои калонаҷми мусофиркаш ва боркашро дорад.
