Дар Кумитаи давлатии сармоягузорӣ ва идораи амволи давлатӣ масъалаи ворид намудани тағйироту илова ба Қонуни ҶТ «Дар бораи санҷиши фаъолияти субъектҳои хоҷагидор» баррасӣ мешавад.
Тавре ба ОИ «Азия-Плюс» аз Кумитаи мазкур хабар доданд, ҳадаф аз ворид намудани тағйироту илова ба ин қонун танзими раванди санҷиши фаъолияти субъектҳои хоҷагидор мебошад.
«Аксаран корхонаҳо аз санҷишҳои зиёд шикоят мекунанд ва мо ният дорем, ки раванди санҷишро ба танзим оварем, то ки андозсупорандагони бовиҷдон камтар аз ҷониби мақомот мавриди санҷиш қарор гирифта, ба ин васила онҳо ба саривақт иҷро кардани уҳдадориҳояшон ҳавасманд мегарданд», – шарҳ доданд дар Кумита.
Зимнан зикр гардид, ки тағйироту илова ба Қонуни ҶТ «Дар бораи санҷиши фаъолияти субъектҳои хоҷагидор» дар ҳоли бозбиниву таҳия қарор дошта, ахири ҳамин сол ба баррасии парлумон пешниҳод хоҳанд шуд.
