Кормандони Кумитаи давлатии амнияти миллии ҷумҳурӣ ба гумони даст доштан дар муомилоти ғайриқонунии маводи мухаддир сокини 36-солаи ноҳияи Ҳамадонӣ Давлат Сафармамадовро боздошт ва аз ӯ ба миқдори 1 кило маводи нашъаовари героинро мусодира намуданд.
Бино ба маълумоти маркази робита бо ҷомеаи КДАМ ҶТ, соли 2003 Сафармамадов ба муҳлати 16 соли зиндон маҳкум гардида, соли 2011 мутобиқи қонуни афв ба озодӣ баромада буд.
«Дар ҷараёни тафтиш маълум шуд, ки ҳаммаслакони ӯ аз Афғонистон як миқдори навбатии маводи мухаддирро ба Тоҷикистон интиқол доданианд», – гуфтанд дар КДАМ.
Ба иттилои манбаъ, зимни баргузории амалиёти махсус аз рӯи ин маълумот кормандони КДАМ се нафар қочоқбарони афғонро дар марз безарар гардонида, аз ҷойи ҳодиса 1 адад автомати Калашников ва 10 кило маводи нашъаовари афюн дарёфт намудаанд.
Зимнан зикр гардид, ки дар ҷараёни як амалиёти дигар дар ҳудуди шаҳри Истаравшан ба гумони даст доштан дар гардиши ғайриқонунии маводи нашъаовар сокини шаҳри Кӯлоб Ҳоким Саидов боздошт шуда, аз автомашинаи ӯ 7 кило маводи нашъаовари афюн дарёфт ва мусодира шудааст.
«Зимни тафтишот малум шуд, ки боздоштшуда ин миқдор мухаддиротро аз шаҳрванди Афғонистон Набиоллоҳ валади Ҳаким дастрас намуда, ба сокини ноҳияи Мастчоҳ Саидиқбол Ашрафов фурӯхтанӣ будааст», – иброз доштанд дар Кумита.
Ҳамчунин иттилоъ дода шуд, ки дар ҷараёни амалиёти махсус дар қаламрави шаҳри Чкаловски вилояти Суғд низ як пинҳонгоҳе бо 8 килову 700 грамм маводи мухаддири ҳашиш дарёфт гардидааст.
Қобили зикр аст, ки шурӯъ аз оғози соли равон кормандони КДАМ ҶТ аз муомилоти ғайриқонунӣ беш аз 2 тоннаву 250 кило маводи мухаддирро мусодира намуданд.
