Ширкати «Барқи тоҷик» муваққатан реҷаи маҳдуди истифодаи нерӯи барқ дар тамоми қаламрави ҷумҳуриро бекор мекунад. Ин туҳфа ба сокинони кишвар ба муносибати фарорасии Соли нав тақдим мешавад.
Тавре ба ОИ «Азия-Плюс» як манбаъ аз ширкати энергохолдингии кишвар хабар дод, шурӯъ аз соати 06:00-и субҳи 31-уми декабр то соати 23:00-и 1-уми январ интиқоли нерӯи барқ бидуни маҳдудият ба тамоми истифодабарандагон ба таври мунтазам ва доимӣ дар саросари кишвар сурат мегирад.
Ба иттилои манбаъ, аллакай аз 2-юми январ ба манотиқи кишвар нерӯи барқ тибқи реҷаи қаблан муқарраршуда – 9 соат дар як шабонарӯз амалӣ мегардад.
Ёдрас мекунем, ки аз 1-уми ноябр ширкати «Барқи тоҷик» реҷаи истифодаи маҳдуди барқ дар манотиқи кишварро ҷорӣ намуд. Аз ин ба баъд интиқоли барқ ба минтақаҳои ҷумҳурӣ рӯзона аз соати 09:00 то 17:00 ва шабона аз соати 22:00 то 05:00 қатъ карда мешавад. Реҷаи маҳдуди истифодаи барқ ба пойтахт, шаҳрҳои Хуҷанд, Кӯлоб, Турсунзода ва Чкаловск дахл надорад.
