Дафтари Созмони амнияту ҳамкории Аврупо (САҲА) дар Тоҷикистон ба назорат аз болои амалиёти нобуд сохтани беш аз ҳазорон адад аслиҳаи сабуки оташфишон, ки аз аҳолӣ мусодираву ҷамъоварӣ ва ё аз пинҳонгоҳҳои махфӣ дарёфт шудааст, оғоз намуд.
Бино ба иттилои Дафтари САҲА дар ҶТ, ин амалиёт дар Раёсати таъминоти моддиву тхникӣ ва низомии Вазорати корҳои дохилии Тоҷикистон гузаронида шуда, барои буридани аслиҳа САҲА техникаи махсус пешкаш кардааст, ки тавассути он мутахассисони вазорат муддати ду ҳафта дар маҷмӯъ 1165 адад аслиҳаро нобуд месозанд.
«Назорат аз болои аслиҳа мавзӯи муҳими рӯзномаи САҲА буда, яке аз масоили афзалиятноки Дафтари САҲА дар Тоҷикистон маҳсуб меёбад», – изҳор доштааст зимни боздид аз коргоҳи нобудсозии аслиҳа иҷрокунандаи вазифаи роҳбари Раёсати низомиву сиёсии Дафтари САҲА дар Тоҷикистон Эрдал Дуздабан.
Намояндаи ВКД ҶТ генерал-майор Фарҳод Шодмонбеков бар ин назар аст, ки сарфи назар аз сол то сол коҳиш ёфтани шумори аслиҳаи мусодирашуда, то ҳанӯз дар ҷумҳурӣ пинҳонгоҳҳои махфии аслиҳаву муҳимот дарёфт мегарданд. «Дастгирии доимии САҲА, ки ба баланд бардоштани имконоти кишвар дар нигаҳдорӣ ва нобуд сохтани аслиҳа равона шудааст, барои Тоҷикистон аз аҳамияти вижа бархӯрдор аст. Мо ба идомаи ҳамкориҳои муштарак дар бахши таъмини амният дар ҷумҳурӣ умедворем», – гуфт номбурда.
