Душанбе. 20-уми август. ОИ «Азия-Плюс» – Комиссияи марказии интихобот ва райъпурсии Тоҷикистон рӯйхати нозиронро дар интихоботи парлумонии қарибулвуқӯъи (28-уми сентябр) Белорус муайян кард.
Раиси комиссия номбурда Муҳибулло Додоҷонов ба хабарнигори ОИ «Азия-Плюс» изҳор дошт, ки аз ҷониби Тоҷикистон панҷ нафар – сафири Тоҷикистон дар Белорус Амирхон Сафаров, котиби аввали сафорат Саидҷаъфар Сафаров, корманди Дастгоҳи иҷроияи президенти Тоҷикистон Ҳокимҷон Мирсаев ва ду нафар кормандони комиссия – номбурда М.Додоҷонов ва сармутахассис Раҷабмурод Ашӯров ба рӯйхат шомил шуданд.
Қобили зикр аст, ки ҳайати нозирони Иттиҳоди Давлатҳои Мустақил маротибаи чаҳорум дар Белорум мониторинги интихоботро доир месозанд.
Ҳайати нозирон ният дорад, дар ҳамаи 110 ҳавзаҳои интихоботӣ мониторинг гузаронида, бо аъзои комиссияҳои интихоботии ҳавза ва минтақаҳо робита барқарор созад. Ҳамчунин баргузории мулоқот бо номзадон ва шахсони бовариноки онҳо ва интихобкунандагон низ дар назар аст.
