Намояндагии дипломатии Тоҷикистон дар Украина ба шаҳрвандони тоҷики муқими ин кишвар тавсия медиҳад, ки бидуни зарурат ба макони баргузории гирдиҳамойиҳо нараванд.
Тавре ба ОИ «Азия-Плюс» аз департаменти иттилоооти Вазорати корҳои хориҷии ҶТ хабар доданд, сафорат ҳамчунин бо роҳбарони диаспораҳои тоҷикон дар шаҳру навоҳии Украина ва Шӯрои донишҷӯёни тоҷики муқими ин кишвар бобати ин масъала гуфтугӯ кардааст.
Дар Раёсати мазкур дар бораи шумори дақиқи шаҳрвандони тоҷик дар Украина маълумот дода натавонистанд ва танҳо зикр карданд, ки миёни осебдидагон аз гирдиҳамоиҳо шаҳрвандони тоҷик ҳузур надоранд. Қаблан сафорати Тоҷикистон дар Украина иттилоъ дода буд, ки танҳо дар шаҳри Киев 252 нафар шаҳрванди тоҷик зиндагӣ доранд.
Ёдрас мекунем, ки шурӯъ аз 21-уми ноябр бинобар сабаби аз ҷониби ҳукумати Украина рад шудани имзои қарордоди ҳамбастагӣ бо Иттиҳоди Аврупо, дар майдони марказӣ ва дигар кӯчаву хиёбонҳои пойтахти Украина ва дигар шаҳрҳои кишвар гирдиҳамоиҳои эътирозӣ оғоз гардиданд, ки феълан низ бо ҷараёни шадидтар идома доранд.
Бар асари задухӯрдҳо бо нерӯҳои мақомоти интизомӣ 248 нафар ба муассисаҳои тиббӣ муроҷиат намуданд. Беш аз садҳо нафар тазоҳургарону кормандони милиса, зиёда аз 30 нафар журналистон осеб дида, дар бораи талафоти ҷонӣ низ маълумот расидааст.
