Қаҳрамони дукаратаи Тоҷикистон оид ба футбол – дастаи «Равшан»-и Кӯлоб дар бозии охирини давраи гурӯҳии Ҷоми Конфедератсияи футболи Осиё, ки дар меҳмонӣ бо дастаи «Сафо»-и Лубнон дар Бейрут баргузор шуд, бо ҳисоби бузурги 0 бар 8 шикаст хӯрд.
Бино ба иттилои сомонаи расмии Кумитаи миллии олимпии ҷумҳурӣ, бозии дигари ин гурӯҳ байни «Ал Сувайқ»-и Умон ва «Зат Рас»-и Урдун бо ҳисоби 0-0 хотима ёфт.
Қобили зикр аст, ки дар мусобиқоти имсолаи Ҷоми КФО дастаи «Равшан» дар ҳамаи шаш бозиҳо ба шикаст мувоҷеҳ гардида, ҳеҷ имтиёзе ба даст наовард ва аз ҳаққи ширкат дар даври баъдии мусобиқа маҳрум шуд.
Дар гурӯҳи «А»-и мусобиқоти мазкур, ки дастаи «Равшан» дар он бозӣ мекард, пас аз анҷоми даври гурӯҳӣ тимҳои «Сафо»-и Лубнон (16 имтиёз) ва «Зат Рас»-и Урдун (11 имтиёз) зинаҳои аввалро ишғол намуда, ба даври 1/8 финалии мусобиқот роҳхат гирифтанд. Дастаи «Ал-Сувайк» (Уммон) бо касби 7 имтиёз дар зинаи сеюм қарор гирифт.
