Дар Тоҷикистон бори нахуст Энсиклопедия (Донишнома) барои кӯдакон бо забони тоҷикӣ нашр шуд.
Тавре ба «Азия-Плюс» муовини сармуҳаррири Энскилопедияи миллии Тоҷикистон Баҳодур Раҳматзод хабар дод, ин китоб ҳанӯз ахири соли гузашта бо теъдоди 800 нусха ба чоп расида, арзишаш 230 сомонӣ аст. «Бори нахуст тӯли фаъолиятам шоҳиди он шудам, ки тамоми нусхаҳои китоб хеле зуд ба фурӯш рафт», – иброз дошт ӯ.
Ба қавли ӯ, китоб рангаву ҷолиб ва хушсифат чоп гардида, коршиносони забони тоҷикӣ бар ин назаранд, ки он осону дастрас навишта шудааст. Рӯи таҳияи ин энксклопедия даҳҳо олимон кор кардаанд.
«Энсиклопедия аз маълумоти умумӣ ва мушаххас дар бораи таърихи Тоҷикистон, пайдоиши тамаддун иборат буда, фаслҳои алоҳида ба кайҳон, техника, олами ҳайвонот ва ғайра бахшида шудаанд. Маводи бештари нашрия таърихи Тоҷикистон ва табиати онро дар бар мегирад», – зикр мегардад дар муқаддимаи китоб.
Ба гуфтаи Раҳматзод, арзиши китоб барои харидорони оддӣ каме дастнорас аст, чунки он на дар матбаааи давлатӣ, балки дар матбааи хусусии «ЭР-Раҳмон» чоп шудааст.
Дар ҳамин ҳол, ба гуфтаи сармуҳаррири Энсиклопедияи миллии Тоҷикистон Нурмаҳмад Амршоҳӣ, баъди ду моҳ ин китоб боз ба кӯдакони тоҷик бо сифати беҳтар ва нархи дастрастар чоп ва пешкаш карда мешавад.
