Бонки аврупоии таҷдид ва рушд (БАТР) дар бораи маъракаи нави коммуникатсионӣ оид ба машваратҳои тиҷоратӣ барои корхонаҳои хурду миёна эълон пахш намуд. Чорабинӣ имрӯз, 26-уми май соати 16-00 дар меҳмонхонаи «Хайят Реҷенси»-и шаҳри Душанбе доир мегардад.
Дар баёнияи хабарии БАТР дар ин робита зикр мегардад, ки бо дастгирии тиҷорати хурду миёна БАТР як қатор воситаҳо, аз ҷумла маблағгузории мустақим ё тариқи бонкҳои шарикро пешниҳод намуда, бо истифода аз таҷрибаи мушовирони маҳаллӣ ва коршиносони байнулмилалӣ, ба соҳибкорон дар дастрасӣ ба машваратҳои касбии тиҷоратӣ кӯмак мекунад.
Муаррифии маъракаи иттилоотӣ дар 25 кишвар аз Аврупои Ҷанубӣ-Шарқӣ то Африқои Шимолӣ, Русия ва Осиёи Марказӣ доир мегардад. Дар чорабинӣ кормандони сохторҳои ҳукумат, намояндагони созмонҳои байнулмилалӣ, ниҳодҳои молиявӣ, корхонаҳо, ширкатҳои консалтингӣ ва ВАО иштирок мекунанд. Дар ҷараёни чорабинӣ ҳамчунин оид ба фаъолияти бонк, лоиҳаҳои муваффақи амалишуда тайи 7 соли ахир низ маълумот дода мешавад.
«БАТР натанҳо маблағгузорӣ пешниҳод мекунад, балки лоиҳаҳо оид машваратҳои тиҷоратиро дастгирӣ намуда, ба рушду густариши корхонаҳои хурду миёна ва ба таркиби муҳими иқтисоди кишвар ва тамоми минтақа ноил гардидани онҳо кумак мерасонад», – иброз доштааст дар ин робита раиси Дафтари намояндагии БАТР дар Тоҷикистон Ричард Ҷоунс.
