Таҳти раёсати раиси палатаи болоии парлумони ҷумҳурӣ Маҳмадсаид Убайдуллоев ҷаласаи Шӯрои Маҷлиси миллии Маҷлиси Олии Тоҷикистон баргузор шуд.
Тавре ба «Азия-Плюс» ёвари раиси палатаи болоии парлумони кишвар Шавкат Саидов хабар дод, дар ҷаласаи Шӯро рӯзномаи иҷлосияи навбатии Маҷлиси миллии Маҷлиси Олии ҶТ, ки имрӯз дар Душанбе таҳти раёсати Маҳмадсаид Убайдуллоев баргузор мешавад, тасдиқ гардид.
Ба гуфтаи ӯ, дар ҷаласаи Шӯро барррасии 52 қонуни қаблан аз ҷониби палатаи поёнии парлумон қабулшуда, аз ҷумла қонунҳо «Дар бораи судҳо», «Дар бораи Суди конститутсионӣ», «Дар бораи дастгирии давлатии соҳибкорӣ», «Дар бораи адабиёти таълимӣ» ва ғайра дар назар аст.
Зимнан зикр гардид, ки дар ҷаласаи Шӯро ҳамчунин ҷиҳати омодагӣ ба форуми байнипарлумонии Тоҷикистону Русия, ки моҳи октябри соли равон дар Русия доир мегардад, гурӯҳи корӣ таъсис дода шуд.
