Президенти Тоҷикистон Эмомалӣ Раҳмон дар робита ба ҳодисаи ба садамаи ҳавоӣ дучор шудани ҳавопаймои мусофиркаши ширкати ҳавопаймоии Алҷазоир ва ба ҳалокат расидани шаҳрвандони давлатҳои Алҷазоиру Фаронса ба сарони ин кишварҳо Абдулазиз Бутефлиқа ва Франсуа Жерар Жорж Олланд барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияҳо зикр мегардад, ки мардуми Тоҷикистон бо андӯҳи бузург хабари садамаи тайёраи мусофирбарро дар наздикии шаҳри Гаои Ҷумҳурии Малӣ, ки мӯҷиби марги теъдоди зиёди мусофирон гаштааст, қабул намуданд.
«Бо ибрози таъзия ва тасаллияти бародарона ба мардуми Алҷазоиру Фаронса, хоҳишмандам ҳамдардии инҷониб ва халқи Тоҷикистон ба хонаводаҳои ҳалокшудагон расонида шавад», – омадааст дар барқия.
Ёдрас мекунем, ки рӯзи панҷшанбеи ҳамин ҳафта ҳавопаймои мусофиркаши ширкати ҳавопаймоии Алҷазоир дар наздикии шаҳри Гаои Ҷумҳурии Малӣ ба садама дучор гардида, бар асари он 116 нафар шаҳрвандони кишварҳои гуногун, ки аксарашонро шаҳрвандони Алҷазоиру Фаронса ташкил медоданд, ба ҳалокат расиданд.
