– Қатъи дастрасӣ ба шабакаи иҷтимоии «Одноклассники» дар Тоҷикистон ба манфиатҳои корбарон зиён оварда, ҳамчунин таҷассумгари далели он аст, ки дар қонунгузории миллӣ дар ин бахш тартиби саҳеҳу шаффофи танзими мушкилоти мазкур пешбинӣ нашудааст, – гуфта мешавад дар изҳороти расмии хадамоти матбуоти Mail.Ru Group.
Дар изҳороти расмӣ зикр мегардад, ки шикоятҳои нахустин дар мавриди дастнорас будани шабакаи иҷтимоӣ дар Тоҷикистон ҳанӯз рӯзи 18-уми июл расидаанд.
«Сарфи назар аз муроҷиатҳои сершумор ба мақомоти танзимкунандаи Тоҷикистон, ба мо муяссар нашуд, ки сабабҳои маҳдуд шудани дастрасӣ ба шабакаи иҷтимоӣ дар қаламрави кишварро маълум намоем. Аз ҷониби намояндагони ин мақомот ба мо ягон дархости расмӣ нарасидааст», – таъкид мегардад дар изҳорот.
Ҳамчунин гуфта мешавад, раҳбарияти Mail.Ru Group за тамоми имконоташ истифода дорад, то ки ҳарчи зудтар дастрасӣ ба корбарони шабака дар қаламрави Тоҷикистонро барқарор намояд.
«Мо бар ин назарем, ки вазъи мавҷуда ба манфиатҳои ширкатҳои бузурги фароҳамсози интернет низ зиён оварда, қонунгузории кишвар махсусияти кори ширкатҳои фароҳамгари интернетро ба инобат намегирад», – омадааст дар изҳорот.
Ёдрас мекунем, ки субҳи рӯзи 19-уми июл бархе аз корбарони интернет дар Тоҷикистон хабар доданд, ки ба шабакаи «Одноклаасники»
дастрасӣ надоранд.
Инҳо корбарони ширкатҳои фароҳамсози интернети «Сатурн Онлайн», «Вавилон Т», «Мегафон Тоҷикистон», «Телеком Технолоҷи ва «Tcell» буданд.
