Панҷ нафар ҷавонон посбони ширкати «Азия Тобако Трейдинг»-ро то марг лату кӯб намудаанд.
Бино ба иттилои маркази матбуоти ВКД ҶТ, 30-юми июли соли ҷорӣ, соати 06:00-дақиқа ҷасади шаҳрванд Исмоилов Раҳим соли таваллудаш 1959, истиқоматкунандаи кӯчаи Хуҷамбиёи-болои ш.Душанбе бо аломатҳои марги маҷбурӣ аз ҳуҷраи посбонхонаи ҶДММ “Азия Тобако Трейдинг”, воқеъ дар кӯчаи А. Мухторови ноҳияи Исомили Сомонӣ дарёфт карда шудааст.
Ба иттилои манбаъ, баъди расидани хабар, бо супориши Вазири корҳои дохилӣ генерал-лейтенанти милитсия Раҳимзода Рамазон Ҳамро аз ҳисоби кормандони ботаҷрибаи мақомоти милитсия дарҳол гурӯҳи фаврӣ-тафтишотӣ ташкил карда шуда, зимни гузаронидани чорабиниҳои фаврӣ-ҷустуҷӯӣ аз рӯи изи гарм ҷинояти содиршуда ошкор карда шуд.
Гуфта мешавад, аз ҷониби кормандони милитсия ҳамчун гумонбар дар содир намудани ҷинояти куштор шаҳрвандон Фаррух Норов ва Давлат Бӯриев, ҳарду 27-сола, Субҳон Бобоҷонови 23-сола, Бахтовар Нурови19-сола ва Суҳроб Боеви 29-сола, сокинони ноҳияи Рӯдакӣ дастгир карда шуданд, ки нафарони мазкур бо мақсади ғоратгарӣ ба ҶДММ “Азия Тобако Трейдинг” ворид шуда, посбони ин корхона Исмоилов Раҳимро бо чӯбдаст зада, аз ҳаёт маҳрум намудаанд.
Зимнан зикр мегардад, ки нисбати ҳодисаи мазкур парвандаи ҷиноятӣ оғоз гардида, тафтишот дар ин самт идома дорад.
